Productonan di Venezuela cu drenta Aruba via barco lo wordo monitorea

    88
    0
    SHARE
    - Advertisement -

    ORANJESTAD  (AAN): Cuerpo di Douane lo bay tin un maneho nobo pa cual ta e barconan cu ta bin cu Venezuela. Director di e Cuerpo, Ricky Croes, a splica cu desde cu tabata tin e problema cu Venezuela, un werkgroep a keda institui pa asina por traha riba frontera. Ultimo dianan aki tabata tin algun reunion door di e firmamento di MOU cu tabata tin.

    Basa riba esey tambe a bin cu un maneho pa locual ta trata tur e stakeholdernan cu tin cu tin di haber cu ceramento di frontera. Esta Douane, Imigracion, Kustwacht, polis. Tin e parti di Maritiem Politie, Directie scheepvaart y tur hunto a yega na un consenso cu ta bay pone cada un, conforme su ley, traha un manera cu ta keda monitorea tur e productonan cu ta bin di Venezuela.

    A haya un gazeta di Venezuela cu ta papia di locual ta e productonan cu ta prohibi pa sali for di eynan. E productonan cu ta prohibi di sali, no necesariamente ta prohibi pa drenta Aruba. Ey ta caminda cu tin e discrepancia. Den e caso aki, a lanta un werkgroep pa mira con pa yega na un manera uniform pa traha, pa asina por tene e relacion cu Venezuela bon.

    Pa loke ta trata e parti di scheepvaart, nan a bin cu nan exigencianan pa e botonan cu nan ta bay permiti drenta. Pa e parti di imigracion, a bin cu e sistema unda cu  nan ta bay ehecuta nan ley pa asina ey evita cu ta bay tin problema cu tur e miembronan di tripulacion cu por bin.

    Esta tur hende cu ta trece carga, pa wak con ta mitiga risico cu tin eynan. Tambe ta haya cu e parti di Douane, pa loke ta trata e productonan cu ta bin di Venezuela. Sa cu tin di nan cu ta prohibi na Venezuela. A dicidi cu lo bay warda pa traha riba acuerdonan hunto cu Venezuela.

    Ta bin cu gruponan di trabao unda cu Douane di Venezuela, Aruba, Corsou y Boneiro lo sinta hunto, pa asina traha riba cierto acuerdonan. Asina ey por controla e productonan y percura pa loke bin di Venezuela, pa e ta controla riba un certificado di origen.

    Segun Croes, Venezuela tin un lista, unda cu nan ta papia di diferente producto. Entre otro Shampoo, crema pa cabey, tambe por ehempel tomati, nan tin por ehempel hero, aluminium. Esey ta algun ehempel cu nan tin riba un lista, cual ta uno hopi largo cu no por sali for di Venezuela.

    Pero aki no ta prohibi pa drenta. Awor aki locual ta trata e productonan ey, no tin ningun regla pa stop nan. E ora ey mester bin na acuerdo cu Venezuela, pa si hende por yega na un manera cu toch por pon’e den un manera of otro den ley cu por stopnan y ta avisa nan, cu si nan tin certificado y tin cu traha riba un manera kico e certificado ta consisti, ken ta e organo cu ta firma e certificadonan ey y cua ta e firmanan cu tin.

    Una bes cu bin cu un certificado, e ora por laga nan drenta. Si nan no bin cu un certificado, e ora ta palabra cu Venezuela, kico ta e maneho cu nan lo tin y cu Aruba por aplica aki.

    Si nan bisa pa manda nan bek, naturalmente, basa riba e MOU cu a firma, mester yega na e acuerdonan ey.

    Pa loke ta barconan di fruta, barconan poco mas grandi, tin un prerogativo pa esaki. Director di Douane, Ricky Croes ta splica cu esey ta algo cu lo ta den man di Directie Scheepvaart. Nan ta esnan cu ta bay pa control di barco. Nan ta bay controla diferente barco, of diferente botonan, nan ta controla e siguridad di e botonan y cua di nan mag bin.

    Controlnan ta keda mesun cos. Douane ta haci su trabao. Awor aki cu tin cierto reglanan cu ta bira mas estricto, e cantidad di botonan lo bay baha. Kisas lo bin cu boto mas grandi si no acepta eseynan. Pero mirando cu na e momento cu yega na acuerdonan cu Venezuela, kisas lo bay tin productonan cu no lo mag bin. Esey ta bay pone cu kisas bo ta haya cu e trafico di producto entre Venezuela cu Aruba, of di Venezuela pa Aruba, lo baha.

    Na Venezuela no por bisa kico e ley eynan ta. Na Aruba un cos tin cu ta koper. Na 2014 a bin cu un MB unda cu ta bisa cu pa exporta koper lo mester tin un certificado of mester por demostra di unda esey a bin. Esey ta loke ta aplicando awor aki. Unico cos cu tin awor aki.

    No tin barco ta drentando por lo pronto. Tin conseho ta bayendo pa Minister, kende lo tin cu dicidi hunto cu Boneiro, y Corsou pa mira kico ta e acuerdonan cu tin cu keda traha y basa riba esaki ta cuminsa acepta botonan. E MOU ta firma, pero awo tin cu duna contenido na e MOU. Te ainda no tin nada concreto awor aki.

     

    - Advertisement -

    DUNA COMENTARIO

    Please enter your comment!
    Please enter your name here