Home Gobierno Lo construi un facilidad deportivo na Little League Ballpark Dakota

Lo construi un facilidad deportivo na Little League Ballpark Dakota

57
0
SHARE
- Advertisement -

Minister di Deporte a anuncia proyecto

ORANJESTAD (AAN): Durante un bishita na Little League Ballpark, cu pa hopi aña largo a wordo uza door di muchanan deportista di Aruba, Minister di Deporte Dangui Oduber a anuncia un proyecto cu ta encera renobacion di e facilidad aki.

E mandatario a recorda cu no solamente e tereno aki tabata wordo uza pa hopi mucha, pero tambe tabata sede di hopi torneo Latinoamericano, pero cu transcurso di aña a laga bay perdi.

“Ora bo ta bay campaña bo mester ta sincero cu pueblo y splica nan kico ta bo plannan y vision, dado caso cu pueblo dunabo e sosten pa ehecuta e vision aki. Nos a hiba un campaña cu nos ta bay inverti mas placa den deporte, mantene e facilidadnan existente y construi algun facilidad deportivo nobo. Un parti di e plan ta pa rebiba e añanan di gloria cu tabatin riba e ex tereno di di Little League Ballpark.” E mandatario a sigui splica cu e intencion ta pa construi un facilidad completamente nobo, cu un stadion state of the art cu ta cumpli cu tur e exigencianan internacional pa organisa atrobe torneonan internacional.

E intencion ta pa termina di hinca e plan den otro pa cuminsa cu e construccion den 2018 mes, cumpliendo asina cu e promesa, segun e mandatario, cu el a haci durante su campaña. E habitantenan di e bario por bay ta contento pasobra e stadion lo bira esun di mas moderno na Aruba y cu lo wordo combina cu un parke recreacional, cu henter famia por haci uzo di dje. “Nos tin e plannan riba papel caba, awo ta cuestion di busca financiamento pa e proyecto wordo ehecuta,” Minister Dangui Oduber a bisa.

Oduber a agrega cu el a manda un carta caba pa Lotto pa Deporte pero no a haya contesta ainda. Sinembargo recientemente el a topa cu sr. Distefano Wernet na apertura di Little League y a papia cune riba e proyecto aki. E reaccion tabata positivo y cu a wordo bisa cu Lotto ta mas cu dispuesto pa duna su aporte pa realisa e plan aki na bienestar di deporte.

E noticia aki, el a bisa, ta uno sumamente positivo pa deporte, cu ta encera un facilidad sumamente moderno cu por wordo bon uza door di deportistanan y bario di Dakota lo haya un impulso cu e proyecto. No solamente Dakota, pero henter Aruba y principalmente e deportistanan lo beneficia di dje. Naturalmente e facilidad lo haya un nomber, pero no ta algo cu e mandatario so lo bay tuma. Tin hopi hende cu a dedica nan mes na deporte y Little League. E lo wordo discuti den Conseho di Minister, unda cu e decision lo wordo tuma.

E plannan inicial ta mustra cu e proyecto lo por costa rond di 3 miyon florin. Pero, el a enfatisa, esaki ta basa riba un “draft”. Awor ta bay traha riba e plannan real y despues di esey por bisa cu siguransa cual ta e fondonan necesario. “Mi ta spera cu Lotto ta cumpli cu su palabracion. Sino, tin mas opcion, y a papia cu Canadian Bank unda cu a bisa cu e prioridad di Gobierno ta deporte. Si venta crece, e contribucion na deporte tambe mester crece. Pues tin alternativa si Lotto no contribui cu mas fondo na deporte.”

 

E combersacion aki a tuma luga durante un presentacion cu Canadian Bank a haci na Gobierno di Aruba. Conseho di Minister mester bay repasa e presentacion ainda, durante cual nan a presenta kico ta na benta, kico ta nan contribucion na deporte, etc. Gobierno lo mester haci un cita, despues di analisa e informacionnan, dpa topa atrobe cu Canadian Bank. Pero e mandatario ta kere cu tin mas espacio pa nan contribui mas cu deporte, y mas facilidad por drecha of construi. E intencion ta pa pone yerba artificial na mayoria di e facilidadnan.

E apertura, cu kisas lo ta den 2019, mester bira algo grandi.

 

 

- Advertisement -

DUNA COMENTARIO

Please enter your comment!
Please enter your name here