Home Gobierno Gabinete Wever-Croes dispuesto pa sigui impulsa proyecto “fast ferry” entre Islanan ABC

Gabinete Wever-Croes dispuesto pa sigui impulsa proyecto “fast ferry” entre Islanan ABC

29
0
SHARE
- Advertisement -

Minister Andin Bikker:

ORANJESTAD (AAN) – Den su tempo di Parlamentario di Partido Democracia Real, y despues den POR, mr. Andin Bikker semper a mustra e deseo di introduci un fast ferry como un medio di comunicacion mas lihe, entre e Islanan di Aruba, Curacao y Bonaire.

Den conferencia di prensa di Gobierno, Dialuna, mr. Bikker a bolbe menciona e tema, na unda el a indica cu awor den Gabinete Wever-Croes, nan tin e deseo di introduci e servicio aki.

El a duna di conoce, cu den su bishita reciente na Curacao, el a papia cu su coleganan cu den pasado tambe tabata Parlamentario, y cu conhuntamente for di 2012 bin ariba tabata tin decisionnan cu a wordo tuma den e cuadro di IPKO, esta e encuentronan Parlamentario entre Hulanda, Curacao, Sint Maarten y Aruba, cada seis luna nan ta bolbe expresa e deseo aki di traha pa introduci e servicio di fast ferry entre e Islanan ABC.

E proyecto a avanza te cu na Juli 2016, un grupo cu a wordo impulsa door di Hulanda, a conclui un rapport den cual nan a identifica kico mester tuma lugar di parti di e islanan, pa por promove pa un servicio asina wordo establece.

CONCEPTO:

Minister mr. Andin Bikker a splica kico e concepto di e proyecto aki ta encera. El a menciona cu deseablemente partiendo for di San Nicolas, yegando na e punto mas cerca di Curacao den mas of menos 1 hora y 40 minuut, e lo por hiba entre 300 pa 400 pasahero, 200 auto y 80 vehiculo di carga. E servicio aki lo sali pa 7 or di mainta yega Curacao aproximadamente pa 9’or y di eynan ta sali pa Bonaire, bin bek Curacao y atardi ta regresa Aruba. Esaki ta un servicio diario, segun ta wordo premira.

Pero pa por yega na esaki, di parti di Gobierno lo mester establece e “randvoorwaarden” (exigencianan pa un proceso specifico tuma lugar) pa por promove pa introduci un servicio asina.

E mandatario a indica cu esaki ta basa, entre otro e modelo cu ya ta funcionando pa mas cu 20 aña caba na Islas Canarias.

Esaki ta encera na prome lugar, tin un waf disponible y cierto aspectonan pa seguridad, biometry pa por controla tur persona cu ta baha u subi, na un manera hopi eficiente.

Minister Bikker a expresa cu pa tin un servicio cu ta sali pa 7’or di mainta y 6’or e ta bek na Aruba, mester ta sigur cu tur e pasonan ta wordo tuma pa den e servicio aki, e pasaheronan por baha den maximo 30 minuut.

Esey ta e tarea di gobierno awor, y Conseho di Minister for di siman pasa a dicidi pa explora na unda ta e areanan cu ta bao control di gobierno, pa nan por yega caminda cu tin un waf.

Pa cuminza identifica a tuma e decision pa Minister encarga cu Infrastructura, cuminza defini unda ta e posible areanan y a base di recomendacionnan di e grupo di trabao, cu a wordo impulsa door di Hulanda, a identifica caba posible lugarnan unda e fast ferry aki lo por bin haci intercambio, esta e punto di yegada, salida y regreso.

E dignatario a subraya cu nan ta cumpliendo cu e prome pasonan cu e acuerdo di gobernacion pa loke ta concerni e fast ferry, y su coleganan na Curacao y Parlamentarionan cu tambe ta esnan cu a apoya e iniciativa aki y awor ta den Gobierno, ta receptivo pa cu e idea aki y mescos cu Minister Bikker nan tin hopi entusiasmo pa e proyecto aki pa haci crece nos economia, y pa e area di San Nicolas lo trece un empuhe enorme. E distrito aki ta pasando den retonan enorme ya cu e tema di e refineria tin cierto retonan cune aworaki.

E dignatario a conclui bisando cu e fast ferry ta un empuhe pa Aruba su economia en general, pero muy specialmente pa e area y ciudad di San Nicolas.

- Advertisement -

DUNA COMENTARIO

Please enter your comment!
Please enter your name here