Home Comentario Na abo cu a divorcia y ta bibando den e pica di...

Na abo cu a divorcia y ta bibando den e pica di adulterio

40
0
SHARE
- Advertisement -

Remitido

Mi kier a spierta, cu hopi hende ta cometiendo errornan grandi den nan bida, pa motibo cu nan a perde tur sentido di pika. Un persona mester  sa e Leynan di Dios, pa e por sa kico ta pika.

Bo a divorcia di bo señora of di bo esposo legitimo cu bo a casa dilanti di Dios den Misa y pa despues bo a casa pa civil cu un otro persona pa lanta un otro famia? Anto bo ta bibando den e pica di Adulterio, cu ta e di 6 Mandamento di Dios cu ta bisa,”Lo bo no comete e pika di Adulterio.” Bo no a priminti dilanti di Dios y dilanti di un sacerdote den Misa, cu bo lo keda fiel, den bon tempo y den mal tempo, den tempo di prosperidad y den tempo di adversidad, den tempo di pas y den tempo di pleito?

Bo a cumpli cu loke bo a priminti dilanti di Dios? Si bo a pasa mes den temponan dificil den bo matrimonio, anto pakico bo no a acudi na un Pastoor of na un persona spiritual pa bo haja yudansa y consehonan? Bo mester por sa, manera  cu Hesus a carga Su Crus, asina tambe bo mester a carga bo Crus den e oranan dificil di bo bida.

Dios no ta duna bo un Crus cu bo no por carga, pasobra nos tur tin cu pasa den e  pruebanan di fe y no laga ta asina, cu bo yiunan ta mira nan tata ta biba cu un otro muher y nan ta mira cu nan mama ta biba cu un otro homber. Y esey ta un mal ehempel pa bo yiunan y condenabel pa Dios. Si bo tabata stima Dios di berdad y si bo tabata bay Misa regularmente, anto lo bo a laga e caminda habri, di no pone ningun persona den bo bida, maske cu bo a divorcia.

Hesus nos Señor ta spierta bo den Bijbel den 1Carta na Corintionan 7:39 “Un muher casa ta mara na su esposo, tanten cu e esposo ta na bida. Ma si su esposo muri, como biuda e ta liber pa casa atrobe cu ken cu e kier, basta cu e ta un creyente.”

Den e palabra di Dios aki, bo ta keda casa y uni pa Dios cu bo esposo of cu bo senjora te na morto, maske cu bo ta divorcia. Bo no tabata sa cu satanas ta busca tur sorto di manera pa un matrimonio fracasa, pasobra e diabel sa di antemano,  si e pareha divorcia, e muher lo bay busca un otro homber pa e bay biba cune y e homber lo bay busca un otro muher pa e bay biba cune y asina aki nan dos lo bay biba den un bida di condenacion den e pika di Adulterio, pasobra e diabel sa di antemano cu e pareha divorcia, cu nan no por biba sin e relacion sexual, cu ta e deseo di curpa.

Señor Hesus kier adverti bo di e Sacramento di Matrimonio den Bijbel, Mateo 19:4-6 ; Hesus ta contesta: “Boso no a lesa cu na cuminsamento, Dios Creador a crea nan homber y muher? Y El a bisa: Pesey un homber lo bay laga su tata y su mama pa e uni cu su muher y nan dos lo bira uno. Asina nan lo no ta dos persona mas, ma un solo curpa. Kiermeen hende no mag di separa loke cu Dios a uni den matrimonio.”

Akinan Dios no ta reconoce divorcio y bo ta un persona casa pa Dios Creador den Misa, pero bo no ta respeta E Leynan di Dios y bo ta biba pa biba segun bo mes un bida desaregla. Hopi hende ta kai den e trampanan di e diabel, den fornicacion, den Adulterio, den biba companja y den casamento pa civil so. Casamento pa civil ta regla solamente e asuntonan civil, derechonan pa mucha, bienes, alimento etc., pero cu esey bo no ta salba.

Pa bo por ta salba di bo pika di Adulterio, di prome bo mester separa di e persona cu bo ta bibando cune den Adulterio, bo tin di bay confesa bo pikanan di Adulterio dilanti di un Sacerdote cu tin e autoridad di Cristo Hesus pa pordona pikanan, despues purba haci bon back cu bo ex-esposo of cu bo ex-senjora cu Dios a uni bo cune y si esey ta imposibel, anto bo tin cu tuma bo Crus y biba den un bida bo so den castidad y hunto cu bo yiunan. Pasobra, si bo ta stima Dios di berdad, anto bo mester cumpli cu Dios Su Leynan pa bo por ta salba. Ta hopi hende ta bibando den e pikanan di perdicion.

Dios ta duna bo un oportunidad den bida pa bo dicidi, ta na unda bo kier bay despues di morto, sea den E Gloria Eterna di Dios Tata, of den e condenacion eterno den fierno hunto cu e diabelnan cu a tenta bo? Abo tin di escohe cua ta e caminda cu bo kier sigui. Den Bijbel 2 Tessalonica 1:8/9, ta bisa bon cla:” Den candela ardiente, pa castiga esnan cu no ta reconoce Dios y na esnan cu no ta obedece e Evangelio di nos Senjor Hesu-Cristo. Nan lo paga pa esey cu perdicion eterno, lew for di Cara di Senjor y di Su Mahestad di Su Forsa”.  Amen.

 

Un Cristian Catolico.

- Advertisement -

DUNA COMENTARIO

Please enter your comment!
Please enter your name here