Home Gobierno Minister Ruiz-Maduro ta describi resultadonan exitoso di e bishitanan aki

Minister Ruiz-Maduro ta describi resultadonan exitoso di e bishitanan aki

41
0
SHARE
- Advertisement -

Na Hulanda a bishita BC, CAFT y NFIA:

ORANJESTAD (AAN) – Minister sra. Xiomara Ruiz-Maduro a bishita tambe Banco Central di Hulanda, cu tambe tabata un bon reunion den cual nan tabata tin bon palabra, pa e cooperacion reciproco cu nan tin cu Banco Central Aruba.

E dignatario a indica cu BC Hulanda kier fortalece e cooperacion aki mas den Reino cu Banco Central di Sint Maarten y Curacao, cu ultimo tempo tin hopi aspecto cu mester atende cu nan.

Di parti di gobierno di Aruba a papia tambe riba e cooperacion cu nan lo mester pa loke ta trata e evaluacion di pais Aruba cu ta biniendo, encuanto FATF y pa cual nos pais tin hopi trabao pa haci y e ta spera cu aki tambe por conta cu e cooperacion di Banco Central di Hulanda.

REUNION CU PRESIDENTE DI CAFT:

Despues di a reuni cu Banco Central di Hulanda, e mandatario a sinta cu e presidente di CAFT, sr. Raymond Gradus, pa cual nan a duna conseho y e dignatario a indica na nan kico gobierno a haci cu nan conseho di dia 2 di Maart di e aña en curso.

Nan a elabora tambe di con mester sigui cu e parti aki di CAFT, kico e ta bay nifica pa e constelacion aki cu ta bay conoce cambio na Juli proximo, y tur esaki ta aspectonan riba cual nan a papia. E reunion aki a bay bon y sigur cu e sr. Gradus, ken tin conocemento di finanzanan publico, y esaki ta haci mas cu claro cu por a hiba un bon reunion y cu nan ta compronde ki esfuerzo gobierno di Aruba ta haciendo y Aruba ta compronde e idioma financiero cu nan ta papia y kico ta e aspectonan cu nan ta mira.

Esaki ta un reunion importante pa gobierno di Aruba, Minister di Finanza a remarca.

REUNION CU NFIA:

E dignatario a duna di conoce cu nan a reuni tambe cu De Nederland Foreign Investment Agency (NFIA), cual ta un agencia Hulandes cu ta cay bao di Ministerio di Economia. E ta zorg pa trece inversionnan internacional pa Hulanda, y den e network aki ta na unda Aruba lo kier ta den e network aki pa, den nan buskeda, nos pais tambe por ta participe y busca inversionnan cu tin mester pa nos pais. E mandatario a splica cu nan a ricibi algun tip di e parti tecnico y nan a bay den dje, mas cu claro pa por implementa nan y asina por yega na haci uso di nan.

E dignatario a agrega cu den un reunion hunto cu e minister di Relacionnan Exterior di Reino, sr. Stef Blok, ken ta na Aruba aworaki,  nan a bolbe acentua e importancia pa Aruba por incentiva e uso di e Embahadanan Hulandes rond mundo pa asina nos pais tambe por uza e parti aki pa nos asuntonan economico, pa por yega den contacto cu inversionistanan y haci uso di nan pa inversionnan cu nos pais tin mester.

 

- Advertisement -

DUNA COMENTARIO

Please enter your comment!
Please enter your name here