Home Deporte Rumannan Lacle a logra hazaña di core bicicleta di Hulanda te Singapore

Rumannan Lacle a logra hazaña di core bicicleta di Hulanda te Singapore

271
0
SHARE
- Advertisement -

ORANJESTAD (AAN): E rumannan William y Jaillen Laclé, for di basta tempo a traha riba e idea pa nan haci un reto grandi, esta di core riba nan bicicleta for di Hulanda, pasa den henter Europa, rumbo pa Singapore.

Despues di a traha duro riba e idea, porfin riba un Dialuna 3 di April 2017 nan dos a subi bicicleta y a cuminza manda pedal rumbo pa Singapore.

Nan a yama nan mes “Lacle Brothers”, y asina a cuminza blog riba Social Media, e progreso di nan reto.  Y semper nan tabata core cu e bandera di Aruba hisa na halto.

A lo largo di e ruta, nan animo tabata sumamente fuerte, aunke a topa cu algun blokeo cu a dificulta nan pasahe un poco, entre otro ora di pasa door di Iran, unda Facebook ta completamente blokea.

Algo sorpresivo tabata ora cu na October 2017 nan a haya e baño di awa frieu, ora China a nenga nan un visa di core bicicleta riba nan teritorio.  Esey a pone cu nan mester a bula rumbo Thailandia, y haci un ‘vuelta’ door di Malaysia y finaliza na Singapore.

Tog cu perseverancia, nan a sigui, pasando den zuidoost Asia, bishitando Laos, Vietnam, Cambodia, y asina yega bek na Bangkok, y sigui a lo largo di e costa rumbo Malaysia, y despues pa Singapore.  Tur caminda cu nan a pasa, nan a promove Aruba cu tur nan alma.  Algun pais tabata severo den otorgamento di visa, y hasta a pone un deadline di tempo cu nan mag di ta riba e pais.

Nan amiga, Mishally Wever a dicidi na viaha pa Karzakhstan unda el a dicidi na uni cu e rumannan Lacle pa acompaña nan tambe riba bicicleta riba e ultimo parti di e ruta.  El a sigui cu nan pasando tur e demas paisnan, y e tambe a yega na final.

Riba Diadomingo 18 di Maart, nan a yega nan punto final, esta na Thailandia.

E mayornan di William y Jaillen, esta ex-Comandante di Bombero, Jaime Lacle y esposa, a viaha te Thailandia pa asina ricibi nan na e punto final.  Mayornan di Mishally, esta Michael Wever y esposa tambe tabata presente.

E aventura cu cada uno a pasa den cada pais, e contratiemponan, e lucha contra mal tempo, camindanan den condicion malisimo, y tur mas, ta algo cu e rumannan lo por skirbi buki di dje.  E reto a converti su mes den un hazaña grandi, y nan a logre tambe.

William, Jaillen, y Mishaly a bira e Arubianonan cu a core destino mas largo den historia riba bicicleta.

DIARIO ta manda palabra di pabien na e hobennan aki cu a demostra cu nan hazaña ta uno cu tur Arubiano tin di ta orguyoso di dje.  E ta ademas un mensahe, cu si cualkier persona tin un reto bo dilanti, djis no spanta pe… djis enfoca, traha y logra e hazaña!!!  Potretnan cortesia Sr. Lacle y Sr. Wever.

 

- Advertisement -

DUNA COMENTARIO

Please enter your comment!
Please enter your name here