Home Gobierno Un app ta bay wordo introduci pa pashentnan duna un score riba...

Un app ta bay wordo introduci pa pashentnan duna un score riba e calidad di cuido cu nan ta ricibi di nan docter di cas

77
0
SHARE
- Advertisement -

ORANJESTAD (AAN): Minister di Salubridad Dangui Oduber Dialuna durante un conferencia di prensa a bisa cu e gobierno actual tin hopi atencion pa cuido medico, unda cu a priminti di bay mehora e calidad y servicio di cuido medico cu ta wordo duna na tur e aseguradonan di AZV.

“Pesey nos tin un anuncio cu ta algo na beneficio di e aseguradonan di AZV”.

Esaki segun Oduber, kende a indica cu ta bay duna e pashent e posibilidad di duna un rating na su docter di cas.

E pashentnan por duna nan rating atravez di un app y esnan cu no tin e app por hasi esaki atravez di e website cu tin.

Investigacionnan a mustra entre otro cu e oranan mas druk na Eerste Hulp ta entre 8’or di mainta y 5’or di atardi, siendo cu esaki ta e oranan cu pashentnan lo por bishita nan docter di cas.

Quizas e resultado di e investigacion lo mustra cu docternan di cas no ta hopi accesible durante e oranan ey y esey ta pone cu e pashent ta bay Eerste Hulp.

E mandatario a splica cu mundialmente tin 3 indicador atravez di cual bo ta midi e calidad di cuido medico di bo pais.

Esakinan ta accesibilidad di bo cuido medico, calidad di cuido y con pagable e cuido ta.

Reunionnan cu diferente instancia a mustra cu AZV no ta realmente midi e calidad di servicio cu e docternan di cas ta duna na nan pashentnan.

E atravez di e app bo ta bay por pone di 1 te cu 5 strea riba diferente punto den e parti di cuido cu bo docter di cas ta brindabo.

Bo ta bay por duna un score riba por ehempel con facil of dificil ta pa bo hasi un cita cu bo docter, con largo bo tin cu warda den sala di espera y con satisfecho bo ta cu e tratamento y servicio etc.

Si bo pone por ehempel 1 strea, esey ta nifica cu den e punto ey bo docter di cas ta score hopi abao.

Si bo duna un 5, esaki ta hopi bon.

DIARIO a puntra Oduber kico ta pasa si cada biaha un docter score hopi abao y el a indica cu si esaki sosode, e chens tey cu AZV na dado momento lo tin cu sinta cu e docter pa papia riba e contrato cu e tin, pasobra e docternan ta wordo paga pa duna e mihor cuido posibel na nan pashentnan.

Kehonan lo wordo bon investiga si, pa evita cu hende cu djis tin rabia riba cierto docter, ta convence otronan pa duna e docter ey scorenan hopi abao cada biaha.

- Advertisement -

DUNA COMENTARIO

Please enter your comment!
Please enter your name here