Home Comentario Porfin e macaco a sali for di e manga

Porfin e macaco a sali for di e manga

332
0
SHARE
- Advertisement -

Remitido

Aruba a haya un Gobierno nobo cu a forsa di tur manera, pa por a yega na e Gabinete cu nos conoce awor pa 4 luna caba.

Locual cu ta obvio ta  cu e Gabinete aki ta demonstrando cu nan no sa con pa maneha e situacion cu e isla ta aden y na lugar di trece solucion dia pa dia  pa di ata hacie e situacion mas peor. Goberna no ta sinta yora tur dia kico otro a haci of lagi haci. Si e situacion ta verdaderamente malo anto no tin tempo pa perde.

A sinta 4 luna sin cu a bin cu un plan pa e solucion y na lugar di lora manga y cuminsa traha na e solucionnan ta sinta yora so lubidando cu mester bin pan riba mesa tambe.

Awor awe nos por bin mira cu no tin un vision concreto y ta blo manipula informacion pero en realidad no ta haciendo nada te ainda.

Gobernantenan mester cuminsa realisa cu cuminsa na pone medida den nan seno prome pa demostra cu nan kier verdaderamente trece un solucion duradero cu lo yuda nos tur sin cu tin di mishi cu e sector priva y esaki automaticamente lo promove e sector priva tambe pa funciona mas eficiente y cumpliente.

Waak un situacion caminda cu Gobierno a haci su gastonan innecesario halto y caminda cu henter mundo ta conseja cu bo mester baha bo propio gastonan prome.

Pero nos ta tende awe atrobe ta cu e pueblo mester bay sufri segun nan pa asina salva nan situacion.

E anuncio aki ta bay causa cu e problemanan lo bay bira peor y lo no trece ningun solucion.

E ser humano mester ta na primer lugar ta lema pero en realidad ta practica y demostra cu ta e ser humano ta esun cu mester bay worde castiga atrobe cu tur tipo di medida cu lo bay afecta su norma di vida negativamente.

Mi no kier critica so pero tambe aporta a algun cosnan chiquito cu segun mi por worde implementa prome  y cu sigur lo trece hopi beneficionan pa cu situacion di Goberno su finanzas y beneficia henter e pueblo di Aruba cu lo sinti su efecto positivo en general.

Ta increible cu Gobierno por tolera di sigui mantene su gasto nan absurdamente halto anto busca pa tira esaki den scochi di esnan cu no tin nada di haber cu esaki y atrobe lo mester bay paga pa fout di otro cu kier provecha pero en realidad no sa con pa maneja e situacion.

Na mi parecer locual cu CAFT ta recomenda ta pa baha gastonan y no bin cu mas medida cu lo afecta nos economia malamente.

Lagami cuminsa na menciona algun cos cu mi ta sigur cu lo no cay na agrado di hopi cu ta den Gobierno pero den henter mundo ta asina cu, si bo no por cumpli cu bo gastonan, bo mester baha man bo mes prome.

Awor na Aruba nos conoce un problema cu e crece silenciosamente durante varios aña door cu Gobernantenan mayoria nunca a yega di produci algo nan mes of a yega di pasa den situacionnan cu si no produci no tin pa come.

Ban cuminsa wak na gastonan di personal y nan produccion na valor di e numeracion.

Pakico tur hende kier ta den Gobierno?  Si pasobra no tin presion pa produci pa por cobra fin di luna y riba dje por haci tur tipo di cosnan priva den ora di trabao cu pueblo mester paga pe sin problema pasobra e leynan no ta enforsa esaki.

Si Gobierno no sa kico pa haci, wel ata aki algun punto cu por cuminsa cune cu lo spaar miyones y lo no perhudica ningun hende cu nan lo mester keda sin come.

Ban cuminsa na wak tur locual cu tin na beneficio cu ta baha bo productividad cu ta costando e pueblo un dineral.

