Home Cultura Monumenten Bureau a finaliza investiga casnan cu diseño floria riba nan

Monumenten Bureau a finaliza investiga casnan cu diseño floria riba nan

32
0
SHARE
- Advertisement -

ORANJESTAD(AAN): Un di e proyectonan cu Monumenten Bureau tin bou di su encarga ta loke den boca di pueblo ta worde yama Casnan Floria.

E departamento a laga haci un investigacion di e tema aki cu a finalisa na december ultimo.

E stagiaire a compila e datonan den un relato cu e mester a entrega na su school y di cual Oficina di Monumento a haya un copia di esaki. “Mi tin cu bisa cu mi ta hopi contento con e investigacion aki a worde haci y pami tabata un honor di tabata mentor di e hoben aki su stage y traspaso e conocemento di mi mas cu 29 aña di trabao den Gobierno,” Yvonne Webb, directora di Oficina di Monumento a duna di conoce.

Den e investigacion di Casnan floria, el a splica, a haya hopi ayudo di estudionan cu a worde haci prome, a papia cu Ito Tromp, señora Olinda Rasmijn, BNA, Departamento Arkeologico, Archivo Historico, Luc Alofs, etc. Pues a coy e investigacion for di diferente angulo pa haya mas tanto informacion posibel. Ora a cuminsa tabatin diferente manera di pensa di e estilo di diseño riba e edificionan.

Tabata yama nan Hex Signs, cu ta un forma di diseño riba edificio na Merca. Pero ora cu a haci un estudio mas profundo riba e simbolonan no por a conclui cu e diseño ta bini di Merca. Tambe ta papia cu tabata trata di inspiracionnan di Hulanda, Colombia y Venezuela.

Por a saca afo arkitectura di diferente pais. Hasta tabatin e creencia cu pa cada yiu di e famia cu nace, ta pinta un simbolo, pero a conclui finalmente cu esaki no ta berdad. A haci investigacion riba e construccion y no tin linea di construccion cu ta duna e indicacion di e pensamento ey. E simbolonan no a worde pinta un aña y despues otro aña a pone uno nobo. Otronan ta bisa cu e simbolonan a bindi Indiannan. Pero investigacion ta mustra cu tempo cu e simbolonan a bini, e Indiannan a bay caba for di Aruba.

Pesey e conclusion final a bira cu e simbolonan aki a worde poni como decoracion, pero si el a worde inspira door di creencianan cu Indjannan a pasa pa nos generacionnan, y cu ta aparece den e elementonan pinta. Tin formanan di strea, di naturalesa, di morocho, etc. E rapport final lo worde entrega na Minister di Cultura y despues lo worde publica riba e Facebook, pa keda pa e siguiente generacion.

Banda di e estudio di skirbi, a midi tur e elementonan riba e edificionan aki. Ta registrando e elementonan aki te cu awor ta 63 tipo cu a worde señala te awor.

E proyecto aki tabatin un duracion di 3 luna door di e stagiaire peor ta algo cu nan tin basta aña trahando riba dje. Pa e rapport cu e studiante a traha, el a haya un puntuacion di 9.

Ta importante, señora Webb a bisa, cu tin tur e informacion aki documento. Asina por ehempel a saca cu e prome metslanan, di decora casnan, tabata di fam Rasmijn.

 

- Advertisement -

DUNA COMENTARIO

Please enter your comment!
Please enter your name here