Home Hudicial Hues a baha tur castigonan halto exigi contra tres pedofil

Hues a baha tur castigonan halto exigi contra tres pedofil

2072
0
SHARE
- Advertisement -

ORANJESTAD (AAN): Diaranzon mainta despues oranan di tratamento di e caso penal contra tres homber adulto sospecha di a tene relacion sexual cu un mucha muher di 13 aña, por a scucha Fiscal exigi castigonan cu tabata varia entre 2 y 3 aña y 6 luna di prison.

Despues cu abogadonan a trece nan defensa, Hues a dicta sentencia di biaha.

Por a ripara cu Hues, pa dos di e sospechosonan no ta haya legalmente proba cu nan a tene relacion sexual cu e mucha. Un di nan a worde declara liber mientras cu e otro a worde condena pa ta chat riba Whatsapp tocante tene relacion cu e mucha pero no cu el a tene relacion. El a worde condena na 12 luna di prison di cual 6 luna ta condicional.

E otro si a worde haya culpable pa a tene relacion sexual cu e mucha pero no cu el a viola e mucha. El a worde condena na 2 aña di prison di cual 6 luna ta condicional.

DIARIO tabata e unico medio di comunicacion presente y pesey ta publica e tratamento di e caso separa pa asina nos lectornan tin un mihor bista kico tur a sosode den Corte riba Diaranzon.

Den e articulo aki ta publica e exigencia di Fiscal y e sentencia. Promer cu Fiscal a presenta su rekisitorio, abogado di e mama di e victima a presenta e demanda di daño.

DEMANDA:

Hues a bisa cu tin demanda di 50 mil Florin na cada un sospechoso o sea 150 mil Florin total. Abogado di e mama di e victima a splica cu e daño den e famia ta hopi grandi. El a bisa cu e daño cu e mucha a sufri ainda el a keda afecta. Hues a bisa cu segun ley lo determina un daño cu lo cay pa tur paga hunto.

EXIGENCIA DI FISCAL:

Fiscal a bisa cu dia 3 November 2015, e mama di e mucha a haci denuncia di abuso sexual di su yiu muher di 13 aña. Fiscal a bisa Hues cu a dura hopi promer cu e mucha a papia cu Polis.

E mucha, door di berguenza di tur loke a pasa, a bay biba na Merca. El a bisa cu tres homber grandi a tene relacion sexual cun’e. E mucha a bisa cu el a tene relacion sexual cu G. y despues G. y M. hunto y tambe cu V.    Fiscal a mustra cu G. (di 36 aña) e tempo ey a admiti di tabatin relacion cu e mucha.  E acusado M. (di 40 aña) e tempo ey, ta desmenti. V (di 43 aña) e tempo ey, tambe ta desmenti.

Ora cu e mucha a bay biba na Merca, el a declara na FBI cu e tabatin relacion cu G.

Na 2017 el a bin Aruba y a declara atrobe. El a bisa cu su tata a orden’e pa skirbi carta kico tur a sosode. El a haci esaki tambe. Fiscal a bisa cu den casonan asina mester tin mas prueba di sosten cu solamente e declaracion di e victima. El a splica cu mester bay hopi cauteloso den investigacion. E ta haya e declaracion di e mucha confiabel.

Fiscal ta kere cu e mucha tabata gusta G. y a bisa cu e tabatin relacion voluntario cu G. Por conclui cu G., entre e periodo 1 September 2015 te 31 December 2015 a tene relacion cu e mucha. Fiscal a sigui bisa cu e parti di cu na October 2015, manera e mucha a bisa cu G. a viol’e, no tin suficiente prueba.

Pa loke ta M., e mucha tabata menciona su nomber diferente biaha. M. ta desmenti categoricamente pero G. ta bisa cu M. a tene relacion sexual cu e mucha. El a bisa cu e tabata hunto cu M. Segun G., el a bay promer y despues M. Fiscal a bisa cu e no tin duda den declaracion di G., kende a haya duel’e di loke el a haci y a conta tur cos.

Den mensahenan di Whatsapp di G. cu e mucha, e tabata menciona M. tambe. E mucha a bisa cu 4 homber a viol’e. Despues na Mei 2016 e ta menciona tres homber. Despues na 2017 e ta bisa cu G. a tene su mannan y M. a tene relacion cun’e. Fiscal ta haya cu e mucha no tabata consistente den su declaracion y no por prueba cu tabatin violacion. Fiscal ta haya cu M. ta culpabel cu entre 1 April 2015 y 30 Mei 2015 a tene relacion of mishi cu e mucha.

