Home Hudicial Homber ta maltrata su señora cu despues di hopi aña casa ta...

Homber ta maltrata su señora cu despues di hopi aña casa ta bay lag’e pa un muher

478
0
SHARE
????????????????????????????????????
- Advertisement -

ORANJESTAD (AAN): Diahuebs mainta Hues a intermedia den un forma hopi profesional pa asina logra cu e dama A. a acepta disculpa di e homber P.

Parce cu e homber tabata kier a pidi disculpa anterior pero A. a bisa cu e no ta dun’e balor. Hues ta haya cu apesar cu e pareha a separa, tin yiunan envolvi cu nan mester sigui atende cu nan.

E homber P. a admiti di a dal A. un mokete pasobra A. a bay lag’e pa un  muher y A. no tabata wak pa e muchanan mas.

MALTRATO:

E acusacion contra P. ta cu dia 9 October 2017, el a dal su señora cu mokete den cara. Hues a mustra cu na Polis, P. a admiti di dal A., un agente di Polis femenino, cu mokete na cara.

Ta asina cu P., un ex agente di Polis, a presenta sin abogado. E mes a hiba su defensa. El a bisa Hues cu esaki ta consecuencia di rabia cu el a wanta durante periodo largo.

BAY LAGA HOMBER CU YIUNAN:

P. a bisa Hues cu nan tabata casa 15 aña largo hunto y despues A. a dicidi di separa pa bay cu un otro muher. Segun P., A. a bay laga e muchanan cerca dje y sin busca nan drechi. E muchanan tabata yora anochi puntra unda nan mama ta.

P. a bisa Hues cu tur su rabia e mester a disimula y splica e muchanan cu nan mama tin otro cosnan di haci. P. a bisa cu el a haya rabia cu A. no tabata worry mes cu su yiunan.

A surgi un momento caminda A. no tabata contesta cellular siendo P. tabata core su tras. P. a sera e auto di A. y a surgi discussion y hasta Polis a yega. E momento ey A. a bisa Polis pa detene P. y e ora ey P. a dal’e. Segun P., despues di e incidente, A. a cuminsa wak pa e muchanan.

Hues a puntra P. si el a pidi disculpa na A. pa loke el a haci. P. a bisa cu el a pidi A. pa nan papia y pidi disculpa pero A. a bisa cu e no ta haci caso di e disculpa. Esey a haci cu P. no a pidi disculpa pasobra na opinion di P., e no tin valor toch.

Ta asina cu A. tabata presente den sala di Corte pa haci demanda di daño contra P. Hues a puntr’e si e ta dispuesto pa ricibi disculpa di P. den Corte y el a bisa ta bon. E ora ey A. a bay dilanti y P. a lanta para y pidi disculpa. Nan a hasta duna otro man. Hues a haya esey hopi bon pasobra como mayor nan tin cu sigui atende cu e muchanan.

Hues a mustra cu P. tin un carchi di castigo cu na 2011, como Polis el a worde condena pa maltrato. Na 2013 atrobe como Polis el a worde condena pa maltrato cu menaza y a worde kita for di Polis.

DEMANDA DI DAÑO:

E dama A., a presenta demanda di daño na Hues. El a bisa cu e auto a sufri sla riba e hood y e holoshi a kibra. P. a bisa cu su intencional no tabata pa kibra e holoshi. El a bisa tambe cu si A. no a manda auto riba dje, e lo no a cay riba capa di motor. Cu esaki P. kier mustra cu e no ta dispuesto pa paga ningun daño.

EXIGENCIA DI FISCAL:

Fiscal ta haya legalmente proba cu P. a dal A. El a bisa Hues cu ta un pareha cu lo mester traha cu otro pa nan yiunan. Fiscal ta haya cu P. ta honesto di bisa con tur cos a pasa y a dal A. El a tene cuenta cu e carchi di castigo di P. y a exigi 60 ora di trabao pa comunidad di cual 20 ora ta condicional cu un tempo di prueba di 2 aña.

Pa loke ta e demanda di daño, Fiscal a remarca cu no tin nada para di procesverbaal di Polis cu tabatin daño. Pesey Fiscal ta haya cu mester declara e e demanda no admisibel.

SENTENCIA:

Hues a sera tratamento di e caso y a dicta sentencia di biaha. Hues ta haya legalmente proba cu P. a dal A. pero ta haya cu mester tene cuenta cu circumstancia. Hues a sigui bisa cu esey no ta hustifica loke P. a haci.

Teniendo na cuenta cu dentro di poco P. lo haya trabao, Hues a confirma exigencia di Fiscal.

Pa loke ta e demanda di daño, Hues a bisa cu e por compronde cu A. a sufri daño na e capa di motor di e auto y cu su holoshi a kibra. Hues tambe a remarca cu no tin nada para den e procesverbaal y no tin suficiente informacion. Hues a declara e demanda no admisibel. Esey kiermen cu A. lo por cuminsa un caso civil.

 

- Advertisement -

DUNA COMENTARIO

Please enter your comment!
Please enter your name here