Home Comercio KvK bogando pa mas inversion den educacion y salubridad

KvK bogando pa mas inversion den educacion y salubridad

14
0
SHARE
- Advertisement -

Camara di Comercio kier pa Aruba bira un “medical tourism island”

ORANJESTAD (AAN): Diaranson 11 di april ultimo, miembronan di Directiva di Camara di Comercio y Industria di Aruba (KvK) a tene un reunion cu Minister Presidente, señora E. Wever-Croes durante cua a elabora riba diferente topico pa stimula economia y comercio di Aruba.

Pa KvK e ta un grato placer pa ricibi e invitacion pa sinta cu e Premier y di e forma aki contribui na e desafionan cu e gobierno actual tin cu maneha y logra sobrepasa. KvK en particular ta mustra su preocupacion encuanto e situacion financiero di pais Aruba. Pa e situacion dificil aki gobierno mester bay tuma algun decision cu no ta facil pero si necesario.

Premier a indica cu gobierno tin bista riba nan propio gastonan y un di e post mas grandi ta esun di gastonan di personal. E parti di reduci personal mester bay na un forma structural y prudente.

Recientemente, KvK  a haci un curso di “Corporate Governance” y Premier ta haya cu esaki ta algo hopi importante cu tur compania mester haci pa asina aki por mustra integridad, y tambe ta pensa cu gobierno tambe lo mester por organiza algo similar pa companianan estatal. KvK a sugeri cu pa e parti di ‘Corporate Governance” mester di personanan cu ta “business-minded” y integro.

Otro gasto bastante halto ta di e proyectonan PPP cu lo yega pa otro aña entre 80 pa 90 miyon Florin. Esaki ta un di e motibonan pakico gobierno mester a introduci e “crisisheffing” temporario. E parti temporario lo obliga gobierno pa introduci mas pronto cu ta posibel e “tax reform” cu ta algo cu mester a worde implemente for di hopi tempo caba segun Premier.

Actualmente gobierno ta negoshando cu Hulanda encuanto e futuro di pais Aruba. Den e cuadro aki por indica cu Hulanda kier mira un crecemento hopi conservativo. Pronto lo bay trece mas informacion encuanto con ta bay stimula e crecemento aki.

Premier a comparti cu e ta haya importante cu KvK por forma parti di un “think tank” cu meta pa yuda stimula economia pa futuro di Aruba.

KvK a comparti e sentimento cu tin un desbalance den belasting entre esnan cu ta cumpli y esnan cu no ta cumpli. Mester instala un “task force” cu por ehecuta e trabaonan y cuminsa cobra belasting manera mester ta sin excepcion. KvK a trece dilanti e idea di crea zona special pa stimula y brinda oportunidad na e comerciante chikito.

Ademas, KvK ta boga pa mas inversion den proyectonan riba tereno di educacion y salubridad. Aruba mester bira un “medical tourism island” y brinda dokternan e oportunidad y beneficionan di impuesto pa por cuminsa opera nan clinica. Otro forma pa diversifica nos economia ta via registracion di companianan di internet y pa personanan local y internacional por registra nan negoshi online.

Actualmente KvK ta trahando riba un proyecto di incubador y a duna Premier un update di esaki. E incubador ta destina pa empresarionan local por cuminsa nan negoshi lihe y cu e guia necesario. E incubador ta facilita tambe espacio y servicionan pa por sigui expande su negoshi durante e prome añanan. A base di guia y netwerk e empresario por crece y crea un negoshi exitoso.

E vision di e gobierno actual ta pa construi boutique hotels maneha door di localnan. Localnan mester por ta doño di nan propio boutique hotels. KvK ta totalmente di acuerdo pa brinda nos localnan e opportunidad aki, y a remarca cu hopi hende di afo tin posicion halto den sector hotelero aki na Aruba, y localnan no ta haya mes hopi oportunidad den mesun posicion.

Mester tene na cuenta cu e “carrying capacity” pa cu e crecemento di turismo no sobrepasa e maximo cu Aruba lo por ofrece nos turistanan y pa e rason aki mes lo ta ideal pa por crea otro pilar nan economico.

KvK a comenta cu a tene reunion cu Minister di Enseñansa y Minister di Husticia. Durante e reunion cu Minister di Enseñansa a discuti e formacion pa introduci “entrepreneurship” den curiculo di schoolnan y adapta educacion pa e ta mas den liña cu e sector laboral di Aruba.

Minister di Husticia a enfoca riba e topico pa yega na un solucion pa e “red tape” cu empresarionan ta worde confronta cune y cu esaki tambe introduci e ley di “digital signature”.

Pa esaki tambe recientemente KvK a manda su recomendacionnan pa Minister di Economia y Minister di Husticia y asina contribui na reformacion economico. KvK a trece dilanti varios ideanan di Kamer pa diversifica nos economia.

Entre nan: baha e cantidad di tempo y e gasto pa lanta un negoshi nobo; duna impulso rapido pa construccion di cas door di haci posibel pa verkavel terrenonan eigendom cu un minimo di rekisitonan di infrastructura; reduci of regula monopolionan y permiti competencia regula den tur mercado; ideanan pa reforma nos sistema di impuesto; stimula desaroyo di agricultura den area di Barcadera y incentivonan fiscal pa aumenta inversion den e sector; permiti desaroyo tecnologico y tambe competencia pa hisa calidad y stimula prijs atractivo; crea trabaonan cu apertura di mercado di internet, servicio di telefon celular, “data storage” y proceso di data pa mercado internacional, entre otro.

 

KvK kier remarca tambe cu banconan mester brinda mas flexibilidad y espacio na e comerciante local. Banconan comercial mester introduci un credit card local y asina stimula desaroyo di e-commerce localmente. Tin e necesidad pa implemente un sistema di pago y transferencia instantaneo manera un PayPal y si esaki por ta na Florin e ta contribui tambe na e-commerce.

 

Representantenan di Directiva di KvK a keda hopi satisfecho y agradecido pa e oportunidad cu Premier a brinda pa reuni. KvK lo sigui traha duro riba e puntonan cu a worde discuti pa asina sigui contribui na un miho comercio pa Aruba.

- Advertisement -

DUNA COMENTARIO

Please enter your comment!
Please enter your name here