Home Hudicial Ocho aña di prison pa homber cu a tira riba otro

Ocho aña di prison pa homber cu a tira riba otro

91
0
SHARE
????????????????????????????????????
- Advertisement -

Hues ta haya e acusado culpable di intento di mata

ORANJESTAD (AAN): E homber J.H., acusa di intento mata e homber A. den vecindario di Madiki, a presenta den Corte pa scucha su sentencia. Fiscal a exigi 10 aña di prison. Hues ta haya J.H. culpable y a conden’e na 8 aña di prison.

INTENTO MATA:

Tres siman pasa Hues di Corte den Promer Instancia a trata e caso. E acusacionnan cu Fiscal a presenta contra J.H. ta cu riba e mesun 14 Februari 2017, J.H. riba un scooter a bay na un cas den vecindario di Madiki y a tira riba un auto den cual tabata e homber A. cu su amiga P. Esaki a sosode den careda di 11.45 di anochi. Fiscal ta haya cu J.H. a purba mata e homber A. y su amiga P. Fiscal tambe ta acusa J.H. di tabatin un arma ilegal. Ademas Fiscal ta acusa J.H. cu na April 2017 e tabatin 11 gram di marihuana y 11.6 gram di cocaine.

SOSPECHOSO TA NENGA:

J.H. a cuminsa na bisa Hues cu hopi hende ta papia cosnan cu no ta berdad. Hues a bisa cu e kier sa kico realmente a pasa. Hues a mustra cu segun e raport di Polis, tur cos a cuminsa cu e tiramento cu a sosode entre e scooter y auto. Polis a bay den Venezuelastraat y a haya e scooter cora riba caminda y dos huls banda di dje. No mucho leu, a haya un peña cu algun bala.

Polis a papia cu algun hende tocante e tiramento. Na dado momento un auto a para y un dama P. a bay cerca Polis y bisa cu hende cu scooter a pasa na cas y tira riba nan cu tabata den auto. Polis a haya sa cu un hende a bay coy un pistol for di riba caminda despues di e accidente. Despues Polis a haya informacion cu e persona envolvi den e accidente riba scooter lo ta un tal “steroid” y cu e a resulta herida di tiro.

J.H. a bisa Hues cu e no yama “steroid”. Hues a sigui bisa cu Polis a bay busca J.H. pasobra un dama a yama bisa cu J.H. tabata esun riba e brommer y a tira riba A. y P. Despues A. a sigui su tras y A. a tir’e y herid’e. Polis a bay cas di J.H. y segun e mama di J.H. enberdad el a worde tira. J.H. a bisa Hues cu el a worde tira na December 2016 y no Februari 2017.

MENSAHENAN DI WHATSAPP:

Hues a sigui bisa cu A.F. despues a worde deteni y den mensahenan di whatsapp riba su cel, el a bisa cu “steroid” a worde tira. Esaki tabata na Februari 2018 y no December 2017. Hues a mustra cu hasta A.F. a pone un potret di J.H. Hues a puntra J.H., di con A.F. cu ta su amigo ta bay pone algo asina.

Segun J.H. e no a worde tira na Februari 2017 y nan no sa cu el a worde tira. Hues a sigui bisa cu A.F. tambe a pone cu J.H. a bay riba scooter tira riba e auto na e cas y nan a bay su tras y J.H. a dal contra un auto y A. a tir’e. Tambe A.F. a bisa cu J.H. no kier a bay hospital.

Hues a puntra J.H. si e tabata core e scooter. J.H. a bisa cu e no tabata core e scooter. E helm el a yega di bisti, pero no ta corda na unda. E helm aki tabata banda di e scooter di accidente. Hues a remarca cu ta straño cu net despues di e tiramento, A.F. ta manda e mensahenan y e tabata rabia pasobra a tira J.H.

Hues a bisa J.H. cu lo ta mihor pa papia e berdad. J.H. a bisa cu e ta mantene su declaracion haci na Polis.

EXIGENCIA DI FISCAL

Fiscal a mustra cu chofer di e auto den cual e scooter a dal, a bisa cu despues di e accidente e motiociclista a lanta y core drenta mondi y un auto cu tabata sigui su tras a los tres tiro.

Segun Fiscal, investigacion ta mustra cu a tira riba e auto Toyota y tabatin diferente impacto di bala. A haya huls di balanan riba caya. Tambe a haya balanan y un peña. Investigacion ta mustra cu aunke cu e balanan tabata di diferente caliber, nan por worde tira cu e mesun arma.

Instituto Forence di Hulanda (NFI) a haci investigacion caminda e homber B.A. a worde haya culpable pa intento di mata J.H. y a worde condena na 7 aña di prison. E a tira riba e scooter. Fiscal a mustra cu Recherche a papia cu mama di J.H. kende a bisa cu su yiu a worde tira pero e yiu no kier bay hospital. Riba cel di A.F. a haya mensahenan cu ta mustra cu “steroid” a worde tira. El a hasta manda potret. Tambe A.F. a mustra cu ta “steroid” a bay tira riba A. y P. A surgi un persecusion y A. a tira J.H. y J.H. no kier bay hospital.

Na opinion di Fiscal, a base di investigacion di NFI y declaracion di testigonan por conclui cu ta J.H. a tira riba e auto y despues a worde tira. Fiscal ta considera esaki un intento di asesinato. El a mustra cu e castigo maximo pa esaki ta 20 aña. Fiscal ta haya cu J.H.(22) a haci su mes culpable di un caso hopi serio y den Corte e no kier responsabiliza su mes siendo cu tin diferente prueba contra dje. El a exigi 10 aña di prison, kitando e tempo cu J.H. ta sera den KIA.

SENTENCIA:

Hues a bisa cu e ta haya legalmente proba cu J.H. riba 14 Februari 2017, ta culpable di intento asesinato y posecion di arma.

Fiscal a exigi 10 aña di prison. Hues a mustra cu tin raport di NFI muestra DNA, declaracion di testigonan, mensahenan di whatsapp. Hues a condena J.H. na 8 aña di prison kitando e tempo cu e ta sera caba den KIA.

 

- Advertisement -

DUNA COMENTARIO

Please enter your comment!
Please enter your name here