ORANJESTAD (AAN): Esaki ta e di 10 aña cu e organizacion local di GLW Foundation ta organizando e certamen di Miss Teen Aruba International.
Diasabra anochi durante un evento special den aire libre na Divi Village, a introduci e siete candidatanan cu ta bay competi e aña aki pa e titulo. Ta trata aki di Sarah van der Steen, Karen Ann Odor, Kiandra Pop, Anaisa Marquez, Clarissa de Weever, Anaindy Binda, y Claudia Diaz.
Cada uno a presenta cu nan famia, y tambe cu nan patrocinador riba escenario. E actual Miss Teen Aruba International 2017, esta Kiara Arends, tabata hopi activo e anochi yudando e candidatanan nobo.
George Winterdaal a mustra di ta satisfecho cu e seleccion di candidatanan pa e aña aki. El a gradici mayornan y esnan cu ta patrocina e certamen pa nan confianza y sosten.
E anochi aki tambe a probecha pa divulga cu fin di Mei lo start algun siman largo relaciona cu un competencia internacional di Turismo cu ta bay tuma lugar na Aruba.
Na e ocasion aki, a corona Layevska Farro tambe como Little Turismo Mundial Aruba.
DIARIO a nota presencia di numeroso Miss y Reina di Carnaval na e actividad aki. Di awor caba ta desea tur candidata, hopi exito den e temporada aki.
