Home Gobierno Aki no ta trata di persecusion politico, sino un Gobierno di integridad,...

Aki no ta trata di persecusion politico, sino un Gobierno di integridad, ordo y respet

102
0
SHARE
- Advertisement -

Minister Otmar Oduber:

ORANJESTAD (AAN): Durante un conferencia di prensa  Diabierna, Minister di Infrastructura y Medio Ambiente Otmar Oduber a reacciona riba e hecho cu tin hende ta bisa cu e ta ocupa su mes cu persecusion politico, relaciona cu e Task Force Beach Policy.

E mandatario a indica cu e veredictonan di corte recientemente no tabata veredictonan cu duda.

“Mi ta lamenta cu Arthur Dowers di fraccion di AVP a trece den publicidad y a hasi politica cu e sentencia di Coco Loco Kiosk cu tin riba beach, pasobra nos a cana un proceso simplemente di percura pa ordo y respet wordo re-institui den e pais aki”.

“Pa un Minister cu tabata carga e funcion di Husticia durante 8 aña Sali y defende e hecho cu construccion ilegal ta tuma lugar, ta algo di lamenta”.

“Den esaki tabata tin tambe beneficionan ilegal tumando lugar cu contratonan contra ley”.

Esaki segun Oduber, kende a indica cu huez tabata hopi cla den su sentencia pa loke ta e caso di Coco Loco.

El a sigui bisa cu e idea tras di e kiosconan tabata pa sirbi e cruseronan, pa hala e turistanan for di dilanti e hotelnan y cu tur e kiosconan aki a wordo construi igual cu nan baño y otro espacionan.

“Den e caso di Coco Loco nan a dicidi pa djis coi e bañonan y cera nan, pa uza nan como warehouse pa su persona”.

“Sin permiso di construccion e mes a dicidi di traha bañonan pafo pa e cobra e turista cu ta bin y banda di esaki el a traha un cushina na un forma cu e ta contra e permiso di DIP cu e tin pa opera e kiosco aki”.

“Ainda riba su mes el a dicidi pa bay opera 200 stoel cu parasol, mientras cu e tin permiso pa opera 70”.

Esaki segun e minister, kende a sigui bisa cu ainda e minister anterior di husticia kier Sali defende esaki y bisa cu ta trata di persecusion politico.

“Aki no ta trata di persecusion”.

“Tur hende mester actua segun e permiso cu nan tin, segun ley y cumpli cu loke ta fatsoen riba nos beachnan”, segun Oduber.

El a indica cu den tur 4 caso unda cu Gobierno a wordo hiba corte, huez a pone bon cla cu e companianan no ta actua conforme e permiso cu nan tin.

“Aki ta un Gobierno di ordo, respet y integridad y proximamente nos ta bay atende cu man fuerte loke ta trata construccion ilegal di condominiums y permisonan cu a wordo duna contra ROP y nos ta bay pone esnan responsabel pa esaki, para responsabel”, segun e mandatario.

 

 

- Advertisement -

DUNA COMENTARIO

Please enter your comment!
Please enter your name here