Home Gobierno Prome Minister cu mensahe riba Dia Mundial di Trahado Social

Prome Minister cu mensahe riba Dia Mundial di Trahado Social

54
0
SHARE
- Advertisement -

ORANJESTAD   (AAN):   Dia mundial di trahado social ta un dia cu trahadornan social ta para hunto pa celebra e logronan di e profesion. Ta e dia cu ta enfoca riba concientisacion riba trabou social y e necesidadnan pa accionnan den futuro. E caracteristica principal di un trahado social ta empatia, e abilidad pa compronde y comparti e sentimento di esnan mas vulnerable.

Awe mi kier para keto un rato na kico e rol di un trahado social ta den mi bista, den mi wowonan.

E gran mayoria di persona cu bo ta traha cu ne ta den un estado di crisis y angustia emocional. Na e momentonan ey abo mester por ofrece un ambiente cu atencion, comprension y pa di un manera of otro duna e forsa bek.

Pami pues un trahado social ta un extension di e man di Dios. Caminda Dios no por tey, pa proteha y yuda esnan mas vulnerable, e trahado social tey.

Muchanan cu ta wordo abusa, fisicamente y sexualmente; Hobennan cu ta wordo oprimi y gebullied; Nos hendenan special cu no ta wordo inclui y cu ta wordo discrimina. Adultonan cu ta wordo agredi y abusa emocionalmente y fisicamente; Nos grandinan cu ta wordo neglisha.

Nos pais ta enfrentando retonan grandi: retonan financiero, retonan cu nos pais bisiña y esun mas serio cu tur: retonan social. Desde e morto di e dos angelitonan Rishandroh y Eugene na november ultimo, cosnan a cambia na Aruba.

Ya e retonan financiero no ta esunnan di mas grandi mas, pasobra na e momento ey tur hende a realisa cu nos no por papia mas di retonan social, ni problemanan social. Awor nos ta papia di un explosion social.

Nos Gobierno tin como compromiso: pone e ser humano social. Y pesey, irespecto e retonan financiero, nos a compromete nos mes cu un crisis plan special pa atende cu tur e problemanan social den nos comunidad. Pa percura cu tin suficiente personal y material pa cuminsa atende cu e problemanan social den nos comunidad. Hunto a traha riba un crisis plan, cu un costo di 32 miyon, cu nos ta luchando pa keda inclui den e presupuesto di 2018 y 2019.

E meta principal di Gobierno ta pa e profesion di un trahador social engrandece bienestar di tur ser humano, y pa yuda cumpli cu e necesidadnan basico pa tur hende. Cu atencion particular na e necesidad y refuerso na esnan vulnerable, oprimi y bibando den pobresa.

Pero cu financiamento di un crisis plan social ainda nos no tey. Pasobra pa nos proteha esnan mas vulnerable den nos comunidad, nos mester di cada trahado social. E trahado social, cu ta e extension di e brasanan di Dios, pa proteha esnan mas vulnerable.

Na e momentonan aki nos Minister di Asuntonan Social, sr. Glenbert Croes, ta na Hulanda pa sigura e implementacion di e Crisis Plan Social cu e sosten di Hulanda. Y porfin e gritonan di e trahadornan social e ultimo añanan ta haya oido. Pesey Gobierno ta poniendo fondonan adicional riba presupuesto, no obstante e crisis financiero, pa asina sigura nos muchanan y nos famianan un miho futuro.

Y indudablemente lo tin momentonan cu bo no por haci nada pa preveni inhusticia, pero nunca, nunca keda sin protesta. Trahadornan social tin curashi pa vocifera nan opinion. Nan tin curashi pa desafia esnan cu poder y cu ta intimida. Y tin biaha bo por faya den proteha esnan inocente y vulnerable, pero un trahado social ta nenga di keda keto.

Mi peticion na boso ta NUNCA KEDA KETO. Semper vocifera bo opinion pa proteha esnan cu no tin bos, of esnan cu nan bos no ta wordo scucha. Talves no tin oido mesora, pero lo tin oido.

Pa conclui, mi kier ripiti un quote di Dalai Lama: It is not enough to be compassionate. You must act.

Esey ta e diferencia entre mayoria di persona, y trahadornan social. Mayoria di persona tin compassion, pero no ta actua. Un trahado social tin compassion y ta actua! Esnan mas vulnerable den nos comunidad, nos hendenan special, nan mester mas cu solamente compassion y duele. Nan mester por mira otronan traha cu alma y cuerpo, sacrificando nan mes tin biaha, pa nan bienestar.

Den nomber di Gobierno di Aruba, nos ta gradici di curason tur trahado social pa boso dedicacion y pasion pa nos Pais. Cu Dios bendiciona boso.

 

 

- Advertisement -

DUNA COMENTARIO

Please enter your comment!
Please enter your name here