Home Hudicial Un aña di prison pa homber cu tabata mishi cu su yiu...

Un aña di prison pa homber cu tabata mishi cu su yiu muher di 6 aña

92
0
SHARE
????????????????????????????????????
- Advertisement -

ORANJESTAD (AAN): Diabierna mainta e homber di inicial A. di 45 aña di edad, acusa di a tene relacion cu su propio yiu muher menor di edad y cu durante un periodo largo a haci actonan inmoral cu e mucha, a scucha Fiscal exigi 24 luna di prison di cual 6 luna ta condicional.

Hues mes, despues di a scucha defensa di abogado mr. Lejuez a bay pensa un rato y a dicta sentencia di biaha. Hues ta haya A. culpable di a mishi cu e mucha y a conden’e na 18 luna di prison di cual 6 luna ta condicional.

ABUSA DI YIU MUHER:

Hues a bisa cu e caso a cuminsa 14 Juni 2017 ora cu e yiu muher a haci denuncia na Polis. Polis a bay na e cas pa un problema familiar entre A. y su partner. E mucha e ora ey a bisa Polis cu A. tabata molesti’e. El a bisa cu desde cu e tabatin 6 aña, A. a cuminsa mishi cu su parti intimo y su pechonan. Segun e mucha, e tabata drumi mey mey di su mama y tata riba cama. Ora e mama bay traha, A. tabata mishi cu su parti intimo y pecho.

A. desmenti esaki. El a splica Hues cu e tabatin cas di FCCA di un camber. El a bisa cu e mucha ta drumi riba su cama pero anochi e sa bay drumi mey mey di nan. El a bisa cu su partner tin problema cun’e door di redashi. E yiu no gusta cu su tata y mama ta pleita. E yiu semper ta tuma parti pa su mama.

Hues a bisa cu e mucha tabata bisa cu tur fin di siman, A. tabata haci esey cun’e. A. a desmenti esey. El a bisa cu weekend e ta bay misa y e yiu tabata keda cerca A. su mama.

Hues a bisa cu A. a declara na Polis cu e no a molestia su yiu sexual pero e tabata bay den e direccion ey. Hues kier sa kico A. kiermen cu esey. Esey por ta cu A. lo tabata mishi cu e mucha? A. a bisa Hues cu tur hende sa haci fayo y mester para pa loke nan haci. Despues di un rato A. a bisa cu e kier splica algo pero por ta bay compronde robez.

Hues a bise pa purba splica tog.  Aki A. tabata bisa cosnan y Hues a bisa cu e no ta compronde. A. a bisa cu accidental el a mishi cu su yiu. Hues a bisa cu e mucha a bisa cu A. a mishi cun’e y sunchi na su boca y e mucha a grita y a bisa cu e ta bay bisa su mama.

A. splica tambe cu tin biaha el a kere cu ta su partner ta drumi banda di dje riba cama y e ta mishi cun’e pero despues ta resulta cu ta e yiu muher. El a bisa cu e tabatin discussion cu su partner pa e mucha drumi riba su cama y no entre nan. Door cu e yiu tabata drumi mey mey di nan, e cu su partner no tabatin relacion sexual. A. ta para riba cu e no a abusa di su yiu.

EXIGENCIA DI FISCAL:

Fiscal a bisa cu den casonan asina ta dificil haya pruebanan. Na opinion di Fiscal, e mucha a bisa cu tempo cu e tabatin 6 te cu 11 aña su tata tabata mishi cun’e y despues a stop. Pero tempo cu e tabatin 14 aña e tata a bolbe cuminsa te cu su 15 aña caminda lo tabatin penetracion. E ultimo biaha a causa problema te cu Polis a yega.

Fiscal a mustra riba un declaracion di A. na Polis mientras cu A. no tabata un sospechoso. Tabatin problema na e cas y e agente di Polis tabata busca manera di sa kico tabata e problema. Parce cu e mucha a worde maltrata cu un pida palo. E mucha e ora ey a bisa cu A. a abusa di dje. E ora ey A. a bisa cu algo a pasa pero hopi aña pasa. E ora ey e agente a bisa e mucha pa haci denuncia. Fiscal a bisa cu e ta usa esaki como prueba y tin mas prueba di sosten pa e acusacion di actonan inmoral.

