Home Hudicial Dama cu ta sufri di epilepsia y tumor a mustra Huez cu...

Dama cu ta sufri di epilepsia y tumor a mustra Huez cu “cannabis oil” a yud’e

582
0
SHARE
- Advertisement -

Fiscal ta comprensivo cu aunke marihuana ta ilegal e ta yuda medicinal

ORANJESTAD (AAN): Diahuebs mainta Fiscal a expresa su comprension pa e hecho cu apesar cu marihuana ta contra ley, e ta yuda medicinal.

El a expresa esaki despues cu un dama, kende ta worde acusa di posecion di un lote di marihuana, a bisa cu e cannabis oil a yud’e masha hopi cu su malesa epilepcia y tambe un tumor cu e tin den su cabez. Finalmente Fiscal a exigi un castigo condicional manera un aviso y Hues a confirma esaki.

CUKI DI MARIHUANA:

Hues a bisa cu segun e relato di Polis, dia 28 September 2017, Polis durante un control, a para e auto den cual e dama tabata hunto cu su partner. E agentenan di Polis a sinti holor di marihuana y a puntra si tin cosnan contra ley.

E dama a duna Polis e sigaria cu el a huma for di dje. E guy a bisa cu tin cuki di marihuana. Asina Polis a haci investigacion den e auto y a haci un bleki cu sakitonan di marihuana cu ta mustra claramente cu ta pa bende.

CANTIDAD DI DROGA NA CAS:

Despues a bay na e cas y a haya diferente mata di marihuana. Den frishidaire a haya marihuana. Den e veranda a haya un baki cu masha hopi marihuana aden. A haya mas koeki di marihuana, sakitonan di marihuana. A haya cannabis oil y diferente otro cos mas.

A pisa e droga confisca y cuki na cas y resulta 4.586 gram. A manda diferente muestra di loke a confisca pa laboratorio pa determina si ta marihuana. Laboratorio a constata cu tur ta contene e THC di marihuana.

USA CANNABIS OIL:

E dama a declara na Polis cu e ta usa marihuana pasobra e ta malo. El a bisa cu e solamente sa di e cigaria pero no e otro cosnan den e auto. Hues a mustra cu na Polis e dama a bisa cu e tabata sa di e cukinan.

El a bisa cu ta su amigo a traha diferente cuki p’e di marihuana. E dama a para riba cu e no a bisa asina na Polis. Hues a bisa cu e dama no a firma e declaracion skirbi pa Polis. E dama a bisa Hues cu e ta usa marihuana pa su malesa di epilepsia y tambe e tin tumor.

Hues a bisa cu e dama ta bibando cu e amigo den e cas y loke tin den e cas, e dama tambe ta responsabel. El a desmenti cu el a bisa Polis cu su amigo a traha diferente koeki di marihuana p’e y cu tur dia nan tabata come cuki di marihuana. Hues a puntra e dama si e no a mira e droganan den e cas y hasta den camber. Segun e dama, e cas ta hopi reboltea y no a mira nada. Hues ta haya esaki hopi straño.

E dama a splica Hues con e tabata usa e cannabis oil y cu awor e no ta usa mas sino bebe pildernan. El a bisa Hues cu e cannabis oil a pone e tumor bira mas chikito. El a bisa cu e cannabis oil tabata controla e dolor hopi.

EXIGENCIA FISCAL:

Fiscal a bisa cu e dama a bisa cu e ta usa marihuana pa su salud. Fiscal a expresa di ta comprendibel cu si ta usa marihuana, aunke e ta contra ley, pa salud.

Na opinion di Fiscal, loke ta haci e caso fastioso ta e hecho cu apesar cu a haya cantidad di marihuana na cas, e dama ta desmenti di sa di e droga. Fiscal a bisa cu abiertamente tabatin droga na diferente parti den e cas.

Fiscal a bisa Hues, si e marihuana tabata solamente pa salud, lo tin comprension pa esaki pero mirando e cantidad di droga, entre otro cuki, sakitonan di marihuana cu ta mustra cu lo ta pa bende. E partner di e dama a worde condena anterior pa droga. Fiscal a bisa cu e kier duna e dama un aviso. El a exigi 60 ora di trabao of dia of 30 dia sera pero completamente condicional.

   ABOGADO:

Mr. Falconi a bisa Hues cu e partner di e dama a reconoce cu e droga tabata di dje y tabata bende. E dama a admiti di tabata usa marihuana pa su salud. E abogado a mustra cu e dama tin su trabao y no tabata beneficia di bendemento di droga.

E abogado a bisa Hues cu ken ta bay laga un cantidad grandi di marihuana den un baki den veranda. Segun e abogado, e marihuana cu a haya den veranda no tabata sirbi y tabata pa benta afor. El a pidi Hues pa tene cuenta cu e dama ta trahando y cu door di su salud, e no por bay traha pa comunidad ya cu hopi biaha e ta AO.

SENTENCIA:

Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu e dama tabatin droga cun’e. Na opinion di Hues, den e auto tabatin droga y den e cas tambe. Hues a tene cuenta cu nunca antes e dama a haya castigo. El a bisa cu no a persigui e dama pa bende y no a proba tampoco cu el a bende sino cu e tabatin cun’e. Hues a haya e exigencia di Fiscal na su lugar y a condena e dama na e castigo condicional.

 

- Advertisement -

DUNA COMENTARIO

Please enter your comment!
Please enter your name here