Home arte y espectaculo Fundacion CINEARUBA ta contribui na e desaroyo intelectual y social di comunidad

Fundacion CINEARUBA ta contribui na e desaroyo intelectual y social di comunidad

7
0
SHARE
- Advertisement -

ORANJESTAD   (AAN):   Desde cu e fundacion a wordo funda na 2010 e ta trahando riba e tereno social, cultural y educativo pa medio di actividadnan cu ta conecta tur sector cu otro. Cu actividadnan educativo cu tin un balor cultural inmenso CINEARUBA ta contribui na e desaroyo intelectual y social di comunidad.

Cada aña fundacion CINEARUBA ta crea actividadnan envolviendo mucha, hoben y adulto. CINEARUBA su actividadnan tin un impacto social riba cada mucha, hoben y adulto cu ta participa na e actividadnan di fundacion CINEARUBA. Ademas cu e proyectonan ta contribui na e desaroyo personal di cada participante, tambe e ta contribui na e desaroyo intelectual y na e desaroyo di talento di cada persona.

Comienso di aña 2018 fundacion CINEARUBA a colabora cu Unicef pa crea peliculanan cortico conhunto cu e alumnonan di scolnan basico pa Unicef su festival di cine tocante derecho di mucha.

CINEARUBA a guia alumnonan di cuatro scol basico cu e creacion di nan peliculanan cortico tocante derechonan di mucha. E storianan conta for di e punto di bista di e propio muchanan tabata ilustra e situacionnan social cu ta bibando den varios cas na Aruba.

Pa medio di cine a brinda e muchanan un plataforma pa expresa nan mes y trece dilanti tur nan precupacionnan y nan deseonan di por tin un bida mas digno y saludabel. Pa e mes un motibo CINEARUBA a crea un programa cu lo yuda tanto mucha y hoben pa por tin acceso na actividadnan educativo cu lo contribui na un desaroyo sano di cada mucha y hoben.

‘Film into School’ Cine den Klas ta un di e programanan educativo di fundacion CINEARUBA cu ta enfoca riba desaroyo di habilidad y desaroyo personal, unda cu cada alumno lo siña e tecnicanan con pa traha pelicula pero tambe e alumno nan lo siña con pa comunica den grupo, traha den grupo, resolve problemanan, autodeterminacion y pa ta mas sigur di nan mes.

E tayer aki ta wordo duna durante orarionan di scol pa dos ora y e ta aplicabel pa alumnonan di scolnan basico y secundario. Pa mas informacion por bishita CINEARUBA su pagina web.

Ademas di Cine den Klas fundacion CINEARUBA tin otro programana educativo tanto pa hoben como adulto. CINEARUBA ta ofrece tayer di ‘Production Management’ cu ta pa personanan cu kier traha un pelicula pero no sa con pa plania nan produccion. Tambe CINEARUBA ta ofrece ‘Masterclasses’ tocante desaroyo di storia pa cine, contamento di storia via e medio visual, recursonan di cine y promocion di cine.

E aña aki por spera otro activdadnan social y cultural di fundacion CINEARUBA cu e meta di trece e comunidad mas cerca di otro. Drama den Aire ta e fundacion su proyecto nobo cu lo provee un plataforma na tur esnan interesa den actuacion, zonido y musica pa asina crea un novela pa radio cu lo wordo transmiti ‘live’. Sigur un reto pero tambe un oportunidad pa ta activo y expresivo. Atencion lo wordo pone riba nos idioma Papiamento unda cu participantenan mes lo skirbi nan storia pa uza durante e presentacion di e novela.

Ta bek e aña aki ‘Rooftop Film Club’ y ‘Shortcutz Aruba’ dos actividad cu a inicia na 2017. Debi na e acogida grandi durante aña pasa, e dos actividadnan aki lo ta bek e aña aki. Cine tin e poder di trece hende mas cerca di otro y crea conbersacionnan, pero tambe cine ta inspira. ‘Shortcutz Aruba’ e aña aki lo amplia su categoria pa asina provee un plataforma na esnan cu ta haci musica tambe. E categoria di ‘Shortcutz Aruba’ di e aña aki lo consisti di: Cine Narativo, Cine Documental, Cine Experimental y Video Clips.

E aña aki fundacion CINEARUBA lo estrena su prome serie di television Ciudad Oraño, un proyecto cu a wordo crea pa e hobennan di e ‘Into Acting Youth Club’ forma na 2015. E club hubenil ta bek e aña aki cu un grupo pa hoben y mucha. E club ta enfoca riba desaroyo di talento, personal y intelecual. Un club cu sigur lo contribui na un desaroyo positivo di cada mucha y hoben.

Pa mas informacion tocante e programanan y e actividadnan di fundacion CINEARUBA por bishita e fundacion su pagina web www.cinearuba.com.

- Advertisement -

DUNA COMENTARIO

Please enter your comment!
Please enter your name here