Home Comentario Un registro di tur arkitecto na Aruba ta necesario

Un registro di tur arkitecto na Aruba ta necesario

8
0
SHARE
- Advertisement -

Remitido

Apreciabel señor redactor di DIARIO, permitimi un espacio den bo corant pa comenta ariba un articulo di dia ocho di Maart ultimo unda cu e director di DOW ta anuncia di a entrega na minister documento cu tur exigencia pa construccion. Un bon proposito cual por encera tambe registracion di arquitecto activo den nos mercado.

Sin ningun ofensa ni falta di respet pa su persona of su posicion, mi lo kier informe cu ya for di aña 1985 ADIAA (arquitectonan uni), a solicita formalmente na gobierno, mediante un proposicion di ley, pa introduci un registro legal pa tur arquitecto kende activamente ta practica e profesion nobel aki. Bestuurscollege di e tempo aya a pidi un conseho na DOW concerniente tal peticion; pero te dia di awe ainda nos ta wardando.

Pesey awe, despues di mas di 33 aña sperando, porfin, un empeño di e director di DOW den conhunto cu gobierno, por logra esaki. Sinceramente mi ta spera cu esaki lo no bira otro promesa politico bashí of inutil. Registracion di un profesion ta algo basico na mayoria pais nan civilisa y progresivo, no solamente pa proteha y promove un profesion pero tambe pa contra aresta abuso den competencia.

Algo si cu director mester considera inmediatamente ta pa recomenda na ministro pa reėmplasa miembro nan actual di “welstands commissie” kende nan no ta cualifica pa e trabao aki. Mester nombra hendenan diploma of bon versa den e profesion aki pa evalua un proyecto basa ariba su contribucion artistico.

Cu tur respet pa e miembro nan actual, arquitectura ta un creacion cu proposito functional pero semper teniendo cuenta cu estetica. Un hende por tin hopi titulo pero no ta tur por sa algo di e arte di construi. Tambe mester preveni influencia politico den e asunto aki. Manera e ta actualmente ta ministro tin e ultimo palabra.

Ta bon ademas pa director considera pa introduci na gobierno leynan nobo pa responsabilisa DOW pa cu nan permiso den construccion. Actualmente, pa tur e beheid, menasa, y exigencia fraudulento cu ta tuma  lugar pa parti di DOW pa un simpel permiso di construccion, na e momento di un desastre den ehecucion, e oficial  ta dirti manera salo den awa. Manera custumber cada biaha atrobe ta falta di e contratista, falta di material, hasta falta di naturalesa, pero DOW mes no por wordu culpá.

Tambe sr. director mester percura pa e registro ta ariba nomber di e arquitecto personalmente y pa un tempo defini y asina preveni cu ‘scout-by-night” por lanta un n.v. y pretende di ta un ‘arshitec’.

Finalmente, e causa di hopi dolor di cabes di e director di DOW, manera e mes ta relata ta e ‘constructie tekening’.  Esaki ta un disciplina inherente di un arquitecto y no di DOW; “Beleid en Toezicht” mester ta solamente pa  aproba/desaprobra.

 

S.A. Feliciano,

BArch.

 

- Advertisement -

DUNA COMENTARIO

Please enter your comment!
Please enter your name here