Home Labor Falta e respet pa trahado

Falta e respet pa trahado

88
0
SHARE
- Advertisement -

Hubert Dirksz di FTA reflehando riba dia di obrero:

ORANJESTAD(AAN): Lo recorda dia 1 di Mei, dia di Labor. Toch como un di e sindicatonan mas grandi na Aruba, sigur den e area di sector priva, Hubert Dirksz, presidente di FTA ta duna un bista bek riba e clase trahado.

E ta splica cu e clase trahado na Aruba, danki Dios cu tin e economia di turismo cu ta florece y ta duna trabao. Pero falta e respet pa trahado. Tambe falta mas inversion den e trahado. Si ta papia di turismo, mester papia di e servicio y di un producto turistico. E ser humano den e industria aki ta conta hopi.

E ser humano kiermen cu tur hende cu ta traha cu turismo mester por cumpli cu su trabao riba un nivel halto. Pa esaki tuma luga, tin cu inverti, tin cu percura pa e trahado ta contento. Ta yega un momento cu no solamente e conocemento sino tambe e salario. Un hende cu placa den cartera of riba nan cuenta tin tendencia di ta mas contento.

Un hende contento tin e tendencia di sirbi miho. Mester mira esaki.

Como gremionan, gremio comercial tambe mester wak esaki. Na momento sigur ora cu ta papia di productividad laboral, tin cu papia riba e siguridad di e trahado, inversion den e trahado, pa mantene e calidad y producto cu ta bende na clientenan, den e caso aki e turista cu ta bin bishita nos. Ohala cu esaki tuma luga.

E fecha di 1 di Mei, ta un fecha memorabel cu no sin mas ta un dia di descansa. Ta un dia mas bien pa por reflexiona, pasobra ta hopi cos a pasa pa a yega na pone e fecha aki como dia di labor. Pasobra ta hopi sacrificio a tuma luga na diferente parti di mundo y sigur na Merca caminda e trahado y su famia mester a lanta contra abuso, contra explotacion di trahado, entre otro 8 ora di trabao.

8 ora di trabao awendia, yama flexibilisacion laboral, ta forsa pa e trahado traha mas tanto posibel y tin caminda ta trahando 9 ora pa dia y ta hayando un forma di paga bek, esta timeback, cu no ta pago di salario. Tur esaki ta bon pa mira. Por balansa, yega na un acuerdo pa esakinan., cu ta na satisfaccion di e trahado y e dunador di trabao. Pero mester wak cu e flexibilisacion aki no ta bay acosto di e trahador y su famia.

E calidad di bida cu nan mester tin, cu si tin un fayo, un explotacion, un problema den e caso aki, causa pa e leynan cu ta rigi cu esaki, mañan bo ta haya probema social, cu tin su impacto riba e situacion laboral. Ta prefera pa preveni esaki. Pesey mes na mesa mester sinta pa atende cu esakinan.

Dia 1 di Mei, dia di labor, ta un dia cu tur sindicato na mundo ta supone di manda un mensahe cla pa e partnernan den comunidad. Tanto e dunado di trabao como gobiernonan. Den e caso aki na Aruba. E preocupacion di FTA ta cu e trahado den e caso aki su derecho, e trato cu e ta ricibi, ta cuestionabel. Entre otro, e garantia di trabao, pasobra pa motibo di kier crea productividad laboral, flexibilisacion laboral, ta exigi of ta viola e derecho di trahado pa traha permanente.

Tur trahado y funcion permanente, companianan kier pone esaki pa traha temponan cortico defini. Ta totalmente contra e trahado e y su fama y e sindicato. Ta kere esaki pa awor aki mester ta para, pasobra e no ta na beneficio di e clase trahado. Esey ta un punto cu ta kere firmemente cu mester ta atendi.

E otro punto ta cu e participacion di e gremio sindical den tu loke ta sosode riba e pais aki. Gobierno, ohala por haya mas participacion den e discusionnan cu tin, no solamente e situacion desafiante cu tin pa loke ta e situacion financiero di pais Aruba, pero tambe e otro situacionnan.

Aruba ta un isla chikito. E situacionnan ta desafiante. Pesey mes ta un momento pa sinta hunto y atende cu esakinan. Sigur ta loke cu ta e bon gobernacion, ta conta cu esey lo por haya mas espacio den e gobierno actual sigur y pa futuro tambe cu esey lo por yuda cu nos gastonan lo por bira menos y lo por yuda tambe cu lo por tin suficiente placa pa duna atencion na e situacion social di e trahado.

Cu esey, pa e dia di obrero, e sindicatonan lamentablemente no tin union manera cu ta desea, pero sigur cu mester por laga nan mensahe zona, pa e partnernan cu tin den nos comunidad, cu ta e dunador di trabao y gobierno.

Ohala cu e trahadornan di Aruba reflexiona mas tanto cu ta posibel y por yega tambe na construi mas pilar economico cu no ta solamente turismo cu ta actualmente.

 

- Advertisement -

DUNA COMENTARIO

Please enter your comment!
Please enter your name here