Home Comentario Ban stop di pensa emocional encuanto marihuana

Ban stop di pensa emocional encuanto marihuana

7
0
SHARE
- Advertisement -

Remitido

Sr. Redactor, permiti mi un espacio den DIARIO pa mi trece lo siguiente dilanti.

Mi ta contra tur adiccion pero esaki ta depende di e persona mes. Si bo ta bebe alcohol bo no tin ningun derecho di reclama of critica ningun hende cu ta usa droga sea loque sea ya cu alcohol ta e peor droga cu tin pero e ta legal.

Marihuana nunca lo por ser elimina ya cu e ta un planta cu ta crece den naturalesa y ta naturalesa ta entregu’e na hende. Ya cu no por elimin’e y hopi ta gana dineral cu ne anto pakico no legalis’e y asina esnan cu ta haci negoshi cu esaki lo paga nan belasting y contribui na caha di gobierno.

E mester bay cu hopi regla estricto si, y si haya bo ta bende un menor of duna un menor droga of usa esaki den presencia di un menor bo lo ser sanciona severamente.

Ban stop di pensa emocional y ser mas racional y pensa cu logica. No por elimin’e ni awe ni mayan ni aki cien aña, anto pakico no legalis’e cu reglanan hopi estricto y cobra impuesto di e ingreso aki ya cu hopi placa ta lora den e negoshi aki.

Mira e caso di Dr Sanjay Gupta cu tabata masha contra mes contra cannabis pero despues di a mira prueba y a educa su mes awe e ta un di e defensornan mas renombra di marihuana medicinal.

Naturalmente ta trata di marihuana medicinal y no recreacional pero e moraleha ta cu e tabata contra y despues di a habri su mente y a educa su mes el a cambia su pensamento y posicion. El a laga sano huicio gui’e y a laga emocion y mal informacion atras y a cambia di pensamento.

Abo tambe ciudadano por haci mescos y educa bo mes y haya sa e berdad y manera e bijbel ta bisa: busca e berdad y e berdad lo haci bo liber.

Oposicion sigur sigur lo bay opone na legalizacion di marihuana pasobra cu nan sa masha bon cu esaki lo genera hopi entrada pa caha di gobierno loque eventualmente lo por yuda nos sali for di e debacle financiero cu nan a causa.

Si gobierno actual haya entrada pa medio di belasting di legalisacion di marihuana posiblemente lo por elimina cierto medidanan cu Caft ta exigi pa nan tuma. Esaki naturalmente no ta cumbini oposicion y nan no kier pa gobierno actual haci un bon papel ya cu esaki lo haci nan oportunidad di bolbe na poder hopi menos.

 

Un ciudadano.

(Un persona cu ta pensa cu

sano huicio y no emocional).

 

- Advertisement -

DUNA COMENTARIO

Please enter your comment!
Please enter your name here