Home Parlamento Marlon Sneek ta kere cu Evelyn y Gobierno a pone Parlamento practicamente...

Marlon Sneek ta kere cu Evelyn y Gobierno a pone Parlamento practicamente ‘buitenspel’

11
0
SHARE
- Advertisement -

Relaciona cu presupuesto…

ORANJESTAD (AAN): Parlamento di Aruba a sufri un sla formal desde cu Gabinete Wever Croes a dicidi di pone trahamento di presupuesto den man di CAft, cu riba su mes ta algo increibel y muestra di total incapacidad.

Lider di fraccion di AVP, sr Marlon Sneek ta mustra cu practicamente Prome Minister Wever Croes y Minister di Finansa Ruiz-Maduro, a entrega autonomia financiero na Hulanda, algo cu nan mes a acusa gobierno di AVP di a haci.

Sr Sneek a mustra riba e declaracion di Prome Minister Evelyne Wever Croes, kende a confirma na medionan di comunicacion, cu su gobierno tin un asina “plan di rescate” hinca den otro cu ta hopi avansa pero no cla, y pa sorpresa di tur hende, Premier ta informa cu e plan aki a bay pa CAft pa haya nan pensamento y conseho riba esaki.

“Ta algo historico loke ta pasando akinan, sigur ora nos ripara con gobierno ta pone literalmente Parlamento un banda, cu aprobacion di e Parlamentarionan cu  ta sostene gobierno, y ta manda nan plan di presupuesto pa CAft.

Den un proceso normal y manera Constitucion ta prescribi, concepto di un presupuesto tin cu yega Parlamento, cu ta e autoridad pa controla y haci pregunta riba esaki y hasta haci recomendacionnan pa cambio, prome cu e worde trata den Parlamento como ley.

Prome Minister Wever Croes ta bira e prome lider di un gobierno di pais Aruba, cu a dicidi di pone Constitucion un banda, pone Parlamento un banda y duna practicamente tur autoridad na CAft, cu en realidad ta un comision cu mester supervisa e presupuesto DESPUES cu Parlamento aproba esaki, y mira si a cumpli cu tur norma stipula pa cu esaki,” Parlamentario Marlon Sneek ta mustra.

E lider di fraccion di AVP a sigui mustra cu aki un biaha mas ta resalta e incapacidad y falta di conocemento di un gobierno di coalicion cu simplemente no tabata prepara pa goberna e pais, pero a hinca un combinacion den otro pa asina nan por saca probecha pa nan mes, famia y amigonan.

“Ta tristo ora cu realisa e decision tuma pa Prome Minister Wever Croes, kende despues di a forma su gobierno, a declara cu porfin Parlamento lo haya su balor back, cu porfin Parlamento lo worde respeta pa gobierno pero awor ta bira converti Parlamento den algo cu simplemente ta un participante sin bos den presupuesto di e pais.

Ta mas cu claro cu na momento CAft defini con e presupuesto tin cu bira, cu un serie di medida cu nan tin hopi aña ta anhelando pa introduci y awor a haya un gobierno cu ta dispuesto pa tuma medida contra pueblo, Parlamento su rol den tratamento di e presupuesto aki ya simplemente no tin balor y esaki por bira un reunion conoci como ‘hammerstuk,’ ya cu no tin nada di discuti, nada di analisa ya cu ta CAft su presupuesto y e lo aproba esaki na final di cuenta,” Parlamentario Marlon Sneek a declara.

- Advertisement -

DUNA COMENTARIO

Please enter your comment!
Please enter your name here