ORANJESTAD (AAN): Durante e prome dia di reunion di Staten, pa trata e Presupuesto 2018, tabata atardi cu Ministro Dangui Oduber a haci algo cu a laga hopi hende babuca.
Papiando riba e asunto di Lotto pa Deporte, e titular a bin cu algun revelacion nobo cu a hala atencion di hopi hende. Y Ministro a mustra cu actonan inaceptable ta pasando cu e directiva “untouchable” di Lotto pa Deporte.
E ta furioso pasobra envez cu placa ta bay pa yuda teamnan y tambe seleccionnan cu ta bay representa Aruba den exterior… nan ta usa placa pa enriquece nan mes.
Ministro Oduber a mustra con un di e miembronan di directiva, cu tin su propio compania di Accountancy, ta haci trabao ‘inside job’.
Kizas e palabra di Ministro no a hala atencion, pero ora cu a aparece den Sala di Parlamento cu un fotocopia gigantesco di prueba di pago, ta tur hende den sala y na TV por a mira esaki..
Hendenan cu tabata mira esaki na TV a bay den shock. Un documento di cobranza di 5.000 Florin pa trabao di Accounting.
Ministro a revela, cu esey ta djis un cobranza di 5.000 Florin. Pero en realidad, e mesun miembro di directiva durante 9 luna, a cobra riba di 200 mil Florin di Lotto.
Ministro a bira e recibo gigantesco den direccion di fraccion di AVP, y a puntra nan: “Esaki ta algo normal pa AVP?”
El a hasta puntra Parlamentario Candelaria (un ex-Polis), si e ta kere cu e forma di proceder aki ta aceptable of no.
Algo ta sigur: Hopi hende a reacciona mustrando cu loke AVP y esnan di Lotto ta haciendo, ta un actitud hopi bergonzoso mes.
Miembronan untouchable di Lotto pa Deporte haciendo movimentonan cu ta contra tur regla di bon gobernacion.
