Ex Prome Minister di Aruba Henny Eman a cumpli 70 aña

    195
    0
    SHARE
    - Advertisement -

    ORANJESTAD   (AAN):  Henny Eman a nace den un famia unda politica tabata pan di cada dia. Su welo na kende el a wordo yama, esta Henny bieu, su tata Shon A y prome cu nan su bisawelo Cornes Eman ta esnan cu a start cu e lucha di Aruba su autonomia. Nan a construi e fundeshi fuerte di nos Status Aparte.

    Henny desde chikito tabata prepara pa drenta politica un dia. Mescos cu su tata el a studia ley na Leiden cu e pensamento cu’n reto grandi tabata ward’e  asina e caba su estudio. Temponan tabata otro y na añanan setenta no tabatin e infrastructura cu nos tin awe. Asina mes Henny tabata haya noticia for di Aruba cu e partido cu su welo a funda tabata confronta problemanan grandi. Tabatin un kiebro y e grupo cu a distancia su mes di partido AVP a funda su propio partido y a laga e lucha di Status Aparte cay y boga pa Independencia.

    Ora Henny a tende di e desaroyonan aki el a bin Aruba pa pone partido AVP bek riba pia y rescata e lucha, e anhelo di ta baas den su mes cas cu tanto e pueblo di Aruba a bringa p’e. AVP tabata na suela. Un man yen di hende tabata kere ainda den e partido. Henny hunto cu Alicio Quandt y Chibi Croes den un triumvirato a guia e partido na 1977 logrando 1 asiento.

    Despues di eleccion Henny a bay bek Hulanda, caba su estudio cu Status Aparte como tema di su thesis y a regresa mesora bek Aruba pa sigui den politica y rescata partido AVP. Na 1979 partido a haya 1200 voto di cual mas di mita tabata riba nomber di Henny so. Esaki tabata muestra cu pueblo a scoge pa e politico hoben cu ideanan nobo.

    Na 1978 Henny e keda elegi como lider di AVP. Henny a organisa e partido den forma structural. A lanta comisionnan, a institui un archivo di miembrecia y a logra haya esnan cu a bandona partido bek. E cantica ‘Ban Cas bek cu AVP’ ta ilustrativo pa e tempo ey. Status Aparte a bin bek como tema principal di partido AVP.

    Historia ta siña nos cu Henny a logra den su intento. Hunto cu otro expertonan di partido AVP el a frena e proceso di independencia di e otro partidonan y a convence Hulanda y Antiyas cu e derecho di autodeterminacion di su pueblo no ta algo di haci wega cu ne. El a logra  y na 1983 Aruba cu Hulanda y Antiyas a firma cu durante un fase transitorio Aruba lo haya su Status Aparte dia 1 di januari 1986. Pero mientras e logro aki tabata algo tremendo y Aruba tabata preparando pa su futuro nobo, nubianan scur a presenta den e shelonan blou di Aruba. Lago a anuncia di lo cera su portanan y e fondonan cu Aruba mester a haya di e refineria ya lo no tey mas.

    Aruba tabata na vispera di su Status Aparte confrontando un di e peor momentonan di su historia. Un exodus pa Hulanda a tuma lugar, mas o menos 10 mil hende a bandona e isla cu tabata para enfrente un situacion social penoso. Hulanda NO a duna Aruba ningun cent pa e por ta prepara pa su situacion nobo. Aruba a haya placa presta di Hulanda cu el a paga bek cu interes. Henny Eman no a defrauda su pueblo. El a lora manga di caminsa y a traha. Rondona pa hendenan capacita cu tin Aruba na pecho a logra pone e isla bek riba pia.

    Pasobra historia semper ta husto y universo no ta defrauda ningun hende,  Henny Eman, yiu di Shon A Eman y nieto di Henny Eman bieu a bira e prome Prome Minister di pais Aruba na 1986. Pueblo a carg’e y a yud’e den e trabounan duro cu tabata presenta na horizonte. E retonan tabata casi insuperabel. Henny a logra transforma Aruba den e Aruba nobo cu el a priminti: el a elimina desempleo, a redobla e ingreso per capita y a converti e isla den un pais cu tabata haya elogio y admiracion di tur banda. El a inspira confiansa y a logra di convence e pueblo pa reluci e miho parti di su caracter den e peor crisis cu Aruba a yega di conoce: esta positivismo, union y un fe sin igual di superacion.

    Durante Henny su liderazgo Aruba a conoce un di su temponan di mas glorioso y asombroso. A institui Banco Central, SER, Algemene Rekenkamer, Raad van Advies, a introduci e moneda Arubiano y mucho mas. Aruba a bira e ehempel den Reino, den region y den mundo. Tanto IMF como Banco Mundial a elogia Aruba su logronan cu hasta a wordo describi como un milager. La Reina den su troonrede a menciona Aruba como un ehempel, un inspiracion. Un admiracion cu a transcende fronteranan y Henny a ricibi e condecoracion di mas halto den Reino, Venezuela tambe a otorgu’e condecoracion mas halto di e pais y President Bush a elogi’e den un carta pa su lucha contra narcotrafico y di ODCA reconocimento pa e milager di Aruba.

    Na aña 1999 e estadista di gran taya Henny Eman a retira di politica y a pasa e liderazgo over pa un hoben bon prepara y educa Tico Croes. Cu esaki e carera di Henny Eman no a yega su fin. Al contrario, te dia di awe Henny ta masha envolvi den politica y al tanto di loke ta pasa.

    Riba dia di su aña kier a rindi homenahe na e persona modesto aki cu a haya un encargo grandi riba su lomba y a cumpli cabalmente cu e retonan cu el a haya su dilanti. Pabien Henny y danki di curazon pa loke bo a haci pa Aruba.

    Relato: Partido AVP

     

    - Advertisement -

    DUNA COMENTARIO

    Please enter your comment!
    Please enter your name here