Pa loke ta V., tabatin hopi chat riba relacion sexual caminda V. tabata propone e mucha esaki y tambe pa horta prendanan di e mama. Fiscal a mustra cu na October 2015, V. a bisa e mucha cu el a haya dushi. E mucha a bisa cu e tabatin relacion diferente biaha cu V. den auto color geel. V. a confirma cu e tabatin auto geel. V. ta para riba cu e no tabatin relacion pero tabata chat. Fiscal a bisa cu e no ta kere V.

Na opinion di Fiscal, pa un periodo largo V. tabata chat cu e mucha riba tene relacion. Tambe na October 2015 el a instrui e mucha pa kita tur chat pa ningun hende sa. E ta haya cu V. tabata provoca e mucha pa tene relacion. Fiscal a mustra cu ley ta proteha muchanan menor di edad contra e tipo di combersacionnan aki.

Fiscal ta haya tur tres sospechoso culpable di a tene relacion sexual cu mucha menor di edad. El a remarca cu tres homber adulto ta abusa di un mucha menor di edad. Mayornan a laga nan yiu menor di edad na un vel di futbol sin sa cu e mucha lo worde abusa. Fiscal a condena totalmente con e hombernan aki a abusa di e mucha.

E ta haya cu nan solamente a pensa riba satisface nan mes sin pensa riba e consecuencianan. Na opinion di Fiscal, G. tabata e unico cu a para responsabel pa loke el a haci. El a admiti di a actua robez. El a hasta bisa di M. E otro dos ta keda desmenti. Tempo e mucha tabatin 15 aña el a huy bay Merca. E ta bibando na Merca pasobra e tin miedo di bay school na Aruba.

Pa cu e castigo Fiscal a bisa cu e ta tene cuenta cu G. y M. a keda hopi tempo den cel di Polis pasobra KIA tabata yen. Tambe cu ta promer biaha cu tur tres sospechoso ta cay sera pa un delito serio asina. Fiscal a menciona castigonan cu hendenan cu tene relacion sexual un biaha so cu mucha menor edad. E castigonan tabata varia entre 1 y 3 aña.

Fiscal a exigi pa G. 42 luna (3 aña y 6 luna) di prison, M. 24 luna (2 aña) di prison y V. 36 luna (3 aña) di prison.

Fiscal a bisa Hues pa declara e demanda no admisibel. Fiscal ta compronde e punto di bista di abogado pero ta kere cu lo ta mihor cuminsa un caso civil.

SENTENCIA:

Hues, despues di a scucha defensa di abogado mr. Lejuez cu a representa G., mr. Mohamed cu a representa V. y mr. Illes cu a representa M., a sera tratamento di e caso y a dicta sentencia.

Hues contrario cu e pensamento di Fiscal, no ta haya cu tur tres sospechoso tabatin relacion sexual cu e mucha. Hues no ta haya legalmente proba cu e sospechoso M. lo tabatin relacion sexual cu e mucha y a declara liber.

Pa loke ta e sospechoso V., Hues tampoco ta haya proba cu V. lo tabatin relacion sexual cu e mucha y a declar’e liber pa esaki. Hues ta haya V. culpable di a chat tocante relacion sexual y tabata presiona e mucha. Hues a condena V. na 12 luna di prison di cual 6 luna ta condicional cu un tempo di prueba di 2 aña.

Pa loke ta e sospechoso G., Hues ta haya legalmente proba cu G. tabatin relacion sexual diferente biaha cu e mucha. Hues no ta haya legalmente proba cu G. a viola e mucha y ta declar’e liber pa esey. Hues a condena G. na 2 aña di prison di cual 6 luna ta condicional cu un tempo di prueba di 2 aña.

Pa lesa encuanto con e caso a wordo trata den Corte, CLICK AKI.

DI CON NO TIN POTRET:
Ultimo tempo DIARIO ta tende yen reclamo di lectornan, cu e potret di e pedofilnan mes no ta aparece den e relatonan aki.  E contesta ta simple, esta cu prensa casi no ta haya chens mas pa saca nan potret!
   Antes ora cu e sospechosonan ta wordo treci na Corte di Husticia, prensa tabata saca potret cu telelens y logra capta imagen di e sospechosonan.  Pero desde cu a diseña e Corte di Husticia na Playa cu un cura grandi patras, awor no por mira ni saca potret mas di e sospechosonan ora cu nan ta baha for di e Van di KIA.  E ta cuadra cu e pensamento di Ministerio Publico cu prensa no mag di saca potret di e sospechosonan aki, ni hasta despues cu nan haya condena.  Pues un disculpa di parti DIARIO.

- Advertisement -

DUNA COMENTARIO

Please enter your comment!
Please enter your name here