ORANJESTAD (AAN): Diadomingo 15 di april a tuma luga pa di 38 aña e popular Fiesta Rotaria organiza pa Rotary Club of Aruba. For di oranan trempan den mainta tabata tin un publico grandi cu tabata presente na e parking lot di Compleho Deportivo Guillermo Trinidad na Dakota.
E aña aki un biaha mas tabata tin hopi producto, manera muebels, verf, comestibel, mata, paña, prendanan y articulonan electronico, boeki y hopi mas, na benta na prijsnan hopi atractivo! Ademas di esaki tabata tin hopi stand di bebida y cuminda, por a cumpra BBQ y tambe diferente snacks.
Henter famia por a pasa full un dia na Fiesta Rotaria ja cu pa cada gusto tabata tin algo. A dedica un huki special pa nos muchanan cu diferente wega nan popular, den e famoso “kids corner”. Cual e aña aki tambe tabata tin na benta bruki den tur size pa mucha y hende grandi.
E publico presente por a disfruta di diferente show di baile di Club di Movimiento y Pierewietje. Tambe di Club Kibrahacha 60+ tabata presente cu diferente obra di man di nan miembronan. Despues di merdia ‘NFuzion a deleita e publico te banda di 6’or di atardi.
Na final di e Fiesta Rotaria a saca e numbernan ganador pa e rifa den presencia di notario. E aña aki pa solamente Afl. 25,- bo por gana un di e 12 tremendo premio nan. Bo por mira e numbernan ganador aki.
Masha pabien na tur ganador cu den e siguiente dianan lo worde acerca pa por entrega e premionan. Y hopi danki na tur esnan cu a aporta na Fiesta Rotaria sea cu a bin bishita nos of cumpra rifa. Nos ta conta cu bo(so) contribucion atrobe otro aña, asina President Gerardo Oduber a comenta.
Rotary Club of Aruba kier a gradici tur su miembronan, Rotaractors, Interactors, boluntarionan y sponsors cu a contribui na un tremendo y exitoso Fiesta Rotaria y tambe e rifa posibel un biaha mas. E aña aki Rotary Club of Aruba a logra recauda Afl. 375.000 net, masha danki pa boso contribucion, cu esaki Rotary Club of Aruba por sigui yuda nos comunidad.
