Home Parlamento “Hopi punto mester di aclaracion prome cu por pensa pa independiza DPS”

“Hopi punto mester di aclaracion prome cu por pensa pa independiza DPS”

45
0
SHARE
- Advertisement -

Sue-Ann Ras parlamentario pa MEP:

ORANJESTAD(AAN): Durante conferencia di prensa, parlamentario Sue-Ann Ras a papia un rato riba polemica pa independiza Dienst Publieke Scholen (DPS) proximamente. E parlamentario a enfatiza cu ‘claridad ta trece tranquilidad!’. Segun Ras, durante un reunion cu 2 diferente scol basico y 1 scol preparatorio, parlamentarionan di fraccion di MEP, AVP y POR a reuni cu 50 docente di DPS, na unda e docentenan a vocifera nan preocupacionnan riba e tema.

E intencion di e reunion tabata pa scucha tur preocupacion y inkietud di e docentenan. Aki a sali na cla, cu ta cuestion di funcionamento di e fundacionnan na Aruba, particularmente pa e falta di supuesto ‘transparencia’. Nan tambe a indica cu placa of fondo no ta yega. A mustra cu e maestronan hopi biaha no ta depende di e presupuesto di e fundacionnan y hopi biaha ta haci hopi mas riba nan mes, pa por yega na fondo necesario pa un duna un miho calidad di enseñansa.

Ras a admiti cu tin mucho mas problema den enseñansa cu e asunto di independizacion di DPS. “Si nos kier traha riba enseñansa, nos tin cu traha riba calidad. Anto calidad actualmente no lo cuminsa pa haci (DPS) un ‘stichting’”, Ras a bisa. E ta sugeri pa wak otro tipo di problema cu tin, cu ta reina entre e docentenan, pa por pone e mucha realmente central.

E punto di Ras ta cu no ta bay sostene esaki, tanten cu no tin claridad riba statutonan y tanten cu Minister no busca y haya e sosten masal (draagvlak) di tur docente concerni. “Nos no por bisa cu nos ta pro, tanten cu nos  haya tur cos preto riba blanco, y si e docentenan no ta sinti nan mes comfortable cu esey, nan ta conta cu nos sosten tambe,” e parlamentario a bisa.

A sigura cu no ta bay haci politica cu e topico aki, mirando cu e mucha mester ta central y ta conoci cu enseñansa no ta toca solamente un partido politico, pero tur partido. “Ora cu papia di enseñansa, nos tin cu pensa riba Aruba en general, y no haci politica y hunga cu sentimento di hende. Nos tin cu mira kico di berdad ta na bienestar di pais Aruba y principalmente di e muchanan”, Ras a finalisa bisando cu ta hopi cla cu hopi punto mester di aclaracion prome cu por pensa pa independiza DPS.

 

- Advertisement -

DUNA COMENTARIO

Please enter your comment!
Please enter your name here