Home Gobierno Minister Ruiz-Maduro ta reitera con, ken y pakico a elimina “San...

Minister Ruiz-Maduro ta reitera con, ken y pakico a elimina “San Nicolas Regimen”

314
0
SHARE
- Advertisement -

ORANJESTAD(AAN) – Minister di Finanzas  Xiomara Ruiz-Maduro, a elabora den conferencia di prensa di Gobierno, Diahuebs mainta, tocante e tema: “Regimen San Nicolas”.

Minister Ruiz-Maduro a cuminza expresando cu gobierno a trece e tema aki dilanti, pero por a ripara cu Oposicion a purba di bruha tera pa asina crea un constelacion di informacionnan cu no ta cuadra cu berdad.

E mandatario a menciona cu na 2013 a bin cu un incentivo cu a wordo crea pa bin cu un maneho (no un ley) pa purba crea actividadnan economico na San Nicolas.

Asina a bin cu un regimen fiscal special unda e companianan a wordo encurasha pa asina e comerciantenan bay establece nan mes na San Nicolas pa trece cune e trahadornan, y e actividad economico cu San Nicolas tin mester.

Den e cuadro aki, e dignatario a subraya, enberdad tin companianan cu a solicita cu ta un total di 19.

Di e companianan aki, e mandatario tin entendi cu tres ta esnan cu ta cumpli cu e rekisitonan cu tin.

Loke ta pasa ta cu Aruba, perteneciendo na Reino Hulandes, tambe ta cay den e parti di supervision di Union Europeo, cu nan ta yama “EEU Gedraags Code Groep” cu ta un grupo den cual Hulanda ta raporta y Aruba tambe, via Hulanda, mester haci esey, y nan a haci pregunta na nos pais riba dos regimen fiscal cu nos ta brindando na nos pais. Y un di nan ta “San Nicolas Regimen”.

Den e documentacionnan cu gobierno a haya tin un unda ta bisa cu dia 2 di Juni 2017, a pidi ex-minister Bermudez pa manda mas informacion tocante e regimen aki y cu dia 20 di September a manda esaki.

E mandatario a splica cu e informacion aki a wordo scrutina y despues cu expertonan a papia cu otro, a bin e conseho den cual nan a bisa cu no por a wanta e regimen manera cu e ta pasobra e ta trece e peligro di surgi un competencia inhusto cu mester tin entre e paisnan, pa loke ta e regimen fiscal y cu nan por wordo perhudica door di e “San Nicolas Regimen”, manera cu e ta.

Aki nan ta papia di “ring fencing” unda cu simplemente bisa e companianan por draai rond cu e placa di belasting, pa nan keda e ora ey sin pague. Pues e ta un incentivo cu ta perhudica e sistema fiscal.

Den cuadro di esaki, e dignatario ta subraya, ex-Minister Bermudez a wordo informa y el a haya consehonan di locual ta departamentonan di impuesto y un grupo di coordinador di Departamento Fiscal di Aruba, a aconseha e ex-minister pa kita e incentivo ey cu ta un regimen cu nunca a bay den ley tampoco.

E ex-minister di finanzas a bay di acuerdo e ora ey pa asina e por a elimina e San Nicolas Regimen aki.

Dia 7 di November, na momento cu Gabinete Wever-Croes a huramenta, e mesun “EU Gedraags Code Groep” a acerca gobierno di Aruba y a bise cu e tin mester di e compromiso di Pais Aruba, di e carta di Minister Bermudez, pa asina ey por haya evita pa Aruba subi riba e lista preto.

E mandatario a subraya cu ora un pais ta subi un lista preto pa motibonan fiscal ta casi imposible pa baha di dje. P’esey semper ta wordo recomenda pa evita pa esaki sosode cueste loke cueste.

Pesey for di prome dia cu e, como minister nobo di Finanzas, a yega trabao dia 27 di November el a reuni cu e Buro di coordinacion fiscal y el a wordo informa cu tin un problema pasobra sr. Bermudez no a manda e carta y nan mester e compromiso aki riba papel.

Pesey dia 28 di November e carta concerni a sali debidamente, y hunto cune despues, dia 1 di Februari a sali publica den medionan di comunicacion cu maneho di e incentivo menciona a dicidi di hale aden y tur compania cu tine, lo keda cune te 31 December 2020.

Den un e-mail di dia 31 di October 2017 cu Minister Bermudez a manda na e Buro di Fiscale Zaken y director di Impuesto, unda e ta bisa nan cu e ta bay di acuerdo pa elimina e regimen special pa San Nicolas.

Minister di Finanzas a cuestiona Minister Mike de Meza, cu como ex-titular di e cartera aki mester tabata sa mihor y awor manera mucha chikito kier bruha tera.

El a subraya cu ningun momento tabata e gobierno aki a haci esaki pa mala Fe.

 

 

- Advertisement -

DUNA COMENTARIO

Please enter your comment!
Please enter your name here