Home Hudicial Hues a rechaza peticion pa laga muher sospechoso di mata muchanan liber

Hues a rechaza peticion pa laga muher sospechoso di mata muchanan liber

788
0
SHARE
- Advertisement -

ORANJESTAD (AAN): Diabierna  mainta den sala di Corte, solamente e muher R.F., sospecha di ta envolvi den e matamento di e muchanan Rishandroh y Eugene, a presenta. E sospechoso homber G.M. no kier a bay Corte. El a keda den KIA.

ABOGADO PIDI PA SCUCHA TESTIGONAN:

Abogado mr. v.d.Biezen a remarca cu e acusacion di maltrato ta papia di un periodo hopi largo. El a pidi Hues pa scucha mama di R.F., kende segun e abogado, tabata e persona cu tabata cuida e muchanan.

El a pidi tambe pa scucha e bon amiga di R.F., esta e dama D.P.

E abogado a splica cu e dama D.P., lo por bisa si el a mira cu e muchanan a worde maltrata.

PIDI PA LAGA SOSPECHOSO LIBER:

Tambe e abogado a pidi Hues pa laga e sospechoso R.F. liber pendiente di e caso. Na opinion di mr. v.d.Biezen, no tin motibo di peso pa laga R.F. keda encarcela pendiente di e caso.

REACCION DI FISCAL:

Fiscal a bisa cu e no tin nada contra pa scucha e dos testigonan. Fiscal a reacciona riba e peticion pa laga R.F. liber. Fiscal ta haya cu contrario di loke abogado ta pensa, tin motibo di peso.

Fiscal a mustra cu tin denuncia di Voogdijraad, tin dos raport di autopcia di e muchanan cu a worde mata, tin declaracion di e sospechoso G.M. cu ta bisa cu R.F. tabata sa cu e muchanan tabata worde maltrata.

Fiscal a sigui bisa cu e sospechoso R.F. mes a bisa cu e tabata sa cu G.M. tabata maltrata e muchanan.

SOSPECHOSO TA KEDA SERA:

Hues a bisa cu e ta honra e peticion pa scucha e mama y dama D.P. Pa loke ta e peticion pa laga R.F. liber, Hues ta haya cu tin suficiente indicacion cu R.F. a haci e delitonan aki.

Hues a bisa cu ta ora di trata e caso lo saca afor si R.F. ta culpable of no. Hues a rechaza e peticion pa laga R.F. liber.

Hues a bisa cu R.F. ta keda sera den KIA te dia 15 Juni 2018 ora cu ta bay trata e caso.

 

- Advertisement -

DUNA COMENTARIO

Please enter your comment!
Please enter your name here