ORANJESTAD (AAN): Diadomingo merdia un cantidad di famia y conocir, y demas candidatanan actual y di pasado di Miss Youth Aruba, como tambe e comision organizador tabata presente na Aeropuerto Internacional Reina Beatrix, ora cu e simpatica dama hoben, Sharlena Clarinda a regresa for di Republica Dominicana.
El a logra di conquista e titulo maximo di “Teen Princess World International 2018”, y esaki a pone tur su fanaticonan na Aruba bira loco di alegria.
Fuera di esey, Sharlena a logra bay tambe cu premio di Mihor Trahe di Fashion, Mihor Model, y Mihor Pasarela.
Aki por mira mas di momento cu su amigo- y famianan a spera riba dje na Aeropuerto.
E organizador na Aruba di Miss Youth Aruba, esta Robin Croes-Ponson ta hopi orguyoso cu nan comision hoben cu apenas tin algun aña di existencia, ya a logra un titulo internacional.
E ta hopi contento cu e papel cu Sharlena a hiba na Republica Dominicana, como tambe su personalidad cu a briya na e pais di Merengue. Su makeup y cabey haci pa Nelson Tovar, a pone sobresali durante tur e dianan cu el a pasa eybao.
