Home Parlamento “Un decision politico di AVP pa gana voto, gañamento y pa cierto...

“Un decision politico di AVP pa gana voto, gañamento y pa cierto hendenan gana placa!”

48
0
SHARE
- Advertisement -

Lider Fraccion di POR tocante slow down di CITGO:

ORANJESTAD (AAN) – Den conferencia di prensa di fraccion di Partido POR, drs. Marisol Lopez-Tromp, lider di e fraccion a hiba palabra, den e marco di e tema CITGO y posible slow down total.

Drs. Lopez-Tromp a enfoca riba duna un bista como miembro di Parlamento, kico nan mester tene cuenta cune, ora di tuma un decision di indole grandi manera e deal cu CITGO ta, of tabata.

Parlamentario Lopez-Tromp a señala cu tabata mas of menos dos aña pasa cu pueblo a cuminza tende di e proyecto pa re-habri e refineria.

E dama a subraya cu e tempo ey, ni un momento so tabata algo cu a wordo premira. Esaki pasobra gobierno di e tempo ey, cu tabata di AVP di cual e mes a forma parti di dje, na e momento ey como Presidente di Parlamento, tabata pone mas acento den haci nos pais berde, teniendo cuenta cu medio ambiente y tabata tin conferencianan tumando lugar, un mas caro cu otro, riba e parti con pa haci nos pais mas sostenible.

Nan tabata temanan cu sigur a conta cu sosten di Parlamento tambe y den nos comunidad.

Diripiente a bin e tema di reapertura di e refineria. E no tabata den e programa di gobernacion, sino cu ora cu esaki a bin, mirando cu ex-Minister Oduber tabata bezig cu un desaroyo di hotel pa San Nicolas, e tabata sona mi contradictorio un reapertura net banda di e proyecto aki.

Pa bin cu un refineria na unda tin planifica pa bin cu un hotel, den un zona turistico, no ta algo cu ta cuadra ni tampoco ta algo di awendia mas. “Nos sa cu e refineria tabata tin su tempo, su exito, su progreso cune e temponan aya, pero tempo a sigui y Aruba a scoge pa un otro rumbo, pero na un forma inespera toch Gobierno a bin dos aña pasa cu e idea di un reapertura” drs. Marisol Lopez-Tromp a señala.

E dama parlamentario a subraya: “Awe ta den discusion riba e consecuencianan di un supuesto ‘slow down’, riba ken a bay cas, ken no, ken a haya boet, ken no haya boet, e compania…Pero henter e inicio di e idea aki a bay completamente robes, pa loke ta e contrato y e forma con Parlamento a wordo envolvi. Mi ta considere, e tempo aya un decision politico, un gañamento pa gana voto, pa cierto hende gana placa, y pa gana tempo. E tempo ey nos tabata un aña prome cu eleccion”, Parlamentario drs. Marisol Lopez- Tromp a acentua.

E Parlamentario a corda cu ora e idea aki a bin, a surgi discusion con esaki ta cuadra cu un Aruba sostenible, si e parti di San Nicolas ta bay haya un otro desaroyo, si ta bin hotel y hasta tabata wordo construi e tempo ey caba, un green corridor di miyones cu mester a yega na e centro turistico di Aruba, cu tabata bezig ta desaroya. Un green corridor, e dama a subraya, cu nos ta bay paga miyones di florin pe.

Aworaki, aparentemente, ta bay yega na un porta cera, drs. Marisol Lopez-Tromp a subraya.

“E tempo ey, e gobierno no tabata transparente cu Parlamento. Nos a pidi documento. E tempo ey, 13 di Juli 2016, e miembro di fraccion di AVP cu tabata presidente di e comision di energia, sr. Donny Rasmijn, a pidi informacion riba e tema aki cu ta trata CITGO su acuerdo, e lies, e reapertura, etc. No e so, 14 di Juni e fraccion di MEP tambe ta pidi informacion”, drs. Lopez-Tromp a subraya.

Nan tambe a mustra cu Parlamento no tabata informa cu lo tabata tin reapertura di e refineria y nan a pidi pa wak e curazon di e documentonan firma entre Gobierno, CITCO y PDVSA, cu ta toca un reapertura di e refineria.

El a agrega cu tur e fraccionnan a pidi un reunion publico of na porta cera den Parlamento pa gobierno di Aruba, e tempo ey AVP, bin duna splicacion tocante e dealnan cu nan ta cerando.

El a acentua cu apesar di tur e publicidad cu gobierno tabata haci tocante e reapertura di e refineria, ningun di e documentonan concerni a bin Parlamento. Drs. Lopez-Tromp mes a pidi gobierno y muy en particular Minister de Meza, pa otorga nan e documentonan prome cu nan cera e deal grandi aki. E contesta di Minister de Meza tabata cu e ta haya como minister cu e pakete completo eynan e no ta duna Parlamento, pasobra e ta considera cu tin hopi cos confidencial y secreto cu e no por duna nan e documentonan ey, pasobra e por haci daño na e confianza cu tin entre cierto companianan di interes financiero y comercial. “Acaso e interes ey ta mas importante cu e interes di e pais?” Parlamentario Lopez-Tromp a subraya.

- Advertisement -

DUNA COMENTARIO

Please enter your comment!
Please enter your name here