Home Hudicial Sospechoso cu a tira dama mata na Wayaca a basha abao cu...

Sospechoso cu a tira dama mata na Wayaca a basha abao cu ta e Chines a bin cu e plan

162
0
SHARE
- Advertisement -

E Chines ta desmenti tur cos

ORANJESTAD (AAN): Manera DIARIO a informa, ayera mainta Corte den Promer Instancia a trata e lamentable caso di asalto arma na un cas na Wayaca, caminda a tira mata un dama Chines (Shasha) mientras cu a tira su casa tambe den schouder. E sospechosonan J.P.E. di Bonaire biba na Aruba y e Chines P.F. biba na Aruba, a presenta dilanti Hues.

Den sala di Corte e tribuna abou tabata completamente yen cu e famianan y conocirnan di e victima cu a fayece. Den e tribuna ariba tabata familiarnan y conocirnan di e dos sospechosonan. Por a nota cu e familiarnan di e victima a bin cu flanel bisti riba cual ta geprint “Husticia pa Shasha”.

Tratamento di e caso aki a dura te den oranan di atardi. DIARIO ta publica diferente articulo pa asina duna nos lectornan un bista cla kico tur a sosode.

Den e articulo aki ta relata e interogacion di Hues di tanto J.P.E. como P.F. Ta asina cu dia 13 di September 2016 e lamentable asalto arma a sosode y dia 23 September 2016, Recherche a bay detene J.P.E. y P.F. A resulta cu J.P.E. ta traha cu P.F., kende tin un negoshi di ijs.

ACUSADO A BASHA ABAO RIBA CHINES:

Hues a puntra J.P.E. pa bisa kico realmente a pasa. Hues a bisa cu J.P.E. a duna diferente declaracion. J.P.E. a admiti di a haci e asalto arma. El a splica cu el a worde instrui door di P.F. pa haci e asalto arma. Segun J.P.E., P.F. tabatin mester di cen pa paga impuesto di cosnan cu el a busca di China pa su negoshi di ijs. Segun J.P.E. e ta traha pa P.F. y semper P.F. a trat’e bon y el a dicidi cumpli cu P.F. pasobra P.F. a yega di fi’e placa pero e no a pag’e back. Segun J.P.E., P.F. a insisti pa e asalto arma tuma lugar na e cas ey. El a bisa cu P.F. a dun’e 1600 Florin pa cumpra e arma, un revolver Caliber 38 Special..

J.P.E. a bisa cu el a fia 200 Florin for di su ruman pa asina completa e 1000 Dollar pa cumpra e revolver. El a haya e revolver y despues a bay busca 3 bala. Despues di e asalto J.P.E. a duna e persona (un tal Ivan) back e arma pasobra e persona tabatin mester e arma pa haci un “pelicula”.

VIGILA CAS PA HACI E ASALTO:

El a splica Hues cu P.F. a huur auto pa J.P.E. dos biaha pa asina vigila e cas. J.P.E. a bisa cu e tabatin miedo pa bay haci e asalto arma su so. P.F. tabata insisti pa e bay su so. J.P.E. a splica cu e di dos biaha cu el a haya e auto, tabata pa e bay haci e asalto pero J.P.E. no a durf.

J.P.E. a bisa Hues cu dia 13 September 2016 nan tabata pleita y P.F. tabata bisa J.P.E. cu e no tin bala pa haci e cos. E ora ey J.P.E. a bis’e cu e ta bay haci’e. El a bay bisti otro paña pa bay. El a bisa cu P.F. a bisa cu su tanta semper ta cana cu mas o menos 10 mil Florin den un tas. Segun J.P.E., promer P.F. tabata kier pa usa un tubo pero J.P.E. no kier.

J.P.E. a bisa mihor usa arma. Hues a bisa cu for interogacion por compronde cu a papia di tira e yiu homber mata pa laga mustra cu e ta den baho mundo y si nan reconoce lo mester mata tur pasobra hende morto no por papia. J.P.E. a bisa cu P.F. a bis’e esey. E plan tabata pa haci e asalto merdia pasobra e ora ey e hendenan tabata na cas y no a muchanan. Tambe cu merdia P.F. lo mester busca su yiunan na school, cu ta crea un bon motibo pa mustra cu e no ta envolvi.

ASALTO ARMA A RESULTA FATAL:

J.P.E. a bisa cu ora el a drenta cura el a mira e casa y a saca arma p’e y bis’e pa bay paden. E señora tabata den cushina. El a bisa nan pa bay riba vloer pero nan no tabata kier. E ora ey el a dal e casa cu cabo di revolver na cabez. E ora ey el a mara nan cu tie-wrap cu el a haya for di P.F..

