Clifford Rosa ta elabora:
ORANJESTAD (AAN)— Señor Clifford Rosa, presidente di Fundacion Rancho, a elabora den entrevista cu nos redaccion tocante e celebracion di Dia di Rancho y casualmente e di ocho aniversario di e Fundacion.
Un bunita actividad cu a conta cu sosten di sector priva. Sr. Rosa a expresa palabranan di gratitud pa Museo Arkeologico cu sin su colaboracion awe no tabata tin Fundacion Rancho. Asina el a menciona.
Fundacion Rancho ta sigui traha pa educa y informa nos comunidad y nos bishitantenan, tocante tur locual Rancho tin pa ofrece, no solamente den su aspecto monumental, pero tambe den su historia y cultura y kico ta e miras pa futuro.
Riba tur 20 di April cada aña lo sigui celebra Dia di Rancho y aworaki a duna inicio na un proceso unda cu e fundacion ta bay traha cu su propio fondonan, pa medio di “Rancho Walking Tour”.
Di e manera aki lo genera entrada pa su gastonan operacional y haci trabao cu e comunidad mes, mirando cu sin sosten financiero hopi di e proyectonan cu nan tabata tin planea no por a lanta cabes.
No obstante, ya caba a organiza varios actividad pa ehecuta e proyectonan cu a keda pendiente.
