ORANJESTAD (AAN): Ministro Glenbert Croes su vision y meta principal ta di cana e proceso di rescate di e isla for di e crisis social cu ta afectando e existencia di hopi famia aki na Aruba.
Segun Ministro Croes, ta tristo pa constata cu unda cu bo lesa den reportahenan p.e. di Hulanda, loke cu mas nan ta enfatisa ta e problema social na Aruba, ademas di e estado financiero sumamente delicado di nos Pais. “Y esaki ta haci ami como e Minister encarga cu Asunto Social hopi dolor”, Minister Glenbert Croes a expresa.
“Na mes momento e ta molestia mi con politiconan por a permiti esaki. Con nan por a para mira nos pais hundi dje forma aki. Cu ora nan a tende grito di auxilio nan no kier a scucha. Ta mira pobreza den pueblo pero ta prefera bira cara. Nan sa cu tin mucha ta bay school sin come ta pasa hamber, pero ta prefera sigui haci negoshi cu permiso y tereno. E cosnan aki ta indigna mi pasobra nan a sinta hunga grandi riba stoel di Minister lubidando riba esun cu a pone nan eynan”, tabata expresion di Glenbert Croes.
Pero nos kier pa nos pueblo sa cu tur stakeholder envolvi a cera cabes hunto y pone man na obra. Diabierna ultimo e di dos reunion di ehecucion di e Crisis Plan Social a tuma lugar. “Nos no ta papia so. Nos ta actua tambe”.
Ministro Croes aki a sigui bisa: “Loke cu socialmente nos haci awe, ta nos futuro generacion nos ta proteha. E paso y decisionnan cu nos tuma awe ta pa saca Aruba for di e abismo y pone para back cu orguyo riba su pia pa nos yiunan por goza di dje. Abo y ami probablemente lo no mira su fruto pero si nos lo tin e consenshi limpi y trankil cu nos a actua na e momento cu mas Aruba y nos pueblo tabatin mester di nos”, un Glenbert Croes consciente dje reto a expresa.
Ministro a finaliza indicando cu unda tin boluntad, hunto e isla lo logra e mihor pa Aruba.