Door cu e homber no kier coopera, el a lastr’e den gang. Despues a bay cu nan den camber y el a puntra e señora unda e placa ta. E señora a mustra riba dos cartera. Segun J.P.E., e momento ey el a scucha e porta habri. El a bay wak y mira cu ta e yiu homber a drenta. El a dirigi arma riba e yiu y bisa cu ta atraco. E momento ey el a sinti un sla na man. E ora ey J.P.E. a grita hopi duro y el a tira e casa kende tabatin un kruk den su man pa dal J.P.E.

Segun J.P.E., el a kere cu el a tira e casa den lomba y e homber a cay. El a tende e porta di cushina sera y el a tira e glas di porta pa habri porta pa e bay coy su tas y bay for di e cas. E momento ey el a corta su man na glas di e porta. Ora el a habri e porta el a mira e señora drumi abao. E señora tabata para na e porta y ora J.P.E. a tira e glas, e bala a alcanza e señora den cabez. J.P.E. a bisa Hues cu el a coy su tas y a coy un boshi yabi. El a bisa cu e tabata hopi nervioso.

CHINES A BAY BUSKE:

El a splica cu ora e señora y e homber tabata ariba vloer el a kita cartera di e homber, kita cadena di e señora y a coy e tres cellularnan. Ora e tabata bay den auto, el a yama P.F. y bisa cu cos a bay robez cu dos a haya bala y pa bay busk’e na Sport Boys na Angochi.

Despues P.F. a hiba J.P.E. su cas y busk’e atrobe y nan a bay kima tur e cosnan cu J.P.E. a usa y cu tabata na sanger banda di pista dragrace na Palo Marga. El a bisa cu mientras cu e tabata kima e pañanan, P.F. tabata sconde e revolver den e compressor di e auto di ijs. Despues cos a sigui normal manera nada no a pasa.

Despues P.F. a hiba e arma pa J.P.E. El a scondi’e na su cas y despues e persona cu a bende e arma a pidi’e e arma back pa haci un “pelicula”.

CHINES TA NENGA TUR COS:

Hues a mustra cu P.F. a declara cu el a duna J.P.E. un lift na Wayaca pa su chick. P.F. a bisa Hues cu el a zundra J.P.E. y hib’e. Despues J.P.E. a yam’e pa busk’e y P.F. a yam’e pa na unda mester busk’e. E ora ey J.P.E. a bis’e banda di Sport Boys y asina J.P.E. a bay na e auto.

P.F. ta bisa cu J.P.E. tabatin un saco di plastic di sushi. J.P.E. a bisa Hues cu e tabatin un tas. P.F. a bisa cu el a baha. J.P.E. na su cas y a hiba su yiunan cas. Despues el a bay busk’e back pa bay busca un trailer di machine di ijs na San Nicolas. Segun P.F. den auto J.P.E. a saca e arma y bisa cu el a haci asalto y tira mata e tanta di P.F. P.F. a bisa Hues cu el a spanta y bira nervioso.

Na dado momento J.P.E. pidi pa cumpra pleister. El a para na un lugar y J.P.E. a bay cumpra pleister. Despues el a bisa pa bay Palo Marga y J.P.E. a baha kima e cosnan. Segun P.F., J.P.E. a keda cu e arma. Ora e tabata declara, por a nota cu J.P.E. a keda mir’e y ta hari. P.F. a sigui bisa cu e dia ey e no a haci nada y su siguiente dia J.P.E. a bis’e pa bay busk’e pa e traha normal. Hues a puntra P.F. pakico e no a bay Polis. Segun P.F., e tabata bou menaza y su bida y esun di su famia tabata na peliger.

P.F. a desmenti di a cumpra arma. El a bisa cu e no tabata sa di e asalto arma. Hues a remarca con por ta si nan ta asina bon amigo, cu J.P.E. ta bay gaña riba P.F. Segun P.F. esey J.P.E. a haci pa baha su castigo.

Hues a remarca cu P.F. no a bisa Polis cu el a worde menaza pa J.P.E. Segun P.F. el a worde menaza den auto cu arma.

RAPORT PSYCHIATER:

Hues a mustra cu psychiater a constata cu J.P.E. tin problema mental. E ta haya J.P.E. menos responsabel pa su actonan. Tin riesgo cu den futuro e lo por haci algo asina. El a conseha duna castigo condicional halto cu tempo di prueba largo bou guia Reclasering.

Abogado mr. Carlo a puntra J.P.E. si el a haya tratamento. Segun J.P.E. el a pidi pa tratamento pero no a haya den KIA.

Den oranan di merdia Fiscal a bisa den su rekisitorio cu e ta haya ambos complice di mata intencional y a exigi 25 aña di prison pa cada un.

Den un otro articulo, DIARIO ta publica e rekisitorio di Fiscal.

 

- Advertisement -

DUNA COMENTARIO

Please enter your comment!
Please enter your name here