Laga esnan concerni bin bisa pueblo cuanto placa e ATV dagen nan ta costando e pueblo pa improductividad. 13 dia pa aña ta casi 3 siman di trabao pues esey ta mas di 5% di bo capacidad di presta pa bo recompensa. Esaki lo nifica si bo cuminsa cu elimina e ATV dagen nan cu a worde introduci basta aña atras como recompensa di placa y cu awendia esaki na mi parecer a worde recompensa tambe den placa mes den aumentonan di e salarionan.

Door di djis elimina e atv dagen nan bo por baha bo cantidad di empleadonan caba cu mas di 5.5% y door cu esnan emplea lo tin un 5.5% mas na tempo pa produci pa nan salario esaki tin su efecto double pa cu e gastonan di Gobierno.

Bon esaki ta 1.

Ban kita otro locura di reparatie toeslag pa tur ambtenaar cu ta un suma bastante considerable riba e presupuesto.

Pa por cumpli cu bo doño di trabao mi ta kere cu medida di austeridad mester worde implementa riba e empleadonan publico cu tambe lo mester yuda aporta na baha gasto pa cu nan doño di trabao.

Pues por kita e bashi premie y e gelijkbedrag tambe.

Aki caba segun mi Gobierno a recupera mas cu e deficit cu nan ta papiando di dje pa cu e presupuesto y lo bo por tin un presupuesto balanza sin cu a mishi cu e sector priva y a demostra cu bo ta serio cu bo manejo.

Di otro banda no bay crea mas departamento cu no ta necesario actualmente.

Mester cuminsa traha mas avanza y automatiza y duna e pueblo mejor servicio.

Asina por spaar mas y baha gasto cu tin actualmente y duna un servicio mas eficiente.

Door di e adaptacionnan aki lo beneficia e sector priva tambe door cu lo mester perde tanto ora di trabao innecesario pa cosnan cu por wordo soluciona mas eficiente.

Djis pasa waak tur oficina di Gobierno cuanto hende tin tur dia ta sinta warda por nada y no ta productivo. Bo a yega di realisa cuanto esaki ta consta nos economia?

Gobierno mester siña compronde cu mas halto su gastonan ta menos atractivo nos isla ta bira.

Cada forma di belasting cu Gobnierno kier implementa of aumenta e ta causando un inflacion na nos economia y ta creando e spiral negativo cu lo no yuda na drecha un situacion di cu no tin bastante placa ta circula.

Locual cu a wordo presenta awe como un solucion ta bay afecta yiust henter e economia di e isla peor y lo no trece ningun solucion y lo promove mas pobreza y un costo di vida mas caro cu lo afecta nos tur y haci Aruba un isla inatractivo pa inversionistanan y tambe lo extende su mes na e pilar turistico tambe lo wordo kibra di e manera aki.

Corda cu tur locual cu e ser publica awe ta causa un aumento di gasto general y yuda acelera e spiral negativo cu lo caba cu nos economia!

Loke Aruba mester awor ta un maneho stricto y controla  cu lo saca Aruba na un manera profesional y demostra na mundo henter cu nos por soluciona problema di verdad y supera esaki na un manera beneficioso pa un y tur.

Mi ta kere cu Gobierno ta completamente robez cu loke nan a publica awe y lo pone henter e isla den un caminda robez caminda cu criminalidad y ilegalidad lo bay aumenta y na final di cuenta lo no soluciona nada di e problemanan cu nan ta papia di dje.

Mi kier haci un suplica na esnan cu ta responsabel pa loke a worde publica awe pa responsabilisa nan mes y si bo no por of no sa con pa haci esaki anto entrega bo retiro y pone profesionalnan cu si sa con pa trata den situacionnan asina. Awor no tin tempo pa hunga politiek ni punta dede pero mester actua rapido y cu cautela pa no haci e situacion peor.

Mester cuminsa na haci cambio den e leynan existente pa por ehecuta e medidanan di austeridad cu lo mester conta pa full sector publico pa asina por logra yega na un solucion favorable y mas responsabel.

Si bo kier ta serio demostra cu bo por haci lo corecto!

Atentamente,

 

  1. Smit,

Santa Martha 8.

 

- Advertisement -

DUNA COMENTARIO

Please enter your comment!
Please enter your name here