Home Comentario Chofer coriendo jeep cu ta huur cu turista a sali for di...

Chofer coriendo jeep cu ta huur cu turista a sali for di e rij y core meymey caminda

15
0
SHARE
- Advertisement -

Ciudadano ta denuncia situacion peligroso:

ORANJESTAD (AAN) –Aunke ta trata di algo cu a sosode Diamars atardi, y a wordo treci dilanti Diaranzon, toch ta bon pa no ignora e critica aki di un ciudadano, pasobra sigur e ta na su lugar.

E ciudadano tabata coriendo riba Santa Helenastraat den direccion di Smith Boulevard, na momento cu biniendo di e direccion contraria el a topa cu varios jeep cu ta wordo gehuur cu turistanan.

Tabata un rij cu nos por mira casi tur dia riba caminda. Na dado momento un di e chofernan a dicidi di sali for di e rij y core meymey di e caminda poniendo na peligro e chofernan cu tabata bayendo den direccion di Smith Boulevard, of cu kier a lora bay Madiki, etc.

Chofernan cu a sinti nan mes na peligro mester a hala pisa na banda drechi di e caminda, y a pita, pero e chofer di e jeep a sigui core na velocidad halto pasa tur otro jeep su dilanti, comosifuera e ta doño di e caminda y no tin ni un auto mas den circulacion pareu cune.

No por! E ciudadano a expresa. E no sa si ta un turista mes tabata na stuur of un trahador di e compania bon conoci cu tin e negoshi aki, den cercania di Certified Mega Mall.

E ciudadano cu a trece esaki dilanti no por a saca potret pasobra di e susto cu el a haya no por ni a cende e camara di su celular. Pero e ta haci un yamada si na e compania concerni pa averigua si ta un di su chofernan tabata tras di stuur of un turista mes.

Cual cu sea e caso, nan mester instrui sea e local of e bishitante cu e practica aki ta contra ley di trafico y principalmente cu por afecta e bida di otro ciudadanonan cu tambe ta coriendo riba e mesun caminda y peor ainda, biniendo den direccion contrario.

- Advertisement -

DUNA COMENTARIO

Please enter your comment!
Please enter your name here