Muchanan di Colegio Santa Filomena klas 5A lo ta representando Aruba e weekend aki:
ORANJESTAD (AAN): Riba 26 di maart ultimo a tuma lugar e ‘première’ di e “UNICEF Kinderrechten Film Festival” caminda Colegio Santa Filomena klas 5A a gana e film festival aki na Aruba.
E hobennan lo ta representando Aruba na e Curaçao International Filmfestival cu lo tuma lugar e fin di siman aki, for di 13 te 15 di April.
James Sneek, director di Fundacion Telefon pa Hubentud a splica den entrevista cu DIARIO cu e mensahe di e video cu Colegio Santa Filomena a traha tabata hopo duidelijk caminda cu hopi biaha ta wak cu e muchanan tin un voz, pero e adultonan no ta scucha esaki. 
Mester resalta cu pa representa Aruba lo tin como hurado na Corsow Paula Nahr di Switch Foundation. Durante e Film Festival na Corsow lo scoge e film ganador di e region di Caribe.
“Nos a kies Paula Nahr pasobra nos ta kere den su competencia. Nos ta kere cu e ta e persona cu tin e conocimento y e por wak kico ta biba den un film y kico ta e mensahe cu ta wordo transmiti y con esaki ta yega na e publico cu e tin cu yega”, Sneek a comenta.
Paula Nahr hunto cu e otro huradonan na Corsow lo scoge cual ta e video cu lo gana e ‘UNICEF Kinderrechten Film Festival’ di Caribe. Akinan 6 pais di e parti caribense di Reino Hulandes (Aruba, Corsow, Sint Maarten, Saba, St. Eustatius y Bonaire) ta competi cu otro. Mescos cu a tuma lugar na Aruba, e muchanan a wordo prepara tocante derechonan d mucha pa despues traha un pintura pa despues traha nan video.
James Sneek a splica cu e ganador caribense lo ta participando den e Rotterdam International Film Festival. E klas cu a gana na Aruba, full e klas lo ta viahando diabierna pa Corsow pa ta presente na e Film Festival na e isla ruman. 
UNICEF ta e organizacion internacional cu ta zorg pa e derechonan di mucha. Nan ta controla rond mundo cu tur gobierno ta cumpli cu e tratado aki. Banda di esey UNICEF ta bin cu diferente proyecto pa stimula e gobiernonan pero tambe organizacionnan manera Telefon pa Hubentud y e muchanan pa ta parti di e proyectonan aki, James Sneek a duna di conoce.
Finalmente, Paula Nahr, Fundadora di Switch Foundation a expresa ora cu a puntre di su participacion como hurado representando Aruba cu “Pa mi tabata un sorpresa. Mi no a spera esey. E trabao cu mi ta haci mi ta hacie pa conviccion pasobra mi ta kere cu nos tin cu informa prome, educa y duna e personanan informacion pa nan por haci cambio di mentalidad di un manera positivo pa nan por tuma accion pa mehora nan bida”
E hecho cu nan a scoge mi pa representa Aruba pa mi ta un honor y un confirmacion cu locual Switch Foundation ta haciendo ta bon, ta necesario y ta impactando. Mi kier gradici UNICEF y Telefon pa Hubentud pa nan criteria y pa kere den mi trabao y den mi team”, Nahr a bisa.
