Home Hudicial Fiscal a exigi 6 aña di prison pa recidivista envolvi den ladronicia...

Fiscal a exigi 6 aña di prison pa recidivista envolvi den ladronicia y asalto arma

52
0
SHARE
- Advertisement -

Mañan sentencia ta cay

ORANJESTAD (AAN):  Luna pasa tratamento di e caso a tuma lugar caminda e otro dos sospechoso a wordo condena na final di tratamento di e caso. Door cu Fiscal a exigi 6 aña di prison pa e homber J.W. , kende Fiscal ta considera un recidivista, Hues a dicidi di studia e caso bon y mayan mainta tin sentencia.

EXIGENCIA FISCAL

En realidad tin 6 sospechoso envolvi pero a pospone e caso contra tres y a sigui cu e otronan. E casonan ta relaciona cu ladronicia, intento di asalto arma y asalto arma. E sospechosonan ta T.B., A.T. y J.W.

Fiscal a bisa cu e ta haya legalmente proba e acusacionnan contra e trio. Fiscal a cuminsa cu T.B. Fiscal a bisa cu T.B. di su mes a splica diferente otro caso entre otro e plan di asalto arma na un cas na Ponton. Fiscal a sigui bisa cu T.B. a admiti su culpabilidad. Fiscal ta haya cu aki por papia di un asalto arma realisa. Na opinion di Fiscal, e hecho cu e doño di e cas, L., no a presenta, no ta haci otro. Fiscal ta haya T.B. complice di e asalto arma. Tambe Fiscal ta haya T.B. complice di e ladronicia na Weg Seroe Blanco, caminda el a wordo deteni mesora. Pa e castigo, Fiscal a bisa cu e ta tene cuenta cu e hecho cu ladronicia ta un caso hopi serio. E ta causa hopi angustia pa e habitantenan cu no ta sinti nan mes sigur den nan propio cas. Fiscal a bisa cu tambe e ta tene cuenta cu si T.B. no a papia di e asalto arma, lo no a haya sa di esaki.

Fiscal a exigi 25 luna di prison di cual 5 luna ta condicional cu 2 aña di prueba. Tambe Fiscal a bisa Hues cu e ta aproba e demanda di daño pero ta exclui e joyas pasobra no tin recibo pa determina e balor di e joyas. El a pidi Hues pa pone e medida pa T.B. paga. E suma cu T.B. mester paga di daño ta 2647 florin.

Pa loke ta A.T., Fiscal ta hay’e culpable di dos ladronicia pasobra na Bakval nan a drenta den dos apartamento. Fiscal a mustra cu A.T. a admiti y a papia di e otro sospechoso pero no kier papia di e tercer sospechoso. Fiscal ta haya cu A.T. ta complice di e dos ladronicianan. El a tene cuenta cu Reclassering a señala cu A.T. facilmente ta wordo influencia pa haci malo. Fiscal ta kere cu ta bon Reclassering guia A.T. El a exigi 9 luna di prison di cual 4 luna ta condicional y 3 aña di prueba y bou guia Reclassering. Fiscal a aproba demanda di daño caminda A.T. lo mester paga 9409 florin y Fiscal a pidi Hues pa pone e medida pa paga.

Pa loke ta J.W., Fiscal a bisa Hues cu e ta haya J.W. culpable di ladronicia di e supermercado y e asalto arma riba e chofer di e Van di Superior Tobacco. Fiscal a mustra cu mas o menos 70 mil florin na balor di cigaria a wordo horta. E chofer a wordo maltrata pa tres asaltante. Un testigo a reconoce un asaltante como J.W. Recherche riba camera di seguridad a mira con e asalto arma a sosode. Recherche a reconoce J.W. y J.U.F. como dos di e asaltantenan. Tin yamadanan riba cel di J.U.F. cu ta papia J.W. caminda nan ta papia di e asalto arma.

Na opinion di Fiscal tin suficiente prueba cu ta J.W. y J.U.F. ta envolvi. Dia di J.W. su detencion na su cas, a haya un arma di candela. E ta envolvi den ladronicia na supermercado caminda a kibra dak y caha fuerte. El a wordo sorprendi pa Polis. A haya dos tas yena cu placa, 2 pata di cabra. A mira dos persona pero J.W. ta bisa cu e tabata su so. Fiscal a bisa cu pa cu e castigo e ta tene cuenta cu e carchi di castigo largo cu J.W. tin caminda tin casonan di ladronicia, atraco cu violencia. Fiscal a mustra cu na 2015 a condena J.W. na 18 luna di prison pa posecion di arma. Fiscal a exigi 6 aña di prison, kitando e tempo cu J.W. ta sera caba den KIA. Fiscal a bisa cu e ta reduci e demanda di daño di Superior Tobacco 50 mil florin cu ta e maximo segun ley penal. El a pidi Hues pa impone medida pa paga. El a aproba e demanda di daño di e supermercado cu ta mas cu 8500 florin.

Mayan mainta DIARIO lo ta presente den Corte y lo informa lectornan kico tur ta sosode den Corte di Husticia di Aruba.

 

- Advertisement -

DUNA COMENTARIO

Please enter your comment!
Please enter your name here