Home Gobierno Ta bay purba otorga 500 pa 600 tereno tur aña y lo...

Ta bay purba otorga 500 pa 600 tereno tur aña y lo enfoca tambe riba construccion di condominiumnan pagable

241
0
SHARE
- Advertisement -

Minister Otmar Oduber:

ORANJESTAD  (AAN): Diahuebs durante un conferencia di prensa, Minister di Infrastructura Otmar Oduber a papia riba e maneho pa loke ta otorgamento di tereno.

E mandatario a indica cu a traha alrededor di 3 luna pa por bin cu e documento di maneho, cu awor ta riba tur webpage di DIP y di Ministerio di Infrastructura.

Asina comunidad por sa exactamente kico nan derechonan ta y kico ta e rekisitonan , ki ora tin un excepcion, ki ora bo ta haya un extension di tereno y ki ora bo por haya e posibilidad di transferi bo tereno.

Esaki segun Oduber, kende a bisa tambe cu e cambionan cu a bin cune, ta yuda evita venta y negoshi di tereno cu a tuma lugar na un forma exageradamente grandi durante gobernacion anterior.

“Nos a depolitiza e aspecto di dunamento di tereno y nos a percura pa DIP bira e unico organo caminda cu comunidad di Aruba ta entrega su documentonan y ta percura eynan tambe pa atende cu e peticion, dicidi riba e peticion y duna conseho riba e peticion”.

“Percura tambe pa tratamento di e documento tuma lugar”.

Esaki segun e mandatario, kende a sigui bisa cu actualmente tin mas cu 12.000 peticion pa tereno.

Segun Oduber, tin un file cu ta contene 8.340 documento cu firma di ex minister Benny Sevinger riba nan, cu ta bisa cu e ta bay acuerdo cu e peticionnan.

“Tur a keda como un promesa di campaña, unda cu tin cu ta di fecha 2010 y 2011 tambe”.

“Simplemente e minister anterior a hunga cu emocion di nos conciudadanonan”.

“Bo ta bay cerca dje y no na DIP, e ta firma cu un pen pabo y bisa ‘akkoord’, despues di cual e ta pone ma atencion di e departamento, pa despues e papel ta bay drumi, pasobra no tabata tin tereno”.

Esaki segun e mandatario, kende a sigui bisa cu tin documentonan te hasta unda cu 3 pa 4 tereno a wordo duna na mesun hende.

Oduber a splica con e proceso nobo ta hinca den otro, unda cu tin dos tipo di peticion, esta peticion pa vivienda y un peticion pa negoshi.

E proceso pa busca un tereno pa vivienda ta cuminza na DIP y no na ningun minister, e peticion mester ta mas cu 1 aña bieu y una vez cu bo a hasi e peticion, bo ta bay den un asina yama ‘pre-reservering’ y despues den un ‘reservering’.

Esnan cu tin peticion di mas cu 1 aña bieu te cu esnan cu tin un peticion di alrededor di 15 aña, ta bay ricibi carta.

“Nos no por duna tur hende tereno, pero e maneho ta poni cu pa aña 500 pa 600 tereno tin cu Sali pa comunidad di Aruba y den esey nos ta haciendo inversionnan”.

Esaki segun e minister, kende a sigui bisa cu ta bay automatiza y digitaliza e proceso di midimento di tereno, mientras cu e instruccion a wordo duna na DIP y Kadaster pa nan cuminza produci e cantidad di tereno necesario.

Ta bay busca barionan nobo pa wordo crea dentro di e distritonan cu tin.

“Principalmente ta bay percura pa bay ariba tambe den construccion, pues condominiumnan pagable pa nos propio hendenan”.

“Nos ta crea un instituto banda di FCCA pa loke nos ta yama casnan pagable, cu ta casnan entre 125.000 y 150.000 y casnan entre 225.000 y 250.000”.

Esaki segun Oduber, kende a bisa cu tur tipo di famia e ora ey por haya chens di biba den nan propio cas.

Asina e mandatario a sigui splica tur e rekisitonan, unda cu el a bisa tambe cu ta bay para e asunto di hendenan cu ta haya tereno y keda hopi tempo sin hasi nada cu esaki.

E hendenan ta bay haya suficiente tempo pa hasi algo, pero si nan no construi riba dje, e tereno lo por bay pa otro hende cu si ta bay hasi uso di e tereno na bon manera.

DIARIO a puntra e minister si no ta asina cu si bo otorga 500 pa 600 tereno tur aña manera cu el a bisa, e ora ey pronto lo no tin mucho lugar mas pa construi cas.

El a indica cu pesey un parti importante ta construccion di condominiums of e asina yama ‘flats’ manera cu tin por ehempel na Hulanda tur caminda.

E ora ey por tin mas lugar di biba pa hende, usando menos tereno.

El a indica cu quizas ta bay tuma un tiki tempo pa hendenan na Aruba custumbra cu e idea aki, pasobra esey den futuro cercano lo bira e mihor manera pa mas hende haya lugar di biba.

- Advertisement -

DUNA COMENTARIO

Please enter your comment!
Please enter your name here