Home Enseñanza Si na final e maestronan ta contra independizacion lo tin cu respeta...

Si na final e maestronan ta contra independizacion lo tin cu respeta nan decision

97
0
SHARE
- Advertisement -

Segun Minister di Enseñanza: Ta bay tuma mas tempo pa duna informacion corecto

ORANJESTAD  (AAN): “Mirando cu e pensamento pa independiza enseñanza ta data di 30 aña pasa y esaki ainda no a logra, mi tambe ta bay tuma mas tempo pa asina nos por sigui cu e idea aki cu a keda lanza for di e prome Gobierno despues di Status Aparte di Aruba”.

Esaki Minister di Enseñnza Rudy Lampe a bisa durante un conferencia di prensa Dialuna mainta.

E mandatario a indica cu ta bay hasi e proceso di independizacion mas poco poco.

“Nos ta bay paso pa paso y e prome paso ta bay tin di haber cu Colegio EPI”.

“Di parti di e managers di EPI, nos a haya e peticion pa dal un stap den direccion di un stichting EPI”.

Esaki segun Lampe, kende a indica cu e ventaha pa EPI en berdad ta hopi.

Como stichting EPI e ora ey nan lo por atrae inversionnan cuantioso, cu na e momentonan aki no ta posibel, door di e structura huridico cu tin actualmente, segun e mandatario.

El a indica cu ta bay sigui delibera cu personal di e school, pasobra nan posicion huridico ta bay keda mescos.

Esaki ta conta tambe pa tur otro maestro, segun e mandatario.

Maestronan te ainda no ta di acuerdo pa independizacion tuma lugar, pero segun Lampe, esaki ta pasobra ainda nan tin duda si nan posicion huridico lo cambia, door di hopi informacion incorecto eyfo.

El a sigura cu esaki no ta e caso, pues tur maestro ta keda cu mesun posicion huridico.

El a enfatiza cu e unico cambio grandi ta pa loke ta e posicion di e minister di Enseñanza.

“E no tin nada di haber cu e posicion huridico di maestronan of contribucion financiero di e mayornan”.

“Tur cos ta keda igual y pesey mes nos a dicidi di tuma mas tempo”

“Si despues cu tur e maestronan haya tur e informacion corecto rond di e independizacion y toch nan dicidi cu nan no kier bay den e direccion ey, nos tey pa obedece pueblo y lo tin cu respeta nan decision”, segun e mandatario.

- Advertisement -

DUNA COMENTARIO

Please enter your comment!
Please enter your name here