Home Comentario Un episodio decisivo den e lucha pa nos Status Aparte (parti 1)

Un episodio decisivo den e lucha pa nos Status Aparte (parti 1)

6
0
SHARE
- Advertisement -

Remitido

Introduccion:  Den e articulo aki, Mario Enrique Croes ta recapitula un episodio cu e ta considera decisivo pa e lucha pa nos Status Aparte.Ta trata e periodo entre februari 1981 ora cu e prome sesion di e Conferencia di Mesa Rondo a tuma lugar y september 1981 ora e partido MEP a sali for di e gabinete Martina. Durante e episodio aki Betico Croes a sufri un derota casi decisivo na man di e Hulandesnan pero contra tur expectativa ta logra transforma esaki den un victoria inespera. E prome version di e articulo aki a worde  publica na november 1983.  Den e version aki a haci cierto cambionan pa aclarea e contexto pero e esencia a keda mesun cos.

E cuadro:

Karl Marx a yega di skirbi cu ta como si fuera tur gran sucesonan y personanan historico ta surgi dos bes: e prome bes manera un tragedia y e di dos bes manera un tragi-comedia.  En berdad ta asina cu durante e decada 1973-1983, diferente biaha a parce cu Betico Croes a sufri e mesun destino cu su predecesor, Henny Eman (e welo). Manera conoci, e prome Henny Eman a guia e lucha nacionalista pa separacion despues di e Segunda Guera Mundial pero esaki a culmina den e Statuut (1954) cual no a resulta den un separacion di e constelacion Antiano.

Y despues di e prome sesion di e Conferencia di Mesa Rondo na februari 1981 tabata parce cu esaki tambe a bira e destino di Betico Croes. Sinembargo contrario na tur espectativa di su contrincantenan local y internacional cu no tabata tume na serio, Betico Croes a logra duna e situacion un vuelta sorpresivo.

Y ironicamente esun cu e crea e oportunidad pa e por a haci esaki ta e mesun Hulandesnan cu a tranca su esfuersonan tur e tempo. Pero pa logra esaki Betico Croes mester a accepta cu Aruba a bira independiente na 1996 despues di un transicion di 10 aña. Esaki a worde acorda durante e di dos sesion di Conferencia di Mesa Rondo cual a tuma lugar na maart di e aña 1983 na Den Haag, segun cual Aruba lo haya un Status Aparte durante  un fase transitorio di 10 aña cu lo cuminsa na 1986 y lo desemboca na 1996 den un independencia pa e isla.

   Independencia di Aruba: menaza real of “bluff”:

Durante e rebelion cu a tuma luga na Aruba na augustus 1977, e lucha pa separacion for di Antiyanan Hulandes a radicalisa den un lucha pa independencia ora e lider di MEP, Betico Croes, a proclama 1981 e aña cu Aruba lo bira unilateralmente independiente. Pero tambe tabata cuadra den e strategia di Betico Croes cu unabes Hulanda a instala e Grupo di Trabao di Reinado (GTR) despues di e rebelion di augustus 1977 cu el a modera su posicion. El a declara e ora ey cu mirando e desaroyonan positivo, no tin motibo pa proclama mas e independencia unilateralmente na 1981.

E GTR a keda instala den december 1978 y a finalisa su estudio na augustus 1980. E estudio aki mester a sirbi como base pa e Conferencia di Mesa Rondo. E intencion tabata pa traha acuerdonan durante e prome sesion di e Conferencia di Mesa Rondo, siguientemente duna e diferente delegacionnan oportunidad pa bay back nan islanan pa consulta y haya apoyo pa e acuerdonan y despues bolbe pa tuma e decisionnan den e di dos sesion di e Conferencia di Mesa Rondo cu a sigui algun luna despues.

For di e rebelion na augustus 1977 te cu e di dos sesion di e Conferencia di Mesa Rondo na maart 1983 tanto Hulanda como Aruba a pone e carta di independencia di Aruba riba mesa. Durante e prome sesion di e Conferencia di Mesa Rondo Hulanda ta bisa e delegacion di Aruba claramente cu si nan bay pa independencia Hulanda lo no yuda cu ningun di e garantianan pa e independencia politico y integridad territorial.

E delegacion Hulandes tabata consciente cu Aruba no por a riska independencia politico sin e garantianan Hulandes. Nan a reta e delegacion di Aruba cu si Aruba kier su independencia, e mester tuma esey e ora ey prome cu e fase transitorio durante cual, segun Hulanda, lo mester a prepara pa un fase final.

Confronta cu e reto aki Betico Croes a doblega pasobra e no kier a tuma e riesgo si Hulanda tabata “bluff” of tabata trata di un menaza serio. (ta sigui..)

 

- Advertisement -

DUNA COMENTARIO

Please enter your comment!
Please enter your name here