Home Hudicial Via Whatsapp pedofilnan tabata chat cu mucha muher di 13 aña

Via Whatsapp pedofilnan tabata chat cu mucha muher di 13 aña

702
0
SHARE
- Advertisement -

ORANJESTAD (AAN): Diaranzon mainta den Corte den Promer Instancia a trata un caso hopi serio. Ta trata aki di un caso penal contra tres homber adulto, kendenan ta wordo sospecha di a tene relacion sexual cu un mucha muher di 13 aña na 2015. Tratamento di e caso aki a dura algun ora y DIARIO tabata e unico medio di comunicacion presente pa cubri e caso.

Den e articulo aki, DIARIO ta publica e tratamento di e caso caminda dos di e hombernan ta nenga retundamente di a tene relacion sexual cu e mucha, mientras cu un si ta admiti. Den un otro articulo DIARIO ta publica e exigencia di Fiscal y e sentencia di Hues.

E hombernan ta: G.(39), M.(43), y V.(46). Fiscal a acusa V. di a haci sex cu un mucha muher (13) entre 1 September 2015 te 31 December 2015. Fiscal a bisa cu e sospechoso lo a manda mensahenan pa traha un cita pa tene relacion sexual cu e mucha. M. ta wordo acusa cu entre 1 April 2015 – 30 November 2015, e tabatin relacion sexual cu e mucha muher. G. tambe ta wordo acusa cu entre 1 April 2015- 30 November 2015 tabatin relacion sexual cu e mucha. Ademas Fiscal a mustra cu dia 31 October 2015, G. y M. lo a viola e mucha.

Den tribuna ariba tabatin diferente persona presente mientras cu abou tabata mama di e victima y algun persona. Hues di Curacao cu tabata trahando na Aruba, a bin pa atende e caso.

    MUCHA A BASA ABOU NA SCHOOL

Hues a presenta puntonan di e procesverbaal caminda e mama dia 3 November 2015 a haci denuncia di abuso sexual di su yiu muher. For di school el a wordo yama caminda e mucha lo a conta maestra cu algo a pasa cun’e. El a bay school y su yiu tabata yora. E maestra a bisa cu e mucha a cont’e cu ta un homber di 37 aña a haci’e y den auto. E mucha lo tabata enamora di G. E mucha a sigui bisa cu el a haya lift di un homber 31 October 2015 y e homber bay na mondi y cuminsa mishi cun’e. El a bisa pa stop pero e homber a sigui y tene relacion sexual cun’e. E mucha lo a bisa cu el a wordo abusa door di 4 homber. Na 2016, e mucha cu a bay biba na Merca, a wordo interoga door di FBI. El a bisa cu e tabatin 13 aña y tabatin relacion cu G. Na October 2015, G. lo a viole pero promer nan tabatin relacion sexual diferente biaha voluntario. Tambe el a bisa cu e tabatin relacion cu e amigo di G., M.

E victima a splica con G. a tene mientras cu M. a viol’e. El a bisa cu e no tabata kier tin relacion pero G. a insisti. El a bisa cu G. tabata mand’e haci cosnan cu e no tabata kier esta saca potret di su mes sin paña, etc.

    INSTRUI MUCHA PA HORTA SU MAMA:

Tambe e mucha a bisa cu V. tabata manda mensahenan y cu el a tene relacion sexual cu V. diferente biaha. V. a bis’e pa horta joyas di su mama pa asina por paga apartamento pa tene relacion.

Polis a haya mensahenan di whatsapp di V. na e mucha. Tabata papia pa tene relacion sexual cu e mucha. El a bisa e mucha pa coy joyas for di su mama sino no ta papia cun’e mas. V. a bisa e mucha cu nan relacion mester ta scondi pasobra V. ta adulto. A bis’e cu nan por keda cu relacion tanten cu e mucha comporta su mes. E no kier pa e mucha bisa ningun hende di nan relacion, tampoco no manda mucho mensahenan. El a insisti pa e mucha horta joyas di oro di su mama pa asina e por haya placa pa bay paga apartamento.

    BISA MUCHA PA TIN RELACION CU MAS HOMBER:

Hues a bisa cu tabatin mensahenan entre G. y e mucha. G. tabata papia cu e mucha pa tin relacion cu M. y pa nan tin relacion den tres. Hues a puntra G. pakico y G. a bisa cu tabata manda mensahenan gewoon. Hues a remarca tanto na V. y G. cu e no ta haya e mensahenan normal sino hopi serio.

Hues a mustra cu G. a declara cu 4 biaha e tabatin relacion cu e mucha y el a kere cu e mucha tabatin 15 aña. El a bisa cu e mucha un biaha tabata kier tin relacion cu G. y M. Promer el a bisa cu tabata idea di e mucha pa tin relacion den nan tres pero Hues a mustra cu for di e mensahenan di apps e ta mustra completamente diferente. Ta resulta cu ta G. a pidi pa nan tin relacion den tres. Fiscal a remarca cu tin un mensahe di G. cu ta bisa e mucha pa tin relacion cu e hunto cu M. Segun G. esey pasobra cu e mucha ta gusta M. tambe.

    SOSPECHOSONAN TA DESMENTI:

M. ta para riba cu e no a tene relacion cu e mucha. El a bisa cu e no sa nada di mensahe cu e mucha. Hues a puntra M. si no ta asina cu dia e mucha a haci aña el a manda mensahe via facebook. M. a desmenti esaki.

E sospechoso V. a bisa cu e no tabatin relacion cu e mucha. El a admiti cu e tabata manda mensahe pa e mucha. El a bisa cu e tabata djis chat cu e mucha y mira con leu ta bay pero nada mas. Hues a puntra V. kico a haci cu e armband. V. a bisa cu e no a tuma e armband y nunca a topa cu e mucha. El a pidi disculpa den Corte na e mama pa a chat cu e mucha. E ta para riba cu e no a topa cu e mucha. Hues a puntra cu si no a topa riba veld di Estrella. Segun V. el a topa cu e mucha pero nada.

Fiscal a remarca cu si mira chat di e mucha, October 2015, e ta crea e impresion cu e mucha a tene relacion sexual cun’e. V. ta para riba cu no. El a bisa cu e tabata djis chat. Hues a remarca cu e no ta considera esaki chat.

Ta un homber di riba 40 aña cu un mucha di 13 aña. Esaki no ta nada simple manera V. ta pretende sino algo serio. Fiscal a mustra cu via chat V. ta bisa e mucha cu ningun hende mester sa di nan relacion y cu si e comporta su mes, nan por keda. Segun V. tur cos tabata via chat y nada mas.

Fiscal a remarca cu hasta V. a bisa e mucha, ora el a bisa cu Polis a haya cos di su cellular, pa kita tur cos for di cellular. V. ta para riba cu e lo a chat no mucho bunita cu e mucha pero esey ta tur. E ta lamenta di a haci esaki. Fiscal a bisa con por ta cu e mucha ta bisa di a tene relacion cu V. E sospechoso V. ta para riba cu e no tabatin relacion sexual cu e mucha y tampoco a conoce e mucha.

Pa lesa e sentencia, CLICK AKI

- Advertisement -

DUNA COMENTARIO

Please enter your comment!
Please enter your name here