Parlamentario di fraccion di POR sr. Howell:
ORANJESTAD (AAN) – Den conferencia di prensa di fraccion di POR, Dialuna mainta, Parlamentario Allan Howell, tocante e caso di Keuringslokaal nobo na Barcadera, pa cual mester paga un huur mas halto pa un edificio mas small, a expresa cu e ta saca e informacion aki afo pa pueblo mes saca su som y wak si pueblo ta haya cu esaki ta cosnan normal.
E kier pa pueblo tambe mira pakico nos ta den e situacion cu nos ta awendia, apart di tur otro informacion cu su coleganan di coalicion a trece dilanti caba, y e motibo pa cual algun ta na Hulanda pa scucha y mira kico ta e posibilidadnan pa Aruba, den un situacion asina aki.
Esaki, el a subraya ta e mal maneho di “legal gangster style” cu gobierno anterior a hiba. El a sigui splica cu e contrato anterior a wordo traha pa dos aña pero sr. Sevinger a percura pa mara e contrato nobo na cinco aña. “Con mas bo tin gana di desgracia bo pueblo?” el a expresa. E contrato aki a cuminza dia 1 di Januari 2018.
Tabata tin documento pa spierta e ex-minister pa no haci e cosnan aki, pasobra di mes caba no tin placa. “Pero e ex-minister aki no a worry, no a preocupa cu den e oranan aki pueblo ta bay sangra muri of mester bin medida”, el a indica. Pero e minister kier logra su meta pa faborece, e ta kere cu Aruba Vias NV. El a subraya cu no tin otro cos cu e por pensa ni manera pa e splica esaki.
E parlamentario a splica tambe kico por pasa aworaki. Of cu Minister di Infrastructura actual sr. Otmar Oduber busca tur manera pa sinta na mesa pa cambia e contrato aki, y negocia un nobo loke ta bira hopi dificil, of e por purba bay Corte pa termina e contrato aki, locual tampoco kizas ta un proceso facil pasobra tin un contrato riba mesa caba, of Parlamento por manda yama gobierno pa duna un splicacion riba esaki y conhuntamente cu Parlamento sinta wak ki medida hunto ta bay tuma encuanto e caso aki.
