Home Parlamento Net awor na 18 di Maart ata Prome Minister ta informa cu...

Net awor na 18 di Maart ata Prome Minister ta informa cu lo entrega autonomia financiero na Hulanda

58
0
SHARE
- Advertisement -

Michael Lampe di AVP:

ORANJESTAD (AAN): Celebracion di Dia di Himno y Bandera e aña aki, lo haya un toke diferente ya cu e incapacidad di gabinete Wever Croes, ta pone e pais na drempel di ricibi un ‘aanwijzing’ conoci tambe como KB,  miembro di fraccion di AVP, sr Michael Lampe ta mustra.

“Den ultimo dianan nos por a tuma nota cu principalmente Prome Minister Wever Croes a bin informa pueblo, cu su gobierno lo no bay cumpli cu normanan stipula pa presupuesto 2018 y consecuentemente esaki lo bay nifica cu Aruba lo perde su autonomia financiero sin mas.

Aki nos tin cu señala cu ta algo in usual pero na mes momento historico, cu net e partido MEP cu Betico Croes a funda pa logra autonomia di nos pais, awor bou guia di Evelyne Wever Croes, ta bay entrega autonomia financiero di nos pais na Hulanda.

Mientras cu ya caba Premier Wever Croes ta punta dede riba gabinete Mike Eman, tin cu bisa cu  durante e periodo di ocho aña di gobernacion di AVP, nunca nos pais a yega na rand di un crisis cu su autonomia manera ta e caso na e momentonan aki.

Tur esaki pa motibo cu gobierno di coalicion no tin e capacidad pa atende cu asuntonan general di nos pais, y ta acudi na e unico vision cu a marca existencia di partido MEP den gobernacion di nos pais den ultimo decada y mei, cu ta medida contra pueblo.

Esaki a sosode na 2001, caminda fuera di a  vries varios beneficio di trahadonan publico, gobierno di MEP a impone un serie di medida caminda esun di mas pisa tabata e famoso BBO di 3% cu  awor ta bay bira 6% den algun luna.

Loke ta mas remarcabel di henter e  desaroyonan aki ta, cu partido MEP a campaña den pueblo, pintando un otro scenario, sigurando pueblo cu nan tin solucion pa tur problema, cu prijs di awa y coriente lo bira menos, prijs di gasolin lo  baha cu nan lo drecha e situacion financiero di nos pais den 30 dia.

Sinembargo te cu awor cu e gobierno di coalicion aki ta na mando, pueblo no a ricibi ni un solo noticia  positivo despues di algo mas di 100 dia den gobernacion, caminda e unico grupo cu a ricibi sosten financiero, ta e grupo di coordinado y amigonan cu a ser tuma den servicio na diferente departamento di gobierno.

Declaracion di Prome Minister Wever Croes e siman aki no ta duna mucho speranza cu su gobierno lo por haci e ehercicionan necesario di corta gasto na unda cu por den tur ministerio, pa asina tog logra na cumpli cu normanan stipula pa presupuesto 2018, cu ta un balanced budget di 0.5% plus,” Parlamentario Michael Lampe ta mustra.

 

- Advertisement -

DUNA COMENTARIO

Please enter your comment!
Please enter your name here