Mr. Adi Thijsen:
ORANJESTAD(AAN): Durante un conferencia di prensa Dialuna, presidente di Parlamento Adi Thijsen a papia tambe riba un biahe pa Hulanda cu el a hasi hunto cu su coleganan di e fraccion geel.
Thijsen a indica cu banda di e problemanan social y financiero, Aruba tin tambe un problema constitucional.
“Nos tur sa cu Aruba a haya un KB na 2014, unda cu CAFT a hasi su introduccion”.
“E base pa CAFT keda tabata un protocol na 2015 y a base di e protocol ey, e gobiernonan di Aruba y Hulanda a dicidi di bin cu un landsverordening, esta LAF”.
“E intencion tabata pa den 3 aña Aruba bin bek riba pia”, segun Thijsen, kende a indica cu mirando cu e situacion financiero no a drecha, CAFT a faya y Hulanda a faya den e supervision cu el a pone den CAFT.
“E pueblo a scoge pa bin cu un otro gobierno y awor Hulanda kier pusha pa bin cu solucionnan dentro di 1 of 2 aña”.
Esaki segun Thijsen, kende a sigui bisa cu mester bin cu un solucion pa e problemanan social, economico y financiero, pero na mes momento mester cana e caminda pa hasi mas sigur e estado di derecho di Aruba.
“Mester pone instrumentonan, cu lo sigura cu locual a sosode den pasado no pasa nunca mas”.
“Nos ta bay independiza Parlamento, Algemene Rekenkamer y Raad van Advies y nos ta bezig cu Ombudsman”, segun e parlamentario, kende a indica cu ta bay bin cambionan fundamental, unda cu e control ta bay ta mihor, mas efectivo y mas eficiente.
