Home Hudicial Riba e caso di trahadonan cu gobierno a manda cas tin cu...

Riba e caso di trahadonan cu gobierno a manda cas tin cu warda decision di hues

140
0
SHARE
- Advertisement -

ORANJESTAD  (AAN): Doris Canwood ta abogado di un grupo di trahado cu a wordo manda cas despues cu e gobierno nobo a drenta. Ta trata aki di ocho trahado cu ta cay bou un departamento cu ta resorta bou minister di asuntonan general. Sinembargo manera ta conoci, e cantidad di hende cu a haya carta pa bay cas, ta hopi mas cu esey.

Hues a trata e caso. Tin cu corda cu tur caso cu bay corte, si e tin un chens of no, ta wordo trata door di un hues y no tin un decision ainda. Tabata tin loke ta trata behandeling. E ta un caso sumario cu a wordo entama, unda cu ta pidi pa hues dicta pa e clientenan bay traha bek.

Segun abogado Doris Canwood nan defensa tabata cu e trahadonan no completamente tabata pa solamente e gobernacion di Mike Eman. E clientenan a haya un carta hopi general, caminda cu ta wordo bisa cu nan tabata tin un contract pa e duracion di e gabinete Eman II. Mirando cu e gabinete mester bay cas, nan contract automaticamente ta caba y nan no tin derecho mas di sigui traha.

Den e caso aki, e defensa tabata cu esey no ta totalmente berdad. Berdad, nan tabata tin un contracto inicial pa gabinete Eman  I y despues Gabinete Eman II, pero tur esaki tabata a base di conseho. Tambe a wordo mustra cu den e caso specifico aki, tabata tin algun aña caba, mester a institui un dienst y e hendenan nombra como ambtenaar.

E proceso pa haci e departamento un Dienst tabata canando. Ora cu a caba cu Gabinete Eman II, e punto di bista di e clientenan, cu nan no por wordo trata como cualkier otro consultant of adviseur, cu por ta ta traha na bureau di minister, pasobra nan ta den un otro trayecto, wardando, formalisering, locual cu lastimamente no a tuma luga.

Hues tabata tin preguntanan hopi critico riba ki posicion e clientenan tin. E motibo ta cu si e punto di bista di Gobierno ta cu e clientenan aki nan contractonan a expira automaticamente door cu Gabinete Eman II no ta existi mas, esey lo kiermen cu eigenlijk nan lo mester bay cas, dia 1 di October. Esey no a tuma luga. E carta a wordo manda dia 29 di December y e personanan aki a keda haya pago conforme e carta te dia 31 di Januari. E ora eynan, pa hues, tabata hopi  importante pa e sa ta con mester cualifica esey, mirando cu pa ley, si ta bisa di un contracto di termino corto, pa un periodo defini, esey ta nifica cu nan mester a bay cas dia 1 di October. Ta dicon ta laga nan sigui traha si esaki ta wordo mira como un verlenging of un contracto riba su mes.

Ta preguntanan cu ta keda na un hues, na final di dia pa dicidi.

Awor aki ta wardando sentencia. E clientenan ta hopi defrauda. Nan kier traha y pa bisa cu nan ta comodo sinta na cas, esey no ta e caso, sino nan no lo a cuminsa cu un caso sumario. A cumins’e, pasobra nan ta kere cu nan tin derecho riba trabao y cu e manera cu nan a wordo kita, no ta husto. Ta keda na hues pa tuma un decision cu por ta, of cu nan mester bay traha bek, of ta haya schade vergoeding, of ta bisa cu gobierno tabata tin rason y e hendenan aki no tin derecho riba trabao mas.

Tin espacio pa apela si e caso sali na fabor di e contra partido. Den pasado, esnan cu a wordo perdi pa un di dos banda, semper a wordo apela.

E hendenan ta dispuesto pa bay traha awe mes si nan wordo yama. E personanan aki ta haci trabaonan social. Manera cu nos tur conoce, tin problema social na Aruba y ta hopi.

Sa cu tin casonan cu a bay prome cu esunnan di e clientenan di abogado Canwood. Tabata tin uno e siman aki ainda. Tabata tin uno prome cu tin cu agrega, a wordo perdi pa e cliente eynan. Ta compronde cu tin otronan ta bin. No ta kere cu esaki ta e ultimo di e casonan, segun Canwood.

 

- Advertisement -

DUNA COMENTARIO

Please enter your comment!
Please enter your name here