Home Hudicial Pa motibo di un procesverbaal un acusado a busca arma pa defende...

Pa motibo di un procesverbaal un acusado a busca arma pa defende su mes

53
0
SHARE
????????????????????????????????????
- Advertisement -

Door cu Polis a menciona su nomber den caso grandi di asalto

ORANJESTAD (AAN): Diahuebs mainta tabatin un caso penal caminda e homber Arubiano N.B. di 23 aña di edad, a bisa Hues cu e tabatin un arma di candela, pasobra Recherche a menciona su nomber den un investigacion grandi di un caso di asalto arma y awor esnan sera ta buske.

POSESION DI ARMA:

Fiscal a mustra cu e acusacion contra N.B. ta cu dia 30 September 2017 e tabatin un arma di candela cu bala.

Hues a bisa cu Polis a haya notificacion cu na un snack na Hooiberg un trahador tin un arma cun’e den un tas. Polis a bay y haya un tas preto cu un arma aden. A haya un zorgpas di AZV cu potret di N.B. E ora ey a detene N.B. E arma tabatin un peña cu 4 bala.

N.B. a splica Hues cu e tabata cana arma pasobra den e caso di asalto arma na La Estrella, Recherche, apesar cu el a pidi pa no haci esey y a bay di acuerdo, a pone su nomber den procesverbaal como persona cu a duna informacion. Na KIA esnan encarcela pa e caso tin’e na bista. E ta sinti su bida na peliger.

N.B. a pidi disculpa pa loke el a haci. El a bisa Hues cu e arma tabata riba lock y e peña cu bala tabata apart di e arma den e tas.

Hues a remarca cu N.B. a caba sali di KIA y tabata traha dos trabao. N.B. a admiti di a haci un cos malo pero no lo haci’e mas. Hues a remarca cu esaki ta un cos serio.

FISCAL:

Fiscal ta haya legalmente proba cu N.B. tabatin un arma di candela cu bala. El a mustra cu Polis a bay e lugar pasobra y a haya yamada cu un hende lo tin un arma cun’e. Polis a haya e tas cu un arma y bala. N.B. a admiti cu e arma ta di dje. Fiscal a exigi 15 luna pa cana cu arma. El a mustra cu anterior N.B. a worde condena pa asalto, pero e no ta bay tene cuenta cu esey den e castigo.

DEFENSA:

Abogado mr. Faarup a bisa Hues cu N.B. a admiti cu e tabatin arma. El a duna informacion na Polis tocante caso La Estrella. Ora e sospechosonan a yega KIA, nan mustra dede riba dje. A resulta cu apesar cu tabatin palabracion cu e lo keda anonimo, Recherche a pone su nomber como esun cu a duna informacion. Esey a hink’e den problema.

Na opinion di e abogado, N.B. tabata fout di cana cu arma pero e no ta relaciona cu gang. Mirando e forma con N.B. tabatin e arma warda na trabao, e abogado ta haya cu e ta bay mas pa posesion pasivo pasobra e tabatin arma poni un banda den e snack y no tabata cla pa tira. El a pidi Hues pa duna un castigo mas abou cu exigencia di Fiscal.

SENTENCIA:

Hues a sera tratamento di e caso y a dicta sentencia di biaha. Hues ta haya proba cu N.B. tabatin un arma di candela cu bala. Pa cu e castigo, Hues a tene cuenta cu ta promer biaha cu N.B. ta cay sera pa posesion di arma di candela.

El a condena N.B. na 15 luna di prison di cual 5 luna ta condicional cu un tempo di prueba di 3 aña. Hues a duna orden pa destrui e arma y por debolbe e tas preto na N.B.

 

- Advertisement -

DUNA COMENTARIO

Please enter your comment!
Please enter your name here