E ta haya cu no tin prueba cu A. a tene relacion sexual cu su yiu muher menor di edad. Fiscal a mustra cu e mama a bisa cu su yiu a cont’e kico a pasa y ora e mama a bay confronta e tata, cos a bay for di man. Segun Fiscal, A. lo tabata reclama pakico e partner no ta pordone. Fiscal a remarca, pakico A. ta pidi pordon si algo no a sosode. Fiscal a bisa cu e por a compronde di A. den Corte, cu A. tabata sinti algo pa su yiu pero e ta core cu e mucha. Fiscal a conclui cu A. tabata mishi cu su yiu menor di edad y a bisa e yiu pa no bisa e mama nada.

Pa cu e castigo, Fiscal a bisa cu e ta tene cuenta cu ta promer biaha cu A. a cay sera pa mishimento di su yiu. El a exigi 2 aña di prison di cual 6 luna ta condicional cu un tempo di prueba di 3 aña.

FORMULA PRUEBA CONTRA LEY:

Abogado mr. Lejuez a bisa Hues cu A. ta para riba cu e no a tene relacion sexual cu su yiu muher. E abogado a cuestiona cu den e procesverbaal ta para cu dia 14 Juni 2017, A. ta papia di e problema na e cas y cu e mucha tabata fresco. El a pidi disculpa den esaki. Sinembargo un agente a mira pa traha algo contra A. E agente ey a traha un relato pero e otro agente no a firma. E agente aki a puntra A. como sospechoso y a puntra si A. a mishi cu e mucha. Abogado mr. Lejuez a señala cu e agente no a bisa A. su derechonan y pesey segun ley penal, no por usa esaki como prueba, manera Fiscal si ta pretende.

E abogado a sigui bisa cu A. a keda desmenti cu e a mishi cu su yiu muher. El a mustra cu durante interogacion A. a bisa cu tin dos persona cu a scucha e bisa cu no ta asina. Sinembargo Polis no a bay scucha e dos personanan aki. Abogado a bisa Hues cu e ta comparti opinion di Fiscal cu no por papia di penetracion. E ta kere cu e agente kier a haci e caso mas serio door di sospecha A. di a abusa di su yiu.

El a remarca cu e agente a haci tur cos pa pinta A. malo y Fiscal no ta cuestiona esaki. El a bisa cu e ta haya e exigencia di Fiscal ta mucho halto.

Abogado mr. Lejuez a señala cu dia e caso a bin dilanti pro forma, no tabatin e acusacion di relacion sexual. Ta awor a pone e acusacion aki acerca. Abogado a mustra Hues riba un caso similar caminda Corte di Husticia di Aruba ta mustra cu e delito di mishi no ta asina serio y a condena e acusado na 6 luna di prison. E caso aki ta trata di pedofil cu a haya hopi publicidad den comunidad. Awor Fiscal ta bin haci e caso un cos grandi y ta exigi 2 aña di prison. E abogado a bisa Hues cu e ta compronde cu e casonan aki ta hopi comenta na Aruba y Fiscal kier purba score cu esaki. El a mustra cu e agente di Polis ta pone riba papel un declaracion, cu A. no a bisa. E ta haya cu A. a sinta suficiente castigo.

Fiscal a reacciona y a bisa Hues cu e ta considera loke abogado a bisa un atake personal contra dje. Fiscal a bisa cu e no a formula nada. El a djis drecha e acusacion cu for di principio no tabata corecto formula. E defensa cu abogado a presenta e no ta compronde. E ta comparti e punto den e defensa, cu no ta un caso asina serio y Fiscal ta haya su castigo exigi na su lugar.

SENTENCIA:

Hues a sera tratamento di e caso y a pospone e caso un rato pa e bay pensa. Despues di un rato Hues a presenta y a dicta sentencia. Hues a bisa cu conforme hurisprudencia di Corte Supremo, tin suficiente prueba di sosten pa yega na prueba. Hues a sigui bisa cu e ta comparti punto di bista di abogado, cu no por usa raport di agente cu no a mustra A. su derecho.

Hues a bisa cu e ta haya proba cu tin mishimento. El a mustra cu e mucha a bisa, e mama a bisa kico su yiu a cont’e y e tata A. mes a admiti cu e no kier a abusa di su yiu pero si a bay den e direccion ey. Tambe a bisa cu accidental a mishi cu su yiu y cu e a kere cu ta su partner tabata drumi banda di dje. Hues a bisa cu e no ta kere e parti aki.
Pa cu e castigo el a bisa cu ta casonan hopi fastioso caminda e victima lo por afecta pa tempo largo. Hues a condena A. na 18 luna di prison di cual 6 luna ta condicional cu un tempo di prueba di 2 aña. Hues a declara A. liber pa e acusacion di tabatin relacion sexual cu su yiu.

 

- Advertisement -

DUNA COMENTARIO

Please enter your comment!
Please enter your name here