Home Comercio Un dunador di trabao ta obliga pa proteha su trahadornan contra acoso...

Un dunador di trabao ta obliga pa proteha su trahadornan contra acoso sexual na pia di trabao

127
0
SHARE
- Advertisement -

Jullie Kelly di DAO

ORANJESTAD  (AAN):  Na Camara di Comercio tabata tin un lectura riba e topico di acoso sexual na pia di trabao. Akinan, expertonan di Directie Arbeid & Onderzoek (DAO) a hiba palabra pa informa esnan presente.

Jullie Kelly di DAO a duna di conoce cu un dunador di trabao ta obliga pa proteha su trahadornan contra tur tipo di acoso sexual na pia di trabao.

El a splica entre otro kico ta acoso sexual. Por papia di acoso sexual na momento cu fabornan sexual ta (parce di) wordo forza y esaki por presenta su mes den diferente manera: door di un dunador di trabao, un superior, un colega of un cliente y e por sosode entre homber-muher, homber-homber, muher-homber, muher-muher.

Pero importante ta pa sa kico ley ta bisa riba e topico aki. Segun Codigo Civil di Aruba Art. 1614zc, e dunador di trabao tin e obligacion pa asegura su mes cu su trahado (nan) no ta wordo exponi na cualkier conducta of acto verbal, no verbal of fisico cu un intencion sexual cu tin como meta of efecto pa viola e dignidad di un persona, particularmente si esaki ta crea un situacion menazante, hostil, denigrante, humiyante of ofensivo.

Segun e informacion suministra, DAO no tin datonan estadistico relaciona cu e casonan di acoso na pia di trabao. Sinembargo, si tin casonan na Aruba.

Tin un tendencia, y esaki ta sosodiendo mas y mas rond mundo, unda por constata cu mas y mas personanan ta hisando nan voz y ta declarando nan mes victimanan di acoso.

Door di e tendencia aki mas personanan tin durf di bisa kico nan a pasa of ta pasando cu nan. Importante ta pa no tin miedo y haci denuncia.

Banda di esaki, e recomendacion di DAO ta pa e dunador di trabao traha un maneho interno riba acoso y pone claramente kico ta e procedura cu lo wordo sigui como tambe e medidanan cu lo wordo tuma (p.e. aviso, suspension) riba cada accion.

Mester tene cuenta cu no solamente coleganan por haci nan mes culpable di acoso sexual sino tambe clientenan cu ta bishita e compania.

Kico un trahador por haci contra acoso sexual? Papia riba e situacion cu un persona cu e ta confia. Esaki por ta un persona apunta pa e compania, un colega, doctor di compania, docter di cas, representante sindical of un persona di Bureau Slachtofferhulp.

Acoso sexual por conduci na un denuncia di un delito na Polis. Acoso sexual ta castigable si e ta acompaña pa un acto sexual no desea y tambe por papia akinan di agresion fisico.  Den e caso aki e victima por haci denuncia na polis pa e acosador (stalker) por wordo persigui.

Tambe, un trahador por acudi na DAO pa atende cu e parti laboral di e situacion, Kelly a indica. DAO por intermedia pa e partidonan yega na un acuerdo mutuo pa asina termina e relacion laboral of den caso cu e trahador ta sinti su mes obliga pa retira for di su trabao pa motibo urgente (manteniendo su derechonan).

Finalmente por menciona cu durante e lectura a bin dilanti cu mas tanto na Aruba, e acoso ta sosode entre homber-muher, aunke no a menciona e cantidad di caso raporta na DAO.

 

- Advertisement -

DUNA COMENTARIO

Please enter your comment!
Please enter your name here