Home Parlamento POR lo haci pregunta na Minister pa aclarea maneho di infrastructura di...

POR lo haci pregunta na Minister pa aclarea maneho di infrastructura di ex-minister Sevinger

135
0
SHARE
- Advertisement -

Parlamentario drs. Lopez-Tromp:

ORANJESTAD (AAN) – Siguiendo cu e declaracion di e lider di fraccion di POR, drs. Marisol Lopez-Tromp tocante e maneho di infrastructura y con e procedure di otorgamento di tereno pa desaroyo di proyectonan ta, e dama a comenta kico a bin haya ora cu sr. Sevinger, a haya e cartera di Infrastructura bao gobernacion di AVP.

Parlamentario Lopez-Tromp a señala cu tin hende cu no a ni cumpli cu e condicionnan pero toch e ex-mandatario a firma pa tereno y aworaki a bin detecta un cantidad di situacion, na unda e ex-gobernante a haci mal uso di e articulo concerni caminda cu na lugar di laga e inversionista hinca sumanan directo pa instancianan educativo of social den nos comunidad, of duna ayudo den forma di natura, kiermen no placa, a laga nan bay via su persona como minister y den e caso aki el a apunta ta ken ta bay haya placa, ma no producto.

Aki tin diferente aspecto cu no ta cuadra cu ley ni bon gobernacion ni e pensamento riba cual e articulo a wordo hinca den e acuerdo.

E no ta algo pa e minister hinca su man of su dede unda cu no mester ta. Pero minister Sevinger mes a dicidi den cual instancia of lugar, cual cuenta di banco mester deposita e placa. Esaki ta algo completamente diferente, drs. Lopez-Tromp a señala.

Parlamentario Lopez-Tromp ta puntra cu cual autoridad e ex-dignatario a dicidi cu e tin cu apunta ken ta bay pe y cuanto placa?  El a agrega cu e procedure ta cu ora di bay deposita placa esey tin cu bay pa medio di Direccion di Finanza, of Land Aruba, pero no e minister tin cu bisa na unda tin cu pone cent y den e caso aki totalmente contra e principio pa cual e origen di e articulo y e acuerdo concerni ta, unda cu no tin placa ta bay na ningun comerciante ni ningun minister ni su buro.

Riba e punto aki, e Parlamentario a subraya, lo bay di parti di fraccion di POR, preguntanan pa Gobierno. Nan kier haya un bista total di cuanto y ken a bira victima di ex-minister Sevinger cu a exigi di nan pa deposita placa na lugar di haci un acto di generosidad pa un instancia caritativo, y esaki sigur no ta e meta pa cual e articulo a wordo poni den e parte di overijnkomsten of opcion di DIP.

Tambe e comerciantenan mester a cumpli cu condicionnan pa cu opcion, manera financiamento, plan cla, factible, investigacion y rapport tocante medio ambiente, entre otro aspectonan importante pa garantiza cu e proyecto ta cana bon y ta bira exitoso.

Pero ex-minister Sevinger no a worry si nan ta cumpli of no cu e parti financiero, si nan tin estudio di factibilidad y medio ambiente, basta nan a deposita e placa y e ex-minister apunta na unda esaki tin cu bay.

E preguntanan aki lo bay pa gobierno y e fraccion di POR lo exigi claridad tocante cuanto e sumanan di tur erfpacht y opcion cu ex-minister Sevinger of su buro a ricibi y unda e hendenan mester a deposita, pa ken y cuanto.

E dama parlamentario a subraya y reitera cu esaki ta completamente robes y cu ta na su lugar pa exigi claridad den dje, awor cu e mes a haya bista riba diferente stuck y documentonan cu ta ilustra cu e maneho aki no ta cuadra absolutamente cu e origen pa cual e condicion a wordo treci aden, pa yuda instancianan social, fundacionnan, scol no cu cent pero cu material cu nan mester a haya for di e personanan cu ta inverti na Aruba, y cu ningun momento tabata intencion pa deposita placa ningun caminda.

Preguntanan lo bay pa Minister Otmar Oduber, y fraccion di POR tin entendi cu nan ta bezig na DIP cu e desastre cu nan a topa cune eyden, y cu hopi trabao mester wordo haci pa bin cu un maneho manera e dignatario a anuncia pa pone esaki ‘in place’. Tin mas pregunta, e dama a agrega cu lo bay wordo haci pa clarifica e asunto aki.

- Advertisement -

DUNA COMENTARIO

Please enter your comment!
Please enter your name here