Home Gobierno ‘Luna di Maart ta decreta como luna di Himno y Bandera’

‘Luna di Maart ta decreta como luna di Himno y Bandera’

23
0
SHARE
- Advertisement -

Minister di Cultura Xiomara Maduro

ORANJESTAD (AAN): Minister di Finanza, Asuntonan Economico y Cultura, Sra. drs. Xiomara Maduro a anuncia durante un conferencia di prensa cu luna di Maart ta un celebracion nacional na nos pais, den ocasion di nos Himno y Bandera. Nan a proclama luna di Maart, sea como Arubiano y tur esnan cu ta biba na Aruba y tin Aruba den nan curazon, pa asina rindi honor na loke mester trece union den nos tur, loke ta identifica nos como pais y den caso aki nos Himno y nos Bandera.

Esaki ta algo importante, pasobra den maneho cu gobierno kier trece dilanti, nan kier fomenta union cu ta necesario den un pais, pero como pais tambe tin nan simbolonan, cu ta mustra bo cada biaha cu bo wak bo bandera, ora bo scucha bo himno na cualkier parti di mundo, mester duna bo e orguyo, pero cu mesun orguyo aki y cu respet mester trata e simbolonan aki.

Den cuadro di esaki, gobierno kier aporta na educacion, sigur di muchanan chikito te cu hobennan, pa asina di chikito caba inculca den nan e importancia di cultura, gobierno a traha foyetonan di informacion riba simbolonan importante di Aruba. Minister Maduro a presenta e foyeto di e escudo, cu el a indica cu den un manera hopi simpel ta splica pa esnan mas chikito, pero hopi relevante pa esnan mas grandi tambe.

Nan ta bay imprimi foyetonan di informacion relaciona cu bandera di Aruba, y himno, asina tur hende por educa nan mes, educa nos muchanan pa importancia di e simbolonan aki, cu informacionnan corecto. E informacionnan ta na beneficio di pueblo, pero tambe na turistanan y asina nos por transmiti e orguyo di biba na Aruba y di ta un Arubiano.

Minister a enfatiza pa corda cu Arubiano ta esnan cu ta biba akinan y cu tin Aruba den nan curazon!

Cultura ta algo cu nos mester biba, e celebracion den luna di Maart ta nos herencia cultural, y nan a prepara un agenda pa Comision di Celebracion di Dia Nacional, cu ta cuminsa den fin di siman aki, 2-3-4 di Maart cu actividad di ‘Un Canto pa Aruba su Himno y Bandera’, caminda mucha y hobennan lo participa pa demostra cu for di chikito caba, cuanto amor nan tin pa nan pais y con nan ta expresa esaki den festival di canto. E festival lo tuma lugar na Plaza Libertador G.F. Betico Croes.

‘Un Canto pa Aruba su Himno y Bandera’ pa adultonan lo tuma lugar dia 8 y 9 di Maart pre-final y e gran final lo ta diadomingo dia 11 di Maart, tambe na Plaza Libertador G.F. Betico Croes.

Un explosion cultural, na unda hobennan lo trece dilanti nan expresionnan relaciona cu Himno y Bandera riba 10 di Maart.
Segun Minister, kico ta mas bunita como persona dedica un poema na bo patria ‘Aruba Dushi Tera’, pesey actividad ‘Poeta di Patria’ lo tuma lugar dia 14 di Maart na Fort Zoutman di 6’or pa 10’or di anochi, caminda talentonan local lo dedica nan poema na nos pais.

No por keda sin menciona e ‘Manifestacion Cultural’ cu lo tuma lugar dia 17 di Maart na Plaza Libertador G.F. Betico Croes. Y actonan protocolario y defile di gruponan uniforma riba 18 di Maart, dia cu Aruba ta celebra oficialmente dia di Himno y Bandera.

Minister a elogia trabaonan duro di Departamento di Cultura pa trece un agenda asina amplio pa celebra dia di Himno y Bandera.

Minister ta invita pueblo pa participa den anochinan cultural y asina haya mas amor pa bo patria, como tambe hisa boso bandera cu orguyo, duna respet y siña nos yiunan di chikito pa brinda honor na bandera y himno di Aruba.

 

 

 

- Advertisement -

DUNA COMENTARIO

Please enter your comment!
Please enter your name here