Home Gobierno Gobierno tumando pasonan hopi firme pa endereza e situacion financiero di Aruba

Gobierno tumando pasonan hopi firme pa endereza e situacion financiero di Aruba

113
0
SHARE
- Advertisement -

Prome Minister Wever-Croes cu relato:

ORANJESTAD (AAN) – Minister Presidente sra. Evelyn Wever-Croes a duna un conferencia di prensa Diahuebs mainta tocante e Plan di Crisis, pa endereza e problema di Aruba su finanzanan publica.

Un plan obviamente dirigi na medida cu nos como ciudadano tambe tin cu bay carga, unda tambe a anuncia algun compensacion pa e grupo considera como vulnerable den nos comunidad.

“Crisis Heffing” cu ta un aumento di 2.5% riba BBO-BAZV, ta parti di e plan aki y cual meta ta pa coregi e rumbo negativo, asina e mandatario a subraya, cu nos pais Aruba ta den dje.

E dignatario a cuminza expresando: “Awe ta un dia trascendental pa nos gobernacion y pa Pais Aruba. E Gobierno nobo cu apenas cuater luna, ta tumando un decision hopi firme cu mester coregi e rumbo ekivoca y negativo cu nos pais ta bayendo aden, y pa estabiliza e crisis financiero cu ya caba a costa nos parti di nos autonomia, y awor e ta bao amenaza di bay completamente fuera di control”, Premier Wever-Croes a indica.

E mandatario a señala cu ta importante pa para keto un rato y reflexiona unda Aruba ta para aworaki y con a yega t’eynan.

Prome Minister a reitera cu for di e prome dia di gobernacion su gobierno ta atendiendo cu varios crisis urgente, cu nan a hereda y cu mester a duna atencion inmediato.

“Apenas algun dia den gobernacion nos a wordo confronta cu e morto cruel di e angelitonan cu a pone tur hende realiza cu na Aruba no por papia mas di problema social sino di explosion social. Efecto di negligencia pa demasiado tempo. Tres siman despues cu nos a drenta Gobierno, nos mester a bay Parlamento pa defende un presupuesto cu tabata tin un deficit di 155 miyon florin, producto di un gobierno anterior y un aña di campaña cu gastonan enorme, tambe basa riba fondonan cu nunca a drenta”, e dignatario a subraya.

Den tres siman den gobierno, defende algo asina cu nan no tabata parti di dje, a tuma hopi curashi e dignatario a señala.

Aña nobo a habri sin un presupuesto pa 2018 pasobra e gobierno anterior no a cumpli cu entrega e presupuesto dia 1 di September 2017 manera cu mester a haci.

“Y no esey so. El a mara e gobierno nobo na un nivel di gasto y compromisonan financiero, manera ex-coordinadornan, ex-contratonan di huur cu a conduci na un debe adicional di 276 miyon florin, siendo cu mester tabata un surplus di 25 miyon florin” e dignatario a expresa.

Prome Minister a señala cu esaki ta sin papia mes di tur e consecuencianan financiero di e proyectonan PPP cu ta causa un peso adicional pa nos pais di 80 miyon anual.

“Nos a encontra Aruba cu un debe nacional di 93%. Esaki ta nifica cu di cada florin cu drenta 93 cen ta comprometi cu paga debe, compara cu ora cu e gobierno anterior a drenta cu tabata na 49%”, e dignatario a subraya.

Prome Minister a menciona cu su gobierno a haya un economia stagna y hasta cu crecemento economico negativo y desempleo grandi. Un Aruba cu a conoce corupcion riba tereno di Ontheffing cu tambe a costa cuponan di trabao adicional. Un Aruba unda ilegalidad y criminalidad tabata na orden di dia.

“E gobierno anterior a scoge, casi mi por bisa, a ignora e riesgonan profundo di e crisis cu Aruba ta aden, aparentando un realidad cu mas bien tabata un ilusion irealistico cu ta costando pueblo demasiado caro.

A goberna, comosifuera e refineria ta habri caba y tabata dunando su frutonan financiero, sin corda riba mañan. A gasta placa sin e prudencia necesario”, e dignatario a acentua.

 

 

 

 

- Advertisement -

DUNA COMENTARIO

Please enter your comment!
Please enter